୮୦ ବର୍ଷର କରୋନା ଯୋଦ୍ଧା: ଏହି ମହିଳା ଘରେ ପ୍ରତିଦିନ ତିଆରି କରୁଛନ୍ତି ମାସ୍କ୍
ଜୟପୁର: ବୟସର ଅପରାହ୍ନରେ ସାହାଯ୍ୟ କରିବାର ନିଶା । ବୟସ ୮୦, ନା ସେ ଠିକରେ ଚାଲିପାରୁଛନ୍ତି ନା ଦେଶର ଏଭଳି ଅବସ୍ଥାକୁ ଦେଖି ପାରୁଛନ୍ତି । କରୋନା ଭଳି ଏମିତି ଭୟଙ୍କର ସମୟରେ ନିଜର ଅଣ୍ଟା ସଳଖି ପାରୁ ନଥିବା ଏହି ୮୦ ବର୍ଷିୟ ମହିଳା ଜଣଙ୍କ ଅଣ୍ଟା ଭିଡ଼ିଛନ୍ତି ଅସହାୟ ଲୋକଙ୍କୁ ସାହାଯ୍ୟ କରିବାକୁ । ରାଜସ୍ଥାନର ଜୟପୁର ସହରରେ ରହୁଥିବା ଏହି ୮୦ ବର୍ଷିୟ ମହିଳା ମାୟା ଶର୍ମା ଖୁବ୍ ପରିଶ୍ରମୀ ।
ବୟସର ଅପରାହ୍ନରେ ହାତ ତ ଥରୁଛି କିନ୍ତୁ ଛୁଞ୍ଚିରେ ସେ ସୂତାକୁ ଖୁବ ସୁନ୍ଦର ଭାବେ ଭର୍ତ୍ତି କରି ତିଆରି କରୁଛନ୍ତି ଶହ ଶହ ମାସ୍କ । ଏହି ମାସ୍କ ଗୁଡ଼ିକୁ ତାଙ୍କ ପୁଅ ମନୀଷ ନେଇ ବିଭିନ୍ନ ହସପିଟାଲର ରୋଗୀ, ପରିବା ବେପାରୀ, ପୋଲିସ ଏବଂ ଗରୀବ ଲୋକଙ୍କୁ ବାଣ୍ଟୁଛନ୍ତି । ମାୟାଙ୍କୁ ଯେତେବେଳେ ଏନେଇ ପଚରା ଗଲା ସେ କହିଛନ୍ତି, ଜଣେ ଡାକ୍ତର ଯେତେବେଳେ ଦିନସାରା ପରିଶ୍ରମ କରି ଘରକୁ ଆସି ଆରାମ କରିବା ବଦଳରେ ଅସହାୟ ଲୋକଙ୍କ ପାଇଁ ମାସ୍କ ତିଆରି କରୁଛନ୍ତି ତେବେ ମୁଁ ଘରେ ବସି କାହିଁକି ମାସ୍କ ପ୍ରସ୍ତୁତ କରିପାରିବି ନାହିଁ । ଲୋକଙ୍କ ସୁରକ୍ଷିତ ରହିବାକୁ ସମସ୍ତେ ପ୍ରୟାସ କରୁଛନ୍ତି ତେଣୁ ମୁଁ ବି ଏହି କାର୍ଯ୍ୟରେ ଲାଗି ପଡ଼ିଛି ।
ତାଙ୍କୁ ୮୦ ବର୍ଷ ତାଙ୍କ ସିଲେଇ ମେସିନକୁ ୬୦ ବର୍ଷ
ମାୟା କୁହନ୍ତି ଯେତେବେଳେ ମୋର ବିବାହ ଠିକ୍ ହୋଇଥିଲା ମୋ ବାପା ମୋ ପାଇଁ ଏହି ମେସିନ ଆଣି ଦେଇଥିଲେ ତାପର ଠାରୁ ମୁଁ ସିଲେଇ ଆରମ୍ଭ କରିଥିଲି । ସେବେଠାରୁ ଏବେ ପର୍ଯ୍ୟନ୍ତ ନା ମୋ ମେସିନ ଥକିଛି ନା ମୁଁ । ତେବେ ଏନେଇ ତାଙ୍କ ପୁଅ ମନୀଷ କୁହନ୍ତି, ମାଆ ସାହାଯ୍ୟ କରିବାକୁ ସବୁବେଳେ ଭଲପାଆନ୍ତି ଯଦି ତାଙ୍କ ପାଖରେ ୧୦ଟଙ୍କା ଥାଏ ତେବେ କେହି ଜଣେ ତାଙ୍କୁ ୮ଟଙ୍କା ମଗନ୍ତି ତ ସେ ତାଙ୍କୁ ଦେବାକୁ କେବେ ବି ପଛାଇ ନଥାନ୍ତି । ଏବଂ ୮ଟଙ୍କା ଦେଇ ନିଜେ ୨ଟଙ୍କାରେ ଚଳେଇ ନିଅନ୍ତି । ତେବେ ମାୟା ଦିନକୁ ୪୦ଟା ମାସ୍କ ତିଆରି କରୁଛନ୍ତି ଏବଂ ଏବେ ପର୍ଯ୍ୟନ୍ତ ସେ ୭୦୦ରୁ ୮୦୦ ମାସ୍କ ପ୍ରସ୍ତୁତ କରିସାରିଛନ୍ତି ।
