୭ ଦିନ ପାଇଁ ୪ ଜିଲ୍ଲାରେ ଲକଡାଉନ୍, କାଲିଠାରୁ ହେବ ଲାଗୁ
ମୁମ୍ବାଇ: ମହାରାଷ୍ଟ୍ରରେ ବଢ଼ୁଥିବା କୋଭିଡ୍ ସଂକ୍ରମଣକୁ ଦେଖି ପୁଣି ଲକଡାଉନ୍ ଲାଗୁ ହୋଇଛି । ସପ୍ତାହକ ଲାଗି ମହାରାଷ୍ଟ୍ରର ଅମରାବତୀରେ ଲକଡାଉନ୍ ଲାଗୁ କରାଯାଇଛି । ଫେବ୍ରୁଆରୀ ୨୮ ତାରିଖ ରାତି ୮ଟା ଯାଏ ଲକଡାଉନ୍ କଟକଣା ବଳବତ୍ତର ରହିବ । ଅମରାବତୀ ଉପଖଣ୍ଡର ୪ ଜିଲ୍ଲାରେ ଲକଡାଉନ୍ ନେଇ ମହାରାଷ୍ଟ୍ର ମନ୍ତ୍ରୀ ୟଶୋମତି ଠାକୁର ସୂଚନା ଦେଇଛନ୍ତି ।
ଅମରାବତୀ ଉପଖଣ୍ଡରେ ୪ ଜିଲ୍ଲା ରହିଛି । ଗତ ସେପ୍ଟେମ୍ବର ମଧ୍ୟ ଭାଗରେ ଲାଗିଥିବା କଟକଣା ଭଳି ଲକଡାଉନ୍ ସମୟରେ ୪ ଜିଲ୍ଲାରେ ପ୍ରତବିନ୍ଧକ ଲାଗିବ । ସଂକ୍ରମଣକୁ ରୋକିବା ପାଇଁ ଫେବ୍ରୁଆରୀ ୨୨ ଆସନ୍ତାକାଲି ସୋମବାର ଠାରୁ ଲକଡାଉନ୍ ଲାଗୁ ହେବ । ଏହି ସମୟରେ କେବଳ ଅତ୍ୟାବଶ୍ୟକୀୟ ସେବାକୁ ଅନୁମତି ମିଳିବ ।
ଅନ୍ୟପଟେ ପୁନେରେ ଫେବ୍ରୁଆରୀ ୨୮ ତାରିଖ ଯାଏ ରାତ୍ରୀକାଳୀନ କର୍ଫ୍ୟୁ ଲାଗୁ ହୋଇଛି । ରାତି ୧୧ଟାରୁ ସକାଳ ୬ଟା ଯାଏ ସାଧାରଣ ଲୋକଙ୍କ ଚଳାଚଳକୁ ନିଷିଦ୍ଧ କରାଯାଇଛି । ଏହି ସମୟରେ କେବଳ ଅତ୍ୟାବଶ୍ୟକୀୟ ସେବା ଜାରି ରହିବ । ଫେବ୍ରୁଆରୀ ୨୮ ତାରିଖ ଯାଏ ସ୍କୁଲ୍ ଓ କଲେଜ ବନ୍ଦ ରଖିବାକୁ ପୁନେ ଡିଭିଜନାଲ କମିଶନର ନିର୍ଦ୍ଦେଶ ଦେଇଛନ୍ତି । ଏହି ନିର୍ଦ୍ଦେଶନାମା ଆସନ୍ତାକାଲି ଠାରୁ ଲାଗୁ ହେବ ।
