ନୂଆ ଢାଞ୍ଚାରେ ହେବ ନବମ ଓ ଦଶମ ପରୀକ୍ଷା

କଟକ: ନୂଆ ପଦ୍ଧତିରେ ହେବ ନବମ ଓ ଦଶମ ପରୀକ୍ଷା । ବର୍ଷକୁ ୪ଟି ଫରମେଟିଭ ଓ ୨ଟି ସମେଟିଭ ଆସେସମେଣ୍ଟ ପରୀକ୍ଷା କରାଯିବ । ନୂତନ ପରୀକ୍ଷା ପଦ୍ଧତି ନେଇ ବିସ୍ତୃତ ବିବରଣୀ ଦେଇଛି ମାଧ୍ୟମିକ ଶିକ୍ଷା ବୋର୍ଡ ।

ବୋର୍ଡ ସୂଚନା ଅନୁସାରେ ବର୍ଷକୁ ୬ଟି ଆସେସମେଣ୍ଟ ପରୀକ୍ଷା ଆଧାରରେ ନବମ ଓ ଦଶମ ଶ୍ରେଣୀ ପିଲାଙ୍କ ଖାତା ମୂଲ୍ୟାୟନ ହେବ । ପ୍ରଥମ ଫରମେଟିଭ ଆସେସମେଣ୍ଟ ପରୀକ୍ଷା ସରିଛି । କେତେକ ସ୍କୁଲରେ ଦ୍ବିତୀୟ ଫରମେଟିଭ୍ ପରୀକ୍ଷା ଚାଲିଥିବା ବେଳେ ଅନ୍ୟ କେତେକ ସ୍କୁଲରେ ଶେଷ ହୋଇଛି ।

ଆସନ୍ତା ନଭେମ୍ବର ୨୨ରୁ ଆରମ୍ଭ ହେବ ପ୍ରଥମ ସମେଟିଭ୍ ଆସେସମେଣ୍ଟ ପରୀକ୍ଷା । ସମେଟିଭ୍ ଆସେସମେଣ୍ଟ ପାଇଁ ବୋର୍ଡ ପ୍ରଶ୍ନପତ୍ର ଦେବ । ୨୦ ମାର୍କ ମଲଟିପୁଲ ଚଏସ ଓ ୨୦ ମାର୍କର ସବଜେକ୍ଟିଭ୍ ପ୍ରଶ୍ନ ଆସିବ । କ୍ବୋଶ୍ଚିନ କମ୍ ଆନସର ବୁକଲେଟରେ ପରୀକ୍ଷା ଦେବେ ଛାତ୍ରଛାତ୍ରୀ । ନିଜ ସ୍କୁଲରେ ପରୀକ୍ଷା ହେବାକୁ ଥିବା ବେଳେ ନ୍ୟୁଟ୍ରାଲ ସ୍କୁଲରେ ଖାତା ମୂଲ୍ୟାୟନ ହେବ । ତେବେ କେଉଁ ସ୍କୁଲରେ ଖାତା ଦେଖା ହେବ, ତାହା ଡିଇଓ ଚୟନ କରିବେ । ନଭେମ୍ବର ୨୩ରୁ ୩୦ତାରିଖ ମଧ୍ୟରେ ନ୍ୟୁଟ୍ରାଲ ସ୍କୁଲରେ ଖାତାଦେଖା ହେବ । ଡିସେମ୍ବର ୨ତାରିଖ ସୁଦ୍ଧା ଖାତା ଦେଖାସରିବ । ଡିସେମ୍ବର ୬ରୁ ୧୩ ତାରିଖ ମଧ୍ୟରେ ଅନଲାଇନ ଟାବୁଲେସନ ରେଜିଷ୍ଟ୍ରାରରେ ମାର୍କ ଅପଲୋକ କରାଯିବ । ଫରମେଟିଭି-୧ ଓ ୨ ଏବଂ ସମେଟିଭ-୧ ମାର୍କ ସାଇଟରେ ଅପଲୋଡ କରାଯିବ ।