ବୋମାମାଡ଼ କରି ଲୋକଙ୍କୁ ଘର ବାହାରକୁ ଆଣିଲେ, ସୁନା ଗହଣା ସହ ଟଙ୍କା ଲୁଟିନେଲେ
କଟକ: ଲୁଟପାଟ କରିବାର ପୂର୍ବରୁ ବୋମାମାଡ଼। ବିଳମ୍ବିତ ରାତିରେ ଘର ଆଗରେ କଲେ ବୋମାମାଡ଼। ଘଟଣା ଘଟିଛି କଟକ ଜିଲ୍ଲା କାନପୁର ଥାନା ହରିପୁର ଗାଁରେ। ତେବେ ବୋମାମାଡ଼ରୁ ଅଳ୍ପକେ ବର୍ତ୍ତିଯାଇଛନ୍ତି ପରିବାର ଲୋକେ। ଥାନାରେ ଏତଲା ପରେ ବୋମାମାଡ଼ ସନ୍ଦେହରେ ୨ଜଣଙ୍କୁ ଅଟକ ରଖିଛି ପୋଲିସ।
ସୂଚନା ଅନୁଯାୟୀ, ଗତ କାଲି ହରିପୁର ଗାଁର ଅମୀୟ ପଣ୍ଡାଙ୍କ ପରିବାର ଏକ ଦଶାହ କାର୍ଯ୍ୟରେ ଯୋଗ ଦେଇ ବିଳମ୍ବିତ ରାତ୍ରିରେ ଘରକୁ ଫେରିଥିଲେ। ଘର ବାହାରେ କିଛି ଶବ୍ଦ ଶୁଣି ଅମୀୟ ବାହାରକୁ ଆସିବା ମାତ୍ରେ ତାଙ୍କ ଗାଁର ୮ ରୁ ୧୦ ଜଣ ବ୍ୟକ୍ତି ତାଙ୍କ ମୁଣ୍ଡରେ ବନ୍ଧୁକ ଲଗାଇ ଟଙ୍କା ସୁନା ଗହଣା ଯାହା ଅଛି ଦିଅ ବୋଲି କହିଥିଲେ। ଏହି ସମୟରେ ଅମୀୟ ପାଟି କରିବାରୁ ପରିବାର ଲୋକେ ବାହାରକୁ ଚାଲିଆସିଥିଲେ। ଲୁଟେରା ସମସ୍ତଙ୍କଠାରୁ ସୁନା ଗହଣା ଲୁଟିନେଇଥିବା ଥାନାରେ ଏତଲା ହୋଇଛି। କାନପୁର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରିବା ସହ ଦୁଇ ଜଣକୁ ଅଟକ ରଖି ପଚରା ଉଚରା କରୁଛି।
