ଶହେ ଦିନରେ ଖେଳ ଖତମ, ଆଫଗାନ ରାଷ୍ଟ୍ରପତି ଦେଶ ଛାଡିଲେ

କାବୁଲ: ଶହେ ଦିନର ଯୁଦ୍ଧ ପରେ ଆଫଗାନିସ୍ତାନରେ ତାଲିବାନ ଯୁଗ ପୁନଃ ଆରମ୍ଭ ହୋଇଛି । ତାଲିବାନ ସାମ୍ନାରେ ଅସ୍ତ୍ରତ୍ୟାଗ କରିଛନ୍ତି ଆଫଗାନୀ ସେନା । ଗୋଟିଏ ମଧ୍ୟ ଗୁଳି ନଚଳାଇ କାବୁଲକୁ କବଜା କରିଛି ତାଲିବାନ । ଏହା ସହିତ ଆରମ୍ଭ ହୋଇଛି ଆଫଗାନିସ୍ତାନରେ ତାଲିବାନର ଶାସନ । ତାଲିବାନକୁ କ୍ଷମତା ହସ୍ତାନ୍ତର କରି ଆଫଗାନୀ ରାଷ୍ଟ୍ରପତି ଅଶରଫ ଗନି ଦେଶ ଛାଡିଛନ୍ତି । ସେ ତାଜକିସ୍ତାନକୁ ଆତ୍ମନିର୍ବାସନରେ ଯିବେ ବୋଲି ଜଣା ପଡିଛି ।

ଗନି ଛାଡିଲେ ଘର
ଆଫଗାନୀ ନ୍ୟୁଜ୍ ଚ୍ୟାନେଲ ତୋଲୋ ନ୍ୟୁଜ୍ ଅନୁସାରେ ତାଲିବାନର ନମ୍ବର ଦୁଇ ନେତା ମୁଲ୍ଲା ବରାଦରଙ୍କ ସହିତ ଆଲୋଚନା ବିଫଳ ହେବା ପରେ ଗନି ଦେଶଛାଡିବାକୁ ରାଜି ହୋଇଛନ୍ତି । ସେ କ୍ଷମତା ହସ୍ତାନ୍ତର କରି ତାଜିକସ୍ତାନ ଅଭିମୁଖେ ବାହାରି ଯାଇଛନ୍ତି । ସୂଚନାଯୋଗ୍ୟ ଯେ, ରାଷ୍ଟ୍ରପତି ତାଲିବାନକୁ ମିଳିତ ଶାସନ ପାଇଁ ପ୍ରସ୍ତାବ ଦେଇଥିଲେ । ତେବେ ତାଲିବାନ ଏହାକୁ ପ୍ରତ୍ୟାଖାନ କରି ତାଙ୍କୁ ସନ୍ଧ୍ୟା ସୁଧା କ୍ଷମତାହସ୍ତାନ୍ତର କରିବାକୁ ଚେତାବନୀ ଦେଇଥିଲା । ଗନି ଦେଶ ଛାଡିଛନ୍ତି କିମ୍ବା ଛାଡିବାକୁ ଯାଉଛନ୍ତି ଖବର ମଧ୍ୟରେ ଉପ ରାଷ୍ଟ୍ରପତି ଦେଶ ଛାଡିବେ ନାହିଁ ବୋଲି ଖବର ଆସୁଛି

ଭାରତ ଏୟାର ଲିଫ୍ଚ ପାଇଁ ପ୍ରସ୍ତୁତ
କାବୁଲରେ ରହୁଥିବା ଭାରତୀୟ ଦୂତାବାସର କର୍ମଚାରୀଙ୍କୁ ସେଠାରୁ ହଟାଯିବ କି ନାହିଁ ସେ ନେଇ ଭାରତ ସରକାର ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ । କିନ୍ତୁ ଖବର ଅନୁସାରେ ଭାରତୀୟ ବାୟୁସେନାର ମାଲବାହୀ ଯାହଜ କୌଣସି ଜରୁରୀକାଳିନ ପରିସ୍ଥିତିରେ ଏୟାର ଲିଫ୍ଟିଂ ପାଇଁ ପ୍ରସ୍ତୁତ ଥିବା ଜଣା ପଡିଛି । ଅନ୍ୟପକ୍ଷରେ ବ୍ରିଟେନ୍ ତା’ର ଦୂତାବାସର ସବୁ କର୍ମଚାରୀଙ୍କୁ ଏୟାର ଲିଫ୍ଟ କରିବାକୁ ନିର୍ଣ୍ଣୟ ନେଇଛି ।

୧୯୯୬ର ସ୍ଥିତି ସୃଷ୍ଟି ହେବ କି ?
୧୯୯୬ରେ ତାଲିବାନ କାବୁଲକୁ ନିଜ କବଜାକୁ ନେବା ପରେ ରକ୍ତମୁହାଁ ହୋଇଥିଲା । ସେତେବେଳେ ଦେଶର ପୂର୍ବତନ ରାଷ୍ଟ୍ରପତି ନଜିବଉଲ୍ଲାଙ୍କୁ ଜାତିସଂଘ ଅଫିସରୁ ତାଲିବାନ ନିଜ କବଜାକୁ ନେଇଥିଲା । ଜାତିସଂଘ ଅଫିସ ଭିତରେ ହିଁ ତାକୁ ପିଟି ପିଟି ହତ୍ୟା କରାଯାଇଥିଲା । ତାଙ୍କ ଗୁପ୍ତାଙ୍ଗକୁ କାଟି ଦିଆଯାଇଥିଲା । ପରେ ନଜିବଉଲ୍ଲା ଓ ତାଙ୍କ ଭାଇଙ୍କ ମୃତଦେହକୁ କାବୁଲର ଏକ ଟ୍ରାଫିକ ପୋଷ୍ଟରେ ଝୁଲାଇ ଦିଆଯାଇଥିଲା । ତାଲିବାନ ୨୫ ବର୍ଷ ପରେ ସେହିଭଳି ଆତଙ୍କରାଜ ସୃଷ୍ଟି କରିପାରେ ବୋଲି ଆଶଙ୍କା କରାଯାଉଥିବା ବେଳେ ମୌଳବାଦୀ ସଂଗଠନ ସେଭଳି କିଛି ହେବନାହିଁ ବୋଲି ଆଶ୍ୱାସନା ଦେଇଛି । ସଂଗଠନ ପକ୍ଷରୁ କୁହାଯାଇଛି ଯେ, କାବୁଲର ସବୁ ନାଗରିକଙ୍କ ସୁରକ୍ଷାର ପ୍ରତିଶ୍ରୁତି ଆମେ ଦେଉଛୁ । ବେସାମରିକ ଓ ସାମରିକ ଅଧିକାରୀଙ୍କୁ କୌଣସି ଦଣ୍ଡ ଦିଆଯିବ ନାହିଁ । ତେବେ କ୍ଷମତା ଉପରେ ପୂର୍ଣ୍ଣ ଅଧିକାର ପରେ ତାଲିବାନ କ’ଣ କରୁଛି ତାହା ଉପରେ ଏବେ ବିଶ୍ୱ ସମୁଦାୟର ନଜର ରହିଛି ।