ଓଡିଆ ଫିଲ୍ମ ‘ପ୍ରେମୀ ଆୱାରା’ର ଶୁଭ ମହୁରତ

ଭୁବନେଶ୍ୱର: ଆଗାମୀ ଓଲିଉଡ୍ ଫିଲ୍ମ “ପ୍ରେମୀ ଆୱାରା”ର ଶୁଭ ମହୁରତ ଅନୁଷ୍ଠିତ ହୋଇଯାଇଛି। ଭୁବନେଶ୍ୱର ସ୍ଥିତ ଏକ ହୋଟେଲରେ ଏହି ସମାରୋହ ଅନୁଷ୍ଟିତ ହୋଇଯାଇଛି । ଖୁବଶୀଘ୍ର ଏହି ଫିଲ୍ମର ଶୁଟିଂ ଆରମ୍ଭ ହେବ। ଆଲବମ୍ ଜଗତର ସୁପରହିଟ୍ ଯୋଡି ଲୁବୁନ-ଟୁବୁନ୍ ଏହି ଫିଲ୍ମର ନିର୍ଦ୍ଦେଶନା ଭାର ସମ୍ଭାଳିଛନ୍ତି । ଦୁଇ ଚର୍ଚ୍ଚିତ ନିର୍ଦ୍ଦେଶକଙ୍କ ୫ମ ଫିଲ୍ମ ଭାବେ ଏହା ଦର୍ଶକଙ୍କ ସାମ୍ନାକୁ ଆସିବ। ଏଥିରେ ପ୍ରଥମ ଥର ପାଇଁ ଦର୍ଶକ ନୂଆ ଯୋଡ଼ି ଭାବେ ଓମ୍‌କାର ଓ ଅଙ୍କିତାଙ୍କ ଅନସ୍କ୍ରିନ୍ କେମିଷ୍ଟ୍ରି ଦେଖିବାକୁ ପାଇବେ।

ଫିଲ୍ମର ଶୁଭ ମହରୁତ ଅବସରରେ ପ୍ରଯୋଜକ ପ୍ରଭାତୀ ଆଚାର୍ଯ୍ୟ, ନିର୍ଦ୍ଦେଶକ ଲୁବୁନ୍‌-ଟୁବୁନ୍ ଓ ସଙ୍ଗୀତ ନିର୍ଦ୍ଦେଶକ ଅଭିଜିତ୍ ମଜୁମଦାର୍‌ଙ୍କ ସମେତ ଅନ୍ୟ କଳାକାର ପ୍ରମୁଖ ଉପସ୍ଥିତ ଥିଲେ । ନିଛକ ଓଡିଆ କାହାଣୀ ଉପରେ ନିର୍ମିତ ହେବାକୁ ଥିବା ଏହି ଫିଲ୍ମର କାହାଣୀ ଭାର ସମ୍ଭାଳିଛନ୍ତି ଦୁର୍ଗା ଆଚାର୍ଯ୍ୟ । ସେହିଭଳି ଡାଇଲଗ ଦାୟିତ୍ୱ ତୁଲାଇଛନ୍ତି ସଂଜୟ ମହାକୁଳ । ଫିଲ୍ମର କାହାଣୀକୁ ବାଦ୍ ଦେଲେ ଏଥିରେ ରହିଛି ୫ଟି ଜବରଦସ୍ତ ଗୀତ।

ଲଭ, ରୋମାନ୍ସ, ଡ୍ରାମା ଓ ଟ୍ରାଜେଡି ଉପରେ ଆଧାରିତ ଏହି ଫିଲ୍ମରେ ସରୋଜ ଦାସ, ଟନିଆ, ରିସ୍ନା ଓ କାଳିଆଙ୍କ ଭଳି କଳାକାରଙ୍କୁ ଅନ୍ୟ ପ୍ରମୁଖ ଭୂମିକାରେ ଦେଖିବାକୁ ମିଳିବ। ମହୁରତ ଅବସରରେ ଫିଲ୍ମର ଶୁଟିଂ ଆସନ୍ତା ମାର୍ଚ୍ଚ ୧୨ ତାରିଖରୁ ଆରମ୍ଭ ହେବ ବୋଲି କ୍ରିଏଟିଭ ହେଡ୍ ପ୍ରଣୟ ଜେଠୀ ସୂଚନା ଦେଇଛନ୍ତି।