ଟପ୍ ମାଓ ନେତା ପ୍ରଶାନ୍ତ ବୋଷ ଗିରଫ, ଘୋଷଣା ହୋଇଥିଲା କୋଟିଏ ଟଙ୍କା
ରାଞ୍ଚି: ଟପ୍ ମାଓବାଦୀ ନେତା ପ୍ରଶାନ୍ତ ବୋଷ ଓରଫ କିଷନ ଦା ଗିରଫ । କିଷାନଙ୍କୁ ଗିରଫ କଲା ଝାଡଖଣ୍ଡ ରାଞ୍ଚି ଏସଟିଏଫ । କିଷନଙ୍କ ମୁଣ୍ଡ ଲାଗି ଘୋଷିତ ହୋଇଥିଲା ୧ କୋଟି ଟଙ୍କାର ପୁରସ୍କାର । ଏହା ସହ ତାଙ୍କ ସ୍ତ୍ରୀ ଶୀଲା ମାରଣ୍ଡିଙ୍କୁ ମଧ୍ୟ ଗିରଫ କରାଯାଇଛି । ଏନେଇ ସୂଚନା ଦେଇଛନ୍ତି ଜଣେ ବରିଷ୍ଠ ପୋଲିସ ଅଧିକାରୀ । ଶୀଲା ସ୍ଥାନୀୟ ସିପିଆଇ ମାଓବାଦୀ ସଂଗଠନରେ ସକ୍ରିୟ ସଦସ୍ୟ ଭାବେ କାର୍ଯ୍ୟ କରୁଥିଲେ । ରାଜ୍ୟରେ ବିଭିନ୍ନ ଅପରାଧ ଘଟଣାରେ କିଷାନ ଦାଙ୍କୁ ଦୀର୍ଘ ଦିନ ଧରି ଖୋଜୁଥିଲା ପୋଲିସ ।
କିଷନ ଦା ସିପିଆଇ ମାଓବାଦୀ ସଂଗଠନର କେନ୍ଦ୍ରୀୟ କମିଟିର ସଦସ୍ୟ ଥାଇ ସଂଗଠନର ପରିଚାଳନା କରୁଥିଲେ । ସେ ମଧ୍ୟ ପୂର୍ବାଞ୍ଚଳ ଆଞ୍ଚଳିକ ବ୍ୟୁରୋର ସମ୍ପାଦକ ଥିଲେ । ଗୁଇନ୍ଦା ତଥ୍ୟକୁ ଆଧାର କରି ପୋଲିସ ତାଙ୍କୁ ଧରିବାରେ ସକ୍ଷମ ହୋଇଥିଲା । ପଶ୍ଚିମବଙ୍ଗରେ ଜନ୍ମିତ କିଷନ ଦା ବିହାର, ଝାଡଖଣ୍ଡ, ପଶ୍ଚିମବଙ୍ଗ ସମେତ ଅନାନ୍ୟ ରାଜ୍ୟରେ ସଂଗଠନର ଭୂମିକା ନିର୍ବାହ କରୁଥିଲେ । ସେ ସରଣ୍ଡା ଜଙ୍ଗଲରେ ରହି ମାଓବାଦୀ ସଂଗଠନର ନେତୃତ୍ବ ନେଉଥିଲେ । ଗିରଫ ପରେ ତାଙ୍କୁ ଏସଟିଏଫ ଜେରା କରିବା ଜାରି ରଖିଛି ।
