୧୦ ଦିନ, ୧୪ ଘଣ୍ଟା ଓ ୩ଟି ଭିଡିଓ ପରେ ବି ପୋଲିସ ହାତ ଖାଲି

ନୂଆଦିଲ୍ଲୀ: ଗଣତନ୍ତ୍ର ଦିବସରେ ଲାଲାକିଲ୍ଲାରେ ହୋଇଥିବା ହିଂସା ମାମଲାର ମୁଖ୍ୟ ଅଭିଯୁକ୍ତ ଅଭିନେତା ଦୀପ ସିଦ୍ଧୁ ଘଟଣାର ୧୦ ଦିନ ୧୪ ଘଣ୍ଟା ଏବଂ ୩ ଭିଡିଓ ପରେ ବି ଧରାପଡ଼ିନାହାନ୍ତି । ଦିଲ୍ଲୀ ପୋଲିସ ପକ୍ଷରୁ ଆଉଟଲୁକ୍ ନୋଟିସ ଜାରି କରାଯିବା ସହ ତାଙ୍କ ନାଁରେ ପୁରସ୍କାର ଘୋଷଣା କରିଛନ୍ତି । ଏହା ସତ୍ତ୍ୱେ ଦୀପ ସିଦ୍ଧୁର ପତ୍ତା ମିଳୁନାହିଁ । ସଂସଦରୁ ନେଇ ବିଭିନ୍ନ ଧାରଣା ସ୍ଥଳରେ ସିଦ୍ଧୁକୁ ଗିରଫ କରିବା ନେଇ ଦାବି ହେଉଛି । ରାଜ୍ୟସଭାରେ ଶିବସେନା ସାଂସଦ ସଞ୍ଜୟ ରାଉତ ଦୀପ ସିଦ୍ଧୁକୁ ଏଯାଏଁ ଗିରଫ କରାନଯିବାକୁ ନେଇ ପ୍ରଶ୍ନ କରିଛନ୍ତି । ରାଉତ ପଚାରିଛନ୍ତି ଯେ, ଦୀପ ସିଦ୍ଧୁ କିଏ ଏବଂ ଏଯାଏଁ ତାକୁ କାହିଁକି ଗିରଫ କରାଯାଇନାହିଁ ।

ସୋସିଆଲ ମିଡିଆରେ ଆକ୍ଟିଭ ଅଛନ୍ତି ଦୀପ ସିଦ୍ଧୁ

ପୋଲିସ ପହଞ୍ଚରୁ ବାହାରେ ଥିବା ଦୀପ ସିଦ୍ଧୁ ସୋସିଆଲ ମିଡିଆରେ ବହୁତ ଆକ୍ଟିଭ ଅଛନ୍ତି । ସିଦ୍ଧୁ ସୋସିଆଲ ମିଡିଆ ପ୍ରଥମେ ଭିଡିଓ ଜାରି କରିବା ସହ ସେ ନିର୍ଦ୍ଦୋଶ ବୋଲି ସଫେଇ ଦେଇଥିଲେ । ଦୀପ ସିଦ୍ଧୁ ନିଜ ଭିଡିଓରେ କହିଥିଲେ ମୁଁ ପଞ୍ଜାବ ଏବଂ ଏଠାକାର ଲୋକଙ୍କ କଥା ଉଠାଇଥିଲି କିନ୍ତୁ ମୋତେ ଦ୍ରୋହୀ ଭାବେ ଅବତାରଣା କରାଯାଉଛି । ଏହା ସିଦ୍ଧୁ ୨ ଫେବ୍ରୁଆରୀରେ ମଧ୍ୟ ଭିଡିଓ ଜାରି କରିଥିଲେ । ଦୀପ ସିଦ୍ଧୁ ୩ ତାରିଖରେ ଜାରି ଭିଡିଓରେ କହିଥିଲେ ଆମେ ମିଛ ଆଧାରରେ ଲଢ଼େଇ କରିବୁନାହିଁ । ସତ୍ୟକୁ ଗ୍ରହଣ କରିବା ଆରମ୍ଭ କରିଦିଅ ବୋଲି କହିଥିଲେ  ଦୀପୁ ।