ପୋଖରୀ କଡ଼ ମୁଖ୍ୟ ରାସ୍ତାରେ ବୁଲୁଛନ୍ତି ୪ଟି ଭାଲୁ, ଲୋକେ ଛାନିଆଁ
ନବରଙ୍ଗପୁର: ଦିନବେଳା ଭାଲୁ ଆତଙ୍କ । ଗାଁ ମୁଣ୍ଡ ପୋଖରୀ ରାସ୍ତା କଡ଼ରେ ବୁଲୁଛନ୍ତି ଭାଲୁ । ଗୋଟିଏ କି ୨ଟି ନୁହେଁ ଏକାବେଳେକେ ଚାରି ଚାରୋଟି ଭାଲୁ ଦେଖିବାକୁ ମିଳିଛି । ନନ୍ଦାହାଣ୍ଡି ମୁଖ୍ୟ ରାସ୍ତା କଡ଼ରେ ଭାଲୁ ବୁଲୁଛନ୍ତି । ଯାହାକୁ ନେଇ ସ୍ଥାନୀୟ ବାସୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ଗତବର୍ଷ ଗାଁ ପାଖ ନ୍ଧିଗୁଡା ଜଙ୍ଗଲରେ ଭାଲୁ ଆକ୍ରଣରେ ଜଣଙ୍କର ମୃତ୍ୟୁ ମଧ୍ୟ ହୋଇଥିଲା ।
ଭାଲୁ କେତେବେଳେ ଭାଲୁ ଖାଦ୍ୟ ଅନ୍ୱେଷଣରେ ଗାଁ ମୁହାଁ ହେଉଛନ୍ତି ତ ଆଉ କେବେ ରାସ୍ତା ଉପରେ ବୁଲୁଛନ୍ତି । ଅନ୍ୟପଚେ ସଦର ବ୍ଲକର ଦେଉଳା ଗାଁର ପରିତ୍ୟକ୍ତ କୂଅରେ ପଡ଼ିଥିବା ଭାଲୁକୁ ୧୦ ଘଣ୍ଟାର ଅପରେସନ୍ ପରେ ଉଦ୍ଧାର କରାଯାଇଛି । ବାରମ୍ବାର ବନ୍ୟଜନ୍ତୁ ଗାଁ ମୁହାଁ ହେଉଥିବାରୁ ଲୋକଙ୍କ ମଧ୍ୟରେ ଭୟ ବଢ଼ିଥିବା ବେଳେ ଚିନ୍ତାବ୍ୟକ୍ତ କରିଛନ୍ତି ପରିବେଶବିତ୍ ।
ଏସବୁ ପଛର ମୁଖ୍ୟ କାରଣ ଜଙ୍ଗଲ ଧ୍ୱଂସ ଓ ଜଙ୍ଗଲରେ ଅବାଧ ପଶୁ ଶିକାର ବୋଲି କୁହାଯାଉଛି । ଫଳରେ ଜଙ୍ଗଲି ଜନ୍ତୁ ଖାଦ୍ୟ ଅନ୍ୱେଷଣରେ ଜନବସତି ଆଡ଼କୁ ଚାଲି ଆସୁଛନ୍ତି । ଖାଲି ଭାଲୁ କାହିଁକି ରାଜ୍ୟର ବିଭିନ୍ନ ସ୍ଥାନରେ ହାତୀ ମଧ୍ୟ ଖାଦ୍ୟ ଅନ୍ୱେଷଣରେ ଗାଁକୁ ଚାଲି ଆସୁଛନ୍ତି ।
