ଆଇଆଇସିଙ୍କ ନାଁରେ ସାଂଘାତିକ ଅଭିଯୋଗ, ଜାଲ୍ ଜାତି ପ୍ରମାଣପତ୍ର ଦେଇ ପାଇଛନ୍ତି ପଦୋନ୍ନତି
1 min read
ସମ୍ବଲପୁର: ପୂର୍ବରୁ ଜାଲ୍ ଜାତିଗତ ପ୍ରମାଣପତ୍ର ଦେଇ ଅନେକ ଶିକ୍ଷକ ଚାକିରି କରିଥିବା ଓ ପରେ ଗିରଫ ହୋଇଥିବା ନଜିର୍ ରହିଛି । ଏବେ ସେହିଭଳି ଏକ ଗୁରୁତର ଅଭିଯୋଗ ଆସିଛି ପୋଲିସ ବାବୁଙ୍କ ବିରୋଧରେ । ନିକଟରେ ପ୍ରମୋସନ ପାଇଥିବା ଜଣେ DSPଙ୍କ ନାଁରେ ଆସିଛି ଜାଲ୍ ଜାତିଗତ ପ୍ରମାଣପତ୍ର ଅଭିଯୋଗ । ସମ୍ବଲପୁର ଟାଉନ ଥାନା ଆଇଆଇସି ରମେଶ ଦୋରାଙ୍କ ନାଁରେ ଏହି ଅଭିଯୋଗ ଆସିଛି ।
ରମେଶଙ୍କ ମୂଳ ଜାତି ତେଲେଙ୍ଗା, ଯାହାକି OBC/SEBCରେ ଆସୁଛି । ହେଲେ ରମେଶ ଦୋରା ଚାକିରି ସମୟରେ ଦାଖଲ କରିଥିବା ଜାତିଗତ ସାର୍ଟିଫିକେଟରେ ନିଜକୁ କଣ୍ଡ ବୋଲି ଦର୍ଶାଇଛନ୍ତି । ଯାହାକି ତଫସିଲ ଭୁକ୍ତ ଜନଜାତି ବା ଏସ୍ଟି(ST) । ସମ୍ବଲପୁର ଟାଉନ ଥାନା ଅଧିକାରୀ ରମେଶ ଦୋରା କିଛି ଦିନ ତଳେ DSP ପାହ୍ୟାକୁ ପ୍ରମୋସନ ପାଇଛନ୍ତି ।
ତେବେ ତାଙ୍କୁ ଅନ୍ୟ ସ୍ଥାନରେ ପୋଷ୍ଟିଙ୍ଗ୍ ଦିଆଯାଇ ନଥିବାରୁ ସେ ପୂର୍ବଭଳି ସମ୍ବଲପୁର ଟାଉନ ଥାନାର IIC ଦାୟିତ୍ୱରେ ଅଛନ୍ତି । ଏହି ଅଭିଯୋଗର ତଦନ୍ତ ପାଇଁ ସଦର ଏସ୍ଡିପିଓଙ୍କୁ ଦାୟିତ୍ୱ ଦିଆଯାଇଥିବା ସମ୍ବଲପୁର ଏସ୍ପି କହିଛନ୍ତି ।
