ନକଲି କ୍ରୟ ବିଲ୍ରେ ୧୭୦ କୋଟି ଚଳୁ
ରାଉରକେଲା: ଆୟକର ବିଭାଗ ରାଡାରରେ ରାଉରକେଲା । ଇସ୍ପାତନଗରୀ ରାଉରକେଲା ସହରରୁ ୧୭ଟି ଜାଲି ସଂସ୍ଥାକୁ ଠାବ କରିଛି ଆୟକର ବିଭାଗ । ଏହି ୧୭ଟି ଜାଲି ସଂସ୍ଥା ମାଧ୍ୟମରେ ୨ ବର୍ଷରେ ୧୭୦କୋଟି ଟଙ୍କାର ମିଥ୍ୟା କ୍ରୟ ବିଲ୍ ହୋଇଛି । ରାଉରକେଲା ଓ ଏହାର ଆଖପାଖ ଅଞ୍ଚଳରେ ଇସ୍ପାତ ତିଆରି ଓ ବିକ୍ରି ପ୍ରତିଷ୍ଠାନ ଉପରେ ଆୟକର ବିଭାଗର ଚଢ଼ାଉ କରିବା ପରେ ଏହି ତଥ୍ୟ ସାମ୍ନାକୁ ଆସିଛି ।
ଏକ ନିର୍ଦ୍ଦିଷ୍ଟ ଗ୍ରୁପ୍ ବେଆଇନ କାରବାର କରୁଥିଲା । କିଛି ଲୋକଙ୍କ ନାଁରେ ୧୭୦ କୋଟି ଟଙ୍କାର ମିଥ୍ୟା କ୍ରୟ ବିଲ୍ ହୋଇଛି । ଯେଉଁମାନଙ୍କ ନାଁରେ ଏଭଳି ବିଲ୍ ହୋଇଛି, ସେମାନେ ସମସ୍ତେ ଆର୍ଥିକ ଦୁର୍ବଳ ଶ୍ରେଣୀର । ଦୁଇ ବର୍ଷ ଧରି ଏହି ଗ୍ରୁପ୍ ଏଭଳି ଜାଲିଆତି କରି ଆସୁଥିଲା । ଘଟଣାରେ ୧୭ ଜଣଙ୍କୁ ଜେରା କରାଯାଇଛି । ସେମାନେ କିଛି ଜାଣି ନଥିବା କହିଛନ୍ତି । ଆୟକର ବିଭାଗ ଅଧିକ ତଦନ୍ତ ଜାରି ରଖିଛି ।
