ପାରା ଅଲମ୍ପିକରେ ଭାରତକୁ ଆଉ ୨ଟି ପଦକ; ମରିୟପ୍ପନଙ୍କୁ ରୌପ୍ୟ, ଶରଦଙ୍କୁ କାଂସ୍ୟ
ଟୋକିଓ: ଟୋକିଓ ପାରା ଅଲମ୍ପିକରେ କମାଲ୍ କରୁଛନ୍ତି ପାରା ଆଥଲେଟ । ମରିୟପ୍ପନ ଥଙ୍ଗାବେଲୁ ରୌପ୍ୟ ପଦକ ଜିତିଥିବା ବେଳେ ଶରଦ କୁମାର କାଂସ୍ୟ ପଦକ ଜିତିଛନ୍ତି । ପୁରୁଷ ହାଇ ଜମ୍ପରେ ଟି୬୩ରେ ମରିୟପ୍ପନ ୧.୮୬ ମିଟର ଡେଇଁ ଥିବାବେଳେ ଶରଦ ୧.୮୩ ମିଟର ଜମ୍ପ ମାରିଛନ୍ତି । ଆମେରିକାର ସ୍ୟାମ କ୍ରୁ ୧.୮୮ ଜମ୍ପ ମାରି ସ୍ୱର୍ଣ୍ଣ ପଦକ ହାତେଇଛନ୍ତି । ୨ଟି ପଦକ ସହ ଭାରତର ମେଡାଲ ସଂଖ୍ୟା ୧୦କୁ ବୃଦ୍ଧି ପାଇଛି ।
ଏହା ପୂର୍ବରୁ ଭାରତର ନିଷାଦ କୁମାର ରବିବାର ପୁରୁଷ ହାଇ ଜମ୍ପରେ ଟି୪୭ରେ ରେକର୍ଡ କରି ରୌପ୍ୟ ପାଇଥିଲେ । ଏଥିସହ ମରିୟପ୍ପନ ପାରାଅଲମ୍ପିକରେ ଲଗାତାର ଦ୍ୱିତୀୟ ପଦକ ଜିତି ଇତିହାସ ରଚିଛନ୍ତି । ଏହା ପୂର୍ବରୁ ରିୟୋ ୨୦୧୬ ଅଲମ୍ପିକରେ ମରିୟପ୍ପନ ସ୍ୱର୍ଣ୍ଣ ପଦକ ଜିତିଥିଲେ ।
ଚଳିତ ଟୋକିଓ ପାରା ଅଲମ୍ପିକରେ ଏବେ ଯାଏଁ ଭାରତ ୧୦ଟି ପଦକ ଜିତିଛି । ଭାରତ ୨ଟି ସ୍ୱର୍ଣ୍ଣ, ୫ଟି ରୌପ୍ୟ ସହ ୩ଟି କାଂସ୍ୟ ପଦକ ପାଇଛି । ଯାହାକି ପାରା ଅଲମ୍ପିକରେ ଏବେ ଯାଏଁ ଭାରତର ସର୍ବଶ୍ରେଷ୍ଠ ପ୍ରଦର୍ଶନ । ୨୦୧୬ ରିୟୋ ପାରାଅଲମ୍ପିକରେ ଭାରତ ୨ଟି ସ୍ୱର୍ଣ୍ଣ ସହ ମୋଟ ୪ଟି ପଦକ ଜିତିଥିଲା ।
