ସମୟରେ ଭ୍ୟାକ୍ସିନର ୨ୟ ଡୋଜ୍ ନ ମିଳିଲେ କି କ୍ଷତି ହେବ? ଜାଣନ୍ତୁ…

ନୂଆଦିଲ୍ଲୀ: କରୋନା ଭାଇରସରୁ ବର୍ତ୍ତିବା ପାଇଁ ସାରା ଦେଶରେ ଟିକାକରଣ ଅଭିଯାନ ଜାରି ରହିଛି। ଏମିତିକି ଦେଶରେ କରୋନା ଟିକାର ୨୧ କୋଟିରୁ ଅଧିକ ଡୋଜ୍ ଟୀକାକରଣ କରାଯାଇଛି ।

ସୂଚନା ଅନୁଯାୟୀ ଟୀକାକରଣ ଜାରି ରହିଥିବା ବେଳେ ଟିକା ସଙ୍କଟ ମଧ୍ୟ ଦେଖାଦେଇଛି । ଏଭଳି ସମୟରେ ଯଦି କେହି ବ୍ୟକ୍ତି କରୋନାର ପ୍ରଥମ ଡୋଜ୍ ନେଇସାରିଛନ୍ତି କିନ୍ତୁ ତାଙ୍କୁ ସଠିକ୍ ସମୟରେ ୨ୟ ଡୋଜ୍ ମିଳୁନି, ତାହେଲେ କ’ଣ କ୍ଷତି ହେବ? ଦେଶରେ ଟିକା ସଙ୍କଟ ବେଳେ ଅନେକଙ୍କ ମନରେ କିଛି କିଛି ପ୍ରଶ୍ନ ଉଙ୍କି ମାରିଛି… ତେବେ ଆସନ୍ତୁ ଜାଣିବା କ’ଣ ରହିଛି ଉତ୍ତର…

କାହିଁକି ଦୁଇଟି ଡୋଜ୍ ମଧ୍ୟରେ ବ୍ୟବଧାନ ବଢିଲା?

ବିଶେଷଜ୍ଞଙ୍କ ମତରେ ବିଶ୍ୱର ଅନେକ ସ୍ୱାସ୍ଥ୍ୟ ସଙ୍ଗଠନ କରାେନାର ଦୁଇଟି ଡୋଜ୍ ମଧ୍ୟରେ ବ୍ୟବଧାନ ରଖିବା ପରାମର୍ଶ ଦେଇଥାନ୍ତି । ପ୍ରଥମ ଡୋଜ୍ ମଧ୍ୟରେ ୪-୬ ସପ୍ତାହ ବ୍ୟବଧାନ ରହିଥିଲା । ପରବର୍ତ୍ତୀ ସମୟରେ ୬-୮ ସପ୍ତାହ ଏବଂ ତା’ପରେ ବ୍ୟବଧାନ ୧୨-୧୪ ସପ୍ତାହ ବୃଦ୍ଧି କରାଯାଇଥିଲା । ଦୁଇ ଡୋଜ୍ ମଧ୍ୟରେ ଯେତେ ବ୍ୟବଧାନ ରହିବ ଭ୍ୟାକ୍ସିନ୍ ସେତେ ପ୍ରଭାବଶାଳୀ ହେବ ବୋଲି ଦାବି କରାଯାଇଛି ।

ନିର୍ଦ୍ଧାରିତ ସମୟ ମଧ୍ୟରେ ଭ୍ୟାକ୍ସିନ୍ ନ ମିଳିଲେ କ’ଣ ହେବ?

ବିଶେଷଜ୍ଞଙ୍କ ମତରେ ଯଦି କେହି ବ୍ୟକ୍ତିଙ୍କୁ ସମୟସୀମା ମଧ୍ୟରେ ଦ୍ୱିତୀୟ ଡାେଜ୍ ନମିଳେ ତେବେ ତାଙ୍କୁ ଚିନ୍ତା କରିବାର ଆବଶ୍ୟକତା ନାହିଁ। ହେଲେ ଧ୍ୟାନ ରଖନ୍ତୁ ଯେପରି ଅଧିକ ବିଳମ୍ବ ନହୁଏ । ଯଦି ଏମିତି ହେଉଛି ତାହେଲେ ଶରୀରରେ ସୃଷ୍ଟି ହୋଇଥିବା ଇମ୍ୟୁନିଟି ପାୱାର କମି ଯାଇଥାଏ । ଏଥିସହ ଆଣ୍ଟିବଡିକୁ ଅଧିକ ବୁଷ୍ଟ ମିଳିପାରି ନଥାଏ ।

କେତେ ବିଳମ୍ବ ହୋଇପାରେ ଦୁଇ ଡୋଜ୍ ମଧ୍ୟରେ ବ୍ୟବଧାନ?

ବିଶେଷଜ୍ଞଙ୍କ ମତରେ ଦୁଇ ଡୋଜ୍ ମଧ୍ୟରେ ସର୍ବାଧିକ ୧୬ ସପ୍ତାହରୁ ଅଧିକ ବ୍ୟବଧାନ ରହିବା ଉଚିତ୍ ନୁହେଁ । କାରଣ ଭ୍ୟାକ୍ସିନର ଦ୍ୱିତୀୟ ଡୋଜକୁ ବୁଷ୍ଟର ଡୋଜ୍ କୁହାଯାଇଥାଏ । ଏଭଳି ସ୍ଥଳେ ୨ ଡୋଜ୍ ଲଗାଇବା ବହୁ ଜରୁରୀ । ଏହା ଦ୍ୱାରା ପୂର୍ବରୁ ଶରୀରରେ ସୃଷ୍ଟି ହୋଇଥିବା ଆଣ୍ଟିବଡି ଅଧିକ ମଜଭୁତ ହୋଇଥାଏ ।

ଦୁଇଟି ଭିନ୍ନ ଭିନ୍ନ ଭ୍ୟାକ୍ସିନ ଡୋଜ୍ ନେଇପାରିବା କି?

ଭାରତରେ ବର୍ତ୍ତମାନ ସମୟରେ କୋଭାକ୍ସିନ୍ ଓ କୋଭିସିଲ୍ଡ ଭଳି ଦୁଇଟି ଟିକା ଦିଆଯାଉଛି । ଏ ଦୁଇଟିର କାର୍ଯ୍ୟପ୍ରଣାଳୀ ଭିନ୍ନ ହୋଇଥିବା ବେଳେ ଏହାର ପ୍ରଭାବ ମଧ୍ୟ ଭିନ୍ନ । ଯାହା ଫଳରେ ଦୁଇଟି ଟିକା ଅଲଗା ହେଲେ ସମ୍ପୃକ୍ତ ବ୍ୟକ୍ତିକୁ ବୁଷ୍ଟର ଡୋଜ୍ ମିଳି ପାରିବ ନାହିଁ ।