ଭୁବନେଶ୍ୱର: ପାରାଦୀପ ବନ୍ଦର ଅଧ୍ୟକ୍ଷ ପଦ ଖାଲି ପଡ଼ିବା ନେଇ ଅଭିଯୋଗ ଆଣିଲେ ପୂର୍ବତନ ମନ୍ତ୍ରୀ ଡାକ୍ତର ଦାମୋଦର ରାଉତ। ସେ ଅଭିଯୋଗ କରିଛନ୍ତି ଯେ ପାରାଦୀପ ବନ୍ଦର ବିରୋଧରେ କେନ୍ଦ୍ର ସରକାର ଚକ୍ରାନ୍ତ କରୁଛନ୍ତି। ବର୍ଷକରୁ ଅଧିକ ସମୟ ହେଲାଣି ପାରାଦୀପ ବନ୍ଦର ଅଧ୍ୟକ୍ଷ ପଦ ଖାଲିପଡିଛି। ଏବେ କୋଲକାତା ବନ୍ଦର ଅଧ୍ୟକ୍ଷଙ୍କୁ ଅତିରିକ୍ତ ଦାୟିତ୍ୱ ଦିଆଯାଇଛି ବୋଲି ଦାମୋଦର ରାଉତ ଅଭିଯୋଗ କରିଛନ୍ତି। ସେପଟେ ଧାମରାର ଆଦାନୀଙ୍କ ବନ୍ଦରରେ କିପରି ଅଧିକ ଜାହାଜ ଲାଗିବ, ସେଥିପାଇଁ ପାରାଦୀପ ବନ୍ଦରର ସ୍ଥାୟୀ ଅଧ୍ୟକ୍ଷ ନିଯୁକ୍ତି କରାଯାଉ ନାହିଁ। ପାରାଦୀପ ବନ୍ଦରକୁ ଗୌଣ କରି ଅନ୍ୟ ବନ୍ଦରକୁ ଆଗକୁ ନେବା ପାଇଁ କେନ୍ଦ୍ର ସରକାର ଚାଲ କରିଛନ୍ତି। ଅଣ- ବିଜେପି ଶାସିତ ରାଜ୍ୟକୁ ସବୁ ସ୍ତରରେ ବଦନାମ କରିବା ପାଇଁ କେନ୍ଦ୍ର ସରକାର ଉଦ୍ୟମ କରିଚାଲିଛନ୍ତି। ଗଣତନ୍ତ୍ରରେ କେନ୍ଦ୍ରର ଏପରି ଆଭିମୁଖ୍ୟ ଦୁର୍ଭାଗ୍ୟଜନକ ବୋଲି ଡାକ୍ତର ଦାମୋଦର ରାଉତ କହିଛନ୍ତି।
