ବିବାହ ଓ ଅନ୍ତ୍ୟେଷ୍ଟି କ୍ରିୟାରେ ସର୍ବାଧିକ ୫୦୦ ଲୋକଙ୍କୁ ସାମିଲ୍ ଅନୁମତି
ଭୁବନେଶ୍ୱର: ଫେବ୍ରୁଆରୀ ମାସ ଲାଗି କରୋନା ଗାଇଡଲାଇନ୍ ଜାରି କରିଛନ୍ତି ରାଜ୍ୟ ସରକାର । କଣ୍ଟେନମେଣ୍ଟ ଜୋନ୍ ବାହାରେ ସମସ୍ତ କାର୍ଯ୍ୟକୁ ଅନୁମତି ଦିଆଯାଇଛି । ସ୍ଥିତି ଦେଖି କଣ୍ଟେନମେଣ୍ଟ ଜୋନ୍ ସ୍ଥିର କରିବ ଜିଲ୍ଲା ପ୍ରଶାସନ । ସାମାଜିକ, ସାଂସ୍କୃତିକ, ରାଜନୀତିକ, ଖେଳ, ଶୈକ୍ଷିକ କାର୍ଯ୍ୟକ୍ରମରେ ସର୍ବାଧିକ ୫୦୦ ଲୋକ ସାମିଲ୍ ହୋଇପାରିବ । କାର୍ଯ୍ୟକ୍ରମ ହେଉଥିବା ହଲ କ୍ଷମତାର ୫୦ ପ୍ରତିଶତ ଲୋକଙ୍କୁ ସାମିଲ୍ ଲାଗି ଅନୁମତି । ସାମାଜିକ ଦୂରତା ରକ୍ଷା, ଥର୍ମାଲ୍ ସ୍କାନିଂ, ହ୍ୟାଣ୍ଡ ୱାଶିଂକୁ ଗୁରୁତ୍ୱ । ଉପରୋକ୍ତ କାର୍ଯ୍ୟକ୍ରମ ପାଇଁ ନେବାକୁ ପଡ଼ିବ ଜିଲ୍ଲା ପ୍ରଶାସନର ଅନୁମତି ।
ବିବାହ ଓ ଅନ୍ତ୍ୟେଷ୍ଟି କ୍ରିୟାରେ ସାମିଲ୍ ହୋଇପାରିବେ ସର୍ବାଧିକ ୫୦୦ ଲୋକ । ଆବଦ୍ଧ କୋଠରୀର କ୍ଷମତାର ୫୦ ପ୍ରତିଶତ ଲୋକରେ ହେବ ବିବାହ ଉତ୍ସବ । ସାମାଜିକ ଦୂରତା, ସାନିଟାଇଜର ବ୍ୟବହାର କରାଯିବ । ବାଣିଜ୍ୟିକ ମେଳାରେ କ୍ଷମତାର ୫୦ ପ୍ରତିଶତ ଲୋକ କୋଭିଡ୍ ପ୍ରୋଟୋକଲ୍ସ ମାନି ଯିବାକୁ ଅନୁମତି । କୋଭିଡ୍ ଗାଇଡଲାଇନ୍ ମାନି ବିଦ୍ୟାଳୟ ଓ କଲେଜରେ ପାଠପଢ଼ା ହେବ । ଉଭୟ ଅନଲାଇନ୍ ଏବଂ ଦୂର ଶିକ୍ଷାକୁ ପ୍ରୋତ୍ସାହନ ଦିଆଯିବ ।
ଫେବ୍ରୁଆରୀ ୧ ତାରିଖରୁ ରାଜ୍ୟର ସମସ୍ତ ଅଙ୍ଗନୱାଡ଼ି କେନ୍ଦ୍ର କାର୍ଯ୍ୟକ୍ଷମ କରିବା ନେଇ ଅନୁମତି ଦିଆଯାଇଛି । ଧର୍ମାନୁଷ୍ଠାନ ଖୋଲିବା ନେଇ ସ୍ଥାନୀୟ ପ୍ରଶାସନ ନିଷ୍ପତ୍ତି ନେବ । ଏସଓପି ଅନୁସାରେ ପ୍ରେକ୍ଷାଳୟ ଚାଲିବ । ମୁକ୍ତାକାଶ ରଙ୍ଗମଞ୍ଚ, ଯାତ୍ରା ଆଦି ନେଇ ସ୍ଥାନୀୟ କର୍ତ୍ତୃପକ୍ଷ ଅନୁମତି ଦେବେ । ସବୁଠି କୋଭିଡ୍ ଗାଇଡଲାଇନ୍ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି ।
