ବହୁମତ ପରୀକ୍ଷା ପୂର୍ବରୁ ଖସୁଛି ସଂଖ୍ୟା, ହାତ ଛାଡ଼ିଲେ ଆଉ ୨ ବିଧାୟକ

ପୁଡୁଚେରୀ: ଫ୍ଲୋର ଟେଷ୍ଟ ପୂର୍ବରୁ ଫେଲ୍ ! ପୁଡୁଚେରୀର ଭି. ନାରାୟାଣସାମୀ ସରକାର ଲାଗି ସଂଙ୍କଟ ବଢ଼ିବାରେ ଲାଗିଛି । ୨ ବିଧାୟକ ଇସ୍ତଫା ଦେଇଛନ୍ତି । କଂଗ୍ରେସ ବିଧାୟକ କେ. ଲକ୍ଷ୍ମୀନାରାୟଣ ଓ ଡିଏମକେ ବିଧାୟକ ଭେଙ୍କଟେସନଙ୍କ ଇସ୍ତଫା ପରେ ଶାସକ ଦଳର ସଦସ୍ୟଙ୍କ ସଂଖ୍ୟା ୧୧କୁ ଖସି ଆସିଛି । ବିରୋଧୀଙ୍କ ପାଖରେ ୧୪ ଜଣ ବିଧାୟକ ରହିଛନ୍ତି । ଗୃହର ମୋଟ ସଦସ୍ୟ ସଂଖ୍ୟା ୩୩ ଥିବାବେଳେ ୭ଟି ଆସନ ଖାଲି ରହିଛି ।

Puducherry: Congres MLAs arrive at the residence of Chief Minister V Narayanasamy.

The LG has ordered a floor test in the legislative assembly to take place tomorrow. pic.twitter.com/pZ8fvgApAO

— ANI (@ANI) February 21, 2021

ଲକ୍ଷ୍ମୀନାରାୟଣ ଓ ଭେଙ୍କଟେସନ ଅଲଗା ଅଲଗା ଭାବେ ବାଚସ୍ପତି ଭି.ପି. ସିବାକୋଲୁନ୍ଧୁଙ୍କୁ ଇସ୍ତଫା ପତ୍ର ଦେଇଛନ୍ତି । ଇସ୍ତଫା ପରେ ସରକାର ସଂଖ୍ୟା ଗରିଷ୍ଠତା ହରାଇଥିବା ଗଣମାଧ୍ୟମରେ ପ୍ରତିକ୍ରିୟା ରଖିଛନ୍ତି ଲକ୍ଷ୍ମୀନାରାୟଣ । ବିଧାୟକ ପଦ ସହ କଂଗ୍ରେସ ଦଳରୁ ସେ ଇସ୍ତଫା ଦେଇଥିବା କହିଛନ୍ତି । ଅନ୍ୟପକ୍ଷେ ଭେଙ୍କଟେସନ କେବଳ ବିଧାୟକ ପଦରୁ ଇସ୍ତଫା ଦେଇଛନ୍ତି, ଡିଏମକେ ସହ ଅଛନ୍ତି ବୋଲି କହିଛନ୍ତି ।

ପୂର୍ବତନ ମନ୍ତ୍ରୀ ଏ. ନମାସିଭ୍ୟାମଙ୍କ ସହ ମଲ୍ଲାଡି କ୍ରିଷ୍ଣା ଆଦି ୪ ଜଣ କଂଗ୍ରେସ ଛାଡ଼ିଥିଲେ । ଅନ୍ୟ ଜଣେ ବିଧାୟକ ଅଯୋଗ୍ୟ ଘୋଷିତ ହୋଇଥିଲେ । ନାରାୟଣସାମୀଙ୍କ ବିଶ୍ୱସ୍ତ ଏ. ଜହ୍ନ କୁମାର ଇସ୍ତଫା ଦେଇଥିଲେ ।

ପୁଡୁଚେରି ରାଜ୍ୟପାଳ ତାମିଲସାଇ ସୁନ୍ଦରାଜନ ଫେବ୍ରୁଆରୀ ୨୨ ସନ୍ଧ୍ୟା ୫ଟା ସୁଦ୍ଧା ଗୃହରେ ବହୁମତ ସାବ୍ୟସ୍ତ ପାଇଁ ନାରାୟଣସାମୀଙ୍କୁ ନିର୍ଦ୍ଦେଶ ଦେଇଥିଲେ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ କଂଗ୍ରେସ ବିଧାୟକ ଦଳ ବୈଠକ କରୁଥିବା ବେଳେ ୨ ବିଧାୟକଙ୍କ ଇସ୍ତଫା ନାରାୟଣସାମୀ ସରକାରକୁ ଆହୁରି ସଙ୍କଟ ମଧ୍ୟକୁ ଟାଣି ନେଇଛି ।