କୋଭିଡ୍-୧୯ ଟିକା ନେଲା ପରେ ମଦ ପିଇଲେ କ’ଣ ହେବ ?

ନୂଆଦିଲ୍ଲୀ:  କୋଭିଡ୍ ୧୯ ଟିକା ନେଲା ପରେ ମଦ ପିଇଲେ କ’ଣ ହେବ ? ମଦ୍ୟପାନରେ ଅଭ୍ୟସ୍ତ ବ୍ୟକ୍ତି ଟିକା ନେଲା ପରେ ମଦ ପିଇବା ଦ୍ୱାରା ଟିକାର ପ୍ରଭାବ କମିବ କି ? ଏହି ସବୁ ପ୍ରଶ୍ନ ନିଶ୍ଚିତ ଭାବେ ଆପଣଙ୍କ ମନରେ ଉଠୁଥିବ । କେବଳ ଆପଣ ନୁହଁନ୍ତି ବାକି ବିଶ୍ୱରେ ମଧ୍ୟ ମଦ୍ୟପଙ୍କ ପାଇଁ ଏହା ମିଲିୟନ ଡଲାରର ପ୍ରଶ୍ନ ହୋଇସାରିଲାଣି । ଋଷରେ ତ’ ଟିକା ନେବା ପରେ ୪୨ ଦିନ ପାଇଁ ମଦ ନପିଇବା ପାଇଁ ଉପ ପ୍ରଧାନମନ୍ତ୍ରୀଙ୍କ ଆହ୍ୱାନକୁ ବିରୋଧ କରାଗଲାଣି । ତେବେ ଟିକା ନେବା ପରେ ମଦ ପିଇବା ଦ୍ୱାରା କ’ଣ ଟିକାର ପ୍ରଭାବ କମିଯିବ ?

ଋଷିଆ ଏବଂ ୟୁନାଇଟେଡ୍ କିଙ୍ଗ୍‌ଡମ୍‌ ଭଳି କିଛି ଦେଶରେ କରୋନା ଭୂତାଣୁ ବିରୋଧରେ ଟିକାକରଣ ପ୍ରକ୍ରିୟା ଆରମ୍ଭ ହୋଇ ସାରିଛି । ଏଭଳି ସ୍ଥିତିରେ ସରକାରଙ୍କ ତରଫରୁ ଦେଶବାସୀଙ୍କୁ ଖୁବ ସଚେତନ କରାଯାଉଛି । କିନ୍ତୁ କୋଭିଡ-୧୯ ସମୟରେ ମଦ୍ୟପାନ ନକରିବା ପାଇଁ ଋଷ୍ର ଉପ-ପ୍ରଧାନମନ୍ତ୍ରୀ ତାତ୍ୟାନା ଗୋଲିକୋବା ନାଗରିକଙ୍କୁ ଚେତାବନୀ ଦେଇଛନ୍ତି । ଋଷରେ ଭ୍ୟାକସିନ ସ୍ପୁଟନିକ-ଭି ଟିକା ଅଭିଯାନରେ କୌଣସି ବ୍ୟକ୍ତିକୁ ଦୁଇଟି ଇଞ୍ଜେକ୍ସନ ଦେବାପାଇଁ ୪୨ ଦିନ ସମୟ ଲାଗୁଛି । ତେଣୁ ଏହି ୪୨ ଦିନ ମଧ୍ୟରେ ଯେପରି ଉକ୍ତ ବ୍ୟକ୍ତି ମଦ୍ୟପାନ ନକରନ୍ତି ତାହାକୁ ନେଇ ସଚେତନ କରାଯାଇଛି ।

କିନ୍ତୁ ଏହାକୁ ନେଇ ବିରୋଧ କରିବା ଆରମ୍ଭ ହୋଇ ସାରିଛି । ସ୍ପୁଟନିକ ଭ୍ୟାକସିନ ଡେଭଲପର ଡାକ୍ତର ଆଲେକଜାଣ୍ଡର ବିଣ୍ଟସବର୍ଗ ଟ୍ୱିଟ କରି ଯେଉଁ ବୟାନ ଦେଇଛନ୍ତି ତାହା ବିବାଦ ସୃଷ୍ଟି କରିଛି । ଏକ ଗ୍ଲାସ ସ୍ୟାମ୍ପେନ ପିଇବାରେ କୌଣସି କ୍ଷତି ପହଞ୍ଚିବ ନାହିଁ ବୋଲି ସେ ଟ୍ୱିଟର ମାଧ୍ୟମରେ ଜଣାଇଛନ୍ତି । ଏଭଳି ବୟାନରେ ଖପା ହୋଇ ଯାଇଛନ୍ତି ଋଷ୍ର କଂଜ୍ୟୁମର ସେଫ୍ଟୀ ବ୍ରାଂଚ ମୁଖ୍ୟ ତଥା ଡେପୁଟି ପିଏମ । ଏହାକୁ ନେଇ ହଙ୍ଗାମା ଆରମ୍ଭ ହୋଇଯାଇଛି ।

ହଙ୍ଗମା ଆରମ୍ଭ ହେବାରୁ ଡାକ୍ତର ବିଣ୍ଟସବର୍ଗ ମୁହଁ ଖୋଲିଛନ୍ତି । ଭ୍ୟାକସିନର ଦୁଇ ଇଞ୍ଜେକ୍ସନ ଦିଆଯିବାର ତିନି ଦିନ ପୂର୍ବରୁ ଏବଂ ତିନି ଦିନ ପରେ ଆଲକହଲ ନେବାରୁ ବଞ୍ଚିତ ହେବା ଉଚିତ୍ ବୋଲି ସେ କହିଛନ୍ତି। ଏହା ସହିତ ଏହାକୁ ନେଇ କୌଣସି ପ୍ରକାରର ଦ୍ୱନ୍ଦ ନରହିବା ଉଚିତ୍ ବୋଲି ସେ ବୟାନରେ ଉଲ୍ଲେଖ କରିଛନ୍ତି । ୟୁକେରେ ଫାଇଜର କମ୍ପାନୀର ଭ୍ୟାକସିନ ଲୋକଙ୍କୁ ଦେବାର କାର୍ଯ୍ୟକ୍ରମ ଆରମ୍ଭ ହୋଇ ସାରିଛି । ଯଦି ଖବରକୁ ନଜର ପକାଇବା ତେବେ ଭ୍ୟାକସିନ ନେବା ସମୟରେ ମଦ୍ୟପାନରୁ ବଞ୍ଚିତ ହେବା କଥାକୁ ନେଇ ଡେଭଲପରଙ୍କ ପକ୍ଷରୁ କୌଣସି ସୂଚନା ମିଳିନାହିଁ । ରିପୋର୍ଟ କହୁଛି ଅକ୍ସଫୋର୍ଡ଼ ୟୁନିଭର୍ସିଟି ଏବଂ ଆଷ୍ଟ୍ରୋଜେନେକା ଯେଉଁ ଭ୍ୟାକସିନ ଡେଭଲପ କରିଛନ୍ତି, ତାହା ସହିତ ଜଡ଼ିତ ବିଶେଷଜ୍ଞ କହିଛନ୍ତିଯେ, ଭ୍ୟାକ୍ସିନେସନ ସମୟରେ ମଦ୍ୟପାନ ନକରିବାକୁ ନେଇ କୌଣସି ନିର୍ଦ୍ଦେଶ ଦିଆଯାଇନାହିଁ ।

ତେବେ କ’ଣ ଭ୍ୟାକ୍ସନେସନ ସମୟରେ ମଦ୍ୟପାନ କରିବା ଦ୍ୱାରା କୌଣସି ପ୍ରଭାବ ପଡ଼ିବ ନାହିଁ ?

ରିସର୍ଚ କହୁଛି ମଦ୍ୟପାନ କରୁଥିବା ବ୍ୟକ୍ତିଙ୍କର ରୋଗ ପ୍ରତିରୋଧକ ଶକ୍ତି ଅନ୍ୟ ମାନଙ୍କ ଅପେକ୍ଷା କମ୍ ଥାଏ । ସ୍ୱିଡେନରେ ୨୦୧୨ରେ ହୋଇଥିବା ଏକ ଗବେଷଣାରେ କୁହାଯାଇଛିଯେ, ୩୦ ମିଲିଲିଟର ଆଲକହଲ ନେବାଦ୍ୱାରା ଶରୀରକୁ କୌଣସି ପ୍ରକାରର ପ୍ରଭାବ ପଡ଼ିନଥାଏ । କିନ୍ତୁ ନିକଟରେ ସ୍ପୁଟନିକ ଦ୍ୱାରା ହୋଇଥିବା ଟିକାକରଣରେ ଏଭଳି ଏକ ଖବର ସାମ୍ନାକୁ ଆସିଛି ଯାହା ଏହି ତଥ୍ୟ ସହିତ ଜଡ଼ିତ । ଏଥିରୁ ଜଣାପଡ଼ିଛିଯେ ଆଲକହଲ ନେଇଥିବା ୧୦ ପ୍ରତିଶତ ଲୋକଙ୍କ ଉପରେ ଭ୍ୟାକସିନର କୌଣସି ପ୍ରଭାବ ପଡ଼ିନାହିଁ । ତେଣୁ କହିପାରିବାଯେ, ଆଲକହଲ ନେବାଦ୍ୱାରା ରୋଗପ୍ରତିରୋଧକ ଶକ୍ତି ଉପରେ ପ୍ରଭାବ ପଡ଼ିଥାଏ ।

ଋଷରେ ଭ୍ୟାକସିନକୁ ନେଇ ଯେପରି ଚେତାବନୀ ଦିଆଯାଇଛି, ତାହାକୁ ନେଇ ଚାଂଚଲ୍ୟ ସୃଷ୍ଟି ହୋଇଛି । ଏହାଦ୍ୱାରା ଅଧିକ ସଂଖ୍ୟାରେ ଲୋକ ନାରାଜ ଅଛନ୍ତି ।