ବନ୍ଧୁକ ମୁନରେ ଦୋକାନୀଙ୍କୁ ଲୁଟ୍; ଦୋକାନୀଙ୍କଠାରୁ ଲୁଟିନେଲେ ୮୦ ହଜାର ଟଙ୍କା

ମୟୂରଭଞ୍ଜ: ବନ୍ଧୁକ ମୁନରେ ଦୋକାନୀଙ୍କୁ ଲୁଟିଲେ। ମୟୂରଭଞ୍ଜ ଠାକୁରମୁଣ୍ଡା ଅଂଚଳରେ ଘଟିଛି ଏ ଲୁଟ ଘଟଣା। ହାଣ୍ଡିଫୁଟା ଛକ ନିକଟରେ ସାର ଦୋକାନ ଉପରେ ୭ ଜଣ ଡକାୟତ ଅଚାନକ ଆକ୍ରମଣ କରି  ୮୦ ହଜାର ଟଙ୍କା ଲୁଟି ନେଇଛନ୍ତି।

ସୂଚନା ଅନୁଯାୟୀ, ୩ଟି ମୋଟର ସାଇକେଲରେ ୭ ଜଣ ଡକାୟତ ଆସି ଦୋକାନ ଆଗରେ ଠିଆ ହୋଇଥିଲେ । ଦୋକାନ ଘର ଭିତରକୁ ପଶି କିଛି ସାମଗ୍ରୀ ମାଗିଥିଲେ । ଏହି ସମୟରେ ଦୋକାନୀଙ୍କୁ ୨ ଜଣ ଦୁର୍ବୃତ୍ତ ବନ୍ଧୁକ ଦେଖାଇ ଲୁଟ ଆରମ୍ଭ କରିଥିଲେ । ଦୋକାନୀ ଜଣଙ୍କ ଦୁର୍ବୃତ୍ତ ହାତକୁ ପିଟିବା ଫଳରେ ବନ୍ଧୁକ ଖସି ଗୁଳି ବାହାରି ଯାଇଥିଲା। ଅନ୍ୟ ମାନେ ଘର ଭିତରେ ପଶି ତାଙ୍କ ସ୍ତ୍ରୀ ଓ ପିଲାଙ୍କୁ ଆକ୍ରମଣ କରିଥିଲେ। ମହିଳା ଜଣକ କୌଶଳକ୍ରମେ ଖସିଯାଇ ଲୋକଙ୍କୁ ବଡ଼ ପାଟିରେ ଡାକିଥିଲେ। ସାମ୍ନା ଘର ଲୋକ ଆସିଯିବାରୁ ଡକାୟତ ତାଙ୍କୁ ମାଡ଼ ଦେବା ସହ ସାର ଦୋକାନୀକୁ ଲୁହା ରଡ଼ରେ ମୁଣ୍ଡକୁ ପିଟି ପିଟି ଦେଇଥିଲେ । ଏହାପରେ ଘରୁ ୮୦ ହଜାର ଟଙ୍କା ନେଇ  ଦୃର୍ବୃତ୍ତମାନେ ଚାଲି ଯାଇଥିଲେ । ଦୋକାନୀଙ୍କୁ ଆହତ ଅବସ୍ଥାରେ ଠାକୁରମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ଚିକିତ୍ସିତ ହେବା ପରେ ଥାନାରେ ଏତଲା ଦେଇଥିଲେ। ପୋଲିସ ଘଟଣାର ତଦନ୍ତ କରୁଛି ।