ଦିନ ୨ଟାରୁ ସକାଳ ୫ଟା ଯାଏ ସହରାଞ୍ଚଳରେ ବନ୍ଦ ରହିବ ବଜାର

ବ୍ରହ୍ମପୁର: ବଢ଼ୁଥିବା କୋଭିଡ୍ ସଂକ୍ରମଣକୁ ଦେଖି ଗଞ୍ଜାମ ବ୍ୟବସାୟୀ ସଂଘ ନେଇଥିବା ନିଷ୍ପତ୍ତିକୁ ଜିଲ୍ଲାପାଳ ସ୍ୱାଗତ କରିଛନ୍ତି । ଜିଲ୍ଲାର ବ୍ୟବସାୟୀ ସଂଘ ଓ ବୁଲା ବିକାଳି ସଂଘ ସହରାଞ୍ଚଳରେ ଦିନ ୨ଟାରୁ ସକାଳ ୫ଟା ଯାଏ ଦୋକାନ ବନ୍ଦ ରଖିବାକୁ ନିଷ୍ପତ୍ତି ନେଇଛନ୍ତି । ସଂଘର ଏଭଳି ନିଷ୍ପତ୍ତିକୁ ଟ୍ୱିଟ୍ କରି ପ୍ରଶଂସା କରିଛନ୍ତି ଗଞ୍ଜାମ ଜିଲ୍ଲାପାଳ ।

https://twitter.com/Ganjam_Admin/status/1387237330633728000

ଆଜିଠାରୁ ମେ ୯ ତାରିଖ ଯାଏ ଜିଲ୍ଲାର ସମସ୍ତ ସହରାଞ୍ଚଳରେ ଏହି ନିଷ୍ପତ୍ତି କାର୍ଯ୍ୟକାରୀ ହେବ । ଗଞ୍ଜାମ ଜିଲ୍ଲା ବ୍ୟବସାୟୀ ସଂଘର ଏଭଳି ପଦକ୍ଷେପକୁ ଜିଲ୍ଲାବାସୀ ସହଯୋଗ କରିବାକୁ ଜିଲ୍ଲାପାଳ ଆହ୍ୱାନ୍ ଦେଇଛନ୍ତି । ସମସ୍ତେ ଏକାଠି ମିଳିମିଶି କରୋନା ବିରୋଧରେ ଲଢ଼ିଲେ ଆମେ ଜିତି ପାରିବା ।

ଗଞ୍ଜାମ ଜିଲ୍ଲାରେ ଏବେ ଯାଏ କରୋନାରେ ୨୪ ହଜାର ୪୯ ଜଣ ଆକ୍ରାନ୍ତ ହୋଇଥିବା ବେଳେ ୨୫୮ ଜଣଙ୍କ ମୃତ୍ୟୁ ହୋଇଛି । କରୋନାକୁ ୨୨ ହଜାର ୫୫୧ ଜଣ ମାତ୍ ଦେଇ ସୁସ୍ଥ ହୋଇଛନ୍ତି । ଏବେ ଜିଲ୍ଲାରେ ୧୨୩୨ଟି ସକ୍ରିୟ ସଂକ୍ରମଣ ମାମଲା ରହିଛି ।