ଆଜିଠାରୁ ବସିବ ୪ଦିନିଆ ୯୦ତମ ଇଣ୍ଟରପୋଲ୍ ଜେନେରାଲ ଆସେମ୍ବଲି
ନୂଆଦିଲ୍ଲୀ: ନୂଆଦିଲ୍ଲୀର ପ୍ରଗତି ମୈଦାନରେ ଆଜିଠାରୁ ବସିବ ୪ଦିନିଆ ୯୦ତମ ଇଣ୍ଟରପୋଲ୍ ଜେନେରାଲ ଆସେମ୍ବଲି । ୨୫ ବର୍ଷ ପରେ ଭାରତରେ ଏହି ଆସେମ୍ବଲି ହେବାକୁ ଯାଉଛି । ଯେଉଁଥିରେ ୧୯୫ ଇଣ୍ଟରପୋଲ ସଦସ୍ୟ ଦେଶର ପ୍ରତିନିଧି ସାମିଲ ହେବେ । ୧୯୯୭ରେ ଶେଷ ଥର ପାଇଁ ଭାରତରେ ହୋଇଥିଲା ଅନ୍ତର୍ଜାତୀୟ ଇଣ୍ଟରପୋଲ ସମ୍ମିଳନୀ।
ଚଳିତ ବର୍ଷ ସ୍ବାଧିନତାର ୭୫ ବର୍ଷ ପୂର୍ତ୍ତି ଅବସରରେ ଭାରତ ଏହି ସମ୍ମିଳନୀକୁ ଆୟୋଜନ କରିବାକୁ ପ୍ରସ୍ତାବ ଦେଇଥିଲା, ଯାହାକୁ ବିପୁଳ ସମର୍ଥନ ମିଳିଥିଲା । ଆଜିଠୁ ୨୧ ତାରିଖ ଯାଏ ଏହି ସମ୍ମିଳନୀ ଚାଲିବ । ଯେଉଁଥିରେ, ବିଭିନ୍ନ ଦେଶର ପୋଲିସ ମୁଖ୍ୟ, ଏନସିବିର ମୁଖ୍ୟଙ୍କ ସହ ବରିଷ୍ଠ ପୋଲିସ ଅଧିକାରୀ ସାମିଲ ହେବେ ।
ସୂଚନାଯୋଗ୍ୟ, ଜେନେରାଲ ଆସେମ୍ବଲି ହେଉଛି ଇଣ୍ଟରପୋଲର ସୁପ୍ରିମ ଗଭର୍ଣ୍ଣିଂ ବଡ଼ି। ଏହି ମିଟିଂ ବର୍ଷକୁ ଥରେ ବସେ। ଯେଉଁଥିରେ ଇଣ୍ଟରପୋଲର କାର୍ଯ୍ୟଧାରା ଓ ଫୋକସ ଏରିଆ ଉପରେ ଆଲୋଚନା ହୋଇଥାଏ । ଭାରତରେ ଏହି ଇଭେଣ୍ଟ ହେଉଥିବାରୁ ଦେଶର ଆଇନଶୃଙ୍ଖଳା ବ୍ୟବସ୍ଥା ପୁରା ବିଶ୍ବ ଆଗରେ ପ୍ରତିପାଦନ କରିବାର ସୁଯୋଗ ପାଇବ ଦେଶ। ପ୍ରଧାନମନ୍ତ୍ରୀ ଏହି ଆସେମ୍ବଲିରେ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି।
ତେବେ ବୈଠକରେ କେନ୍ଦ୍ର ଗୃହମନ୍ତ୍ରୀ, ଇଣ୍ଟରପୋଲ ସଭାପତି ଏହମ୍ମଦ ନାସିର୍ ଓ ସେକ୍ରେଟାରୀ ଜେନେରାଲ ଜର୍ଜେନ ଷ୍ଟକ, ସିବିଆଇ ନିର୍ଦ୍ଦେଶକ ମଧ୍ୟ ଏହି କାର୍ଯ୍ୟକ୍ରମରେ ସାମିଲ ହେବେ।
