ଶସ୍ତା ହେବ ପେଟ୍ରୋଲ, ଡିଜେଲ ଓ ମଦ; ଘୋଷଣା କଲା ଏହି ରାଜ୍ୟ
ଗୁଆହାଟି: ମହଙ୍ଗା ମାଡ଼ରୁ ଆଂଶିକ ମୁକ୍ତି ପ୍ରାଇଁ ଆସାମ ସରକାରଙ୍କ ନିଷ୍ପତ୍ତି । କୋଭିଡ୍ ସମୟରେ ଆସାମ ସରକାର ପେଟ୍ରୋଲ ଓ ଡିଜେଲ୍ ଲିଟର ପିଛା ଅତିରିକ୍ତ ୫ ଟଙ୍କା ଓ ମଦରେ ଅତିରିକ୍ତ ୨୫ ପ୍ରତିଶତ ଅବକାରୀ ଶୁଳ୍କ ଲଗାଇଥିଲେ । ଏହାକୁ ପ୍ରତ୍ୟାହାର କରିନେବା ଲାଗି ଆସାମ ସରକାରଙ୍କ ଅର୍ଥମନ୍ତ୍ରୀ ହିମାନ୍ତ ବିଶ୍ୱ ଶର୍ମା ଘୋଷଣା କରିଛନ୍ତି । ବିଧାନସଭା ନିର୍ବାଚନ ପୂର୍ବରୁ ଆସାମ ସରକାର ଏଭଳି ନିଷ୍ପତ୍ତି ନେଇଛନ୍ତି ।
ମହାମାରୀ କୋଭିଡ୍ ପାଇଁ ସରକାର ପେଟ୍ରୋଲ, ଡିଜେଲ୍ ସହ ମଦ ଉପରେ ଅତିରିକ୍ତ କର ବସାଇଥିଲେ । ମହାମାରୀ ସ୍ଥିତିରେ ସୁଧାର ଆସିଥିବାରୁ ଉକ୍ତ ଅତିରିକ୍ତ କର ଲାଗୁ ରଖିବା ନୈତିକତା ନୁହେଁ ବୋଲି ଅର୍ଥମନ୍ତ୍ରୀ କହିଛନ୍ତି ।
ଦେଶରେ ଗୁଜରାଟରେ ପେଟ୍ରୋଲ୍ ଦାମ ସବୁଠୁ କମ୍ ରହିଛି । ଅତିରିକ୍ତ କର ପ୍ରତ୍ୟାହାର ପରେ ଦେଶରେ ଦ୍ୱିତୀୟ ରାଜ୍ୟ ଭାବେ ଆସାମରେ ପେଟ୍ରୋଲ ଦର କମ ରହିବ । ଅତିରିକ୍ତ କର ପ୍ରତ୍ୟାହାର ପରେ ମାସିକ ୮୦ କୋଟି ଟଙ୍କା ରାଜସ୍ୱ ହ୍ରାସ ଘଟିବ ବୋଲି ସେ ସୂଚନା ଦେଇଛନ୍ତି ।
ଆସାମରେ ଏବେ ପେଟ୍ରୋଲ ଦର ଲିଟର ପିଛା ୯୦ ଟଙ୍କା ୪୧ ପଇସା ଥିବାବେଳେ ଡିଜେଲ୍ ଦର ଲିଟର ପିଛା ୮୪ ଟଙ୍କା ୨୯ ପଇସା ରହିଛି । ଅତିରିକ୍ତ କର ହ୍ରାସ ପରେ ଆସାମରେ ପେଟ୍ରୋଲ ଲିଟର ପିଛା ଦର ୮୫ ଟଙ୍କା ୪୧ ପଇସା ଏବଂ ଡିଜେଲର ଲିଟର ପିଛା ଦର ୭୯ ଟଙ୍କା ୨୯ ପଇସାକୁ ଖସି ଆସିବ ।
