ସେପ୍ଟେମ୍ୱର ୧୨ରୁ ସାରା ଦେଶକୁ ଗଡ଼ିବ ୮୦ ନୂଆ ଯାତ୍ରୀବାହୀ ଟ୍ରେନ୍, ଦରକାର ହେଲେ ସ୍ୱତନ୍ତ୍ର ଟ୍ରେନ୍ ସେବା ଦାବି କରିପାରିବ ରାଜ୍ୟ…………..

ନୂଆଦିଲ୍ଲୀ : ସେପ୍ଟେମ୍ୱର ୧୨ରୁ ସାରା ଦେଶରେ ୮୦ଟି ନୂଆ ଯାତ୍ରୀବାହୀ ଟ୍ରେନ ଚଳାଚଳ କରିବ । ତେବେ ଏହି ନୂଆ ଯାତ୍ରୀବାହୀ ରେଳସେବା ପାଇଁ ଟିକେଟ୍ ସଂରକ୍ଷଣ ସେପ୍ଟେମ୍ୱର ୧୦ରେ ଆରମ୍ଭ ହେବ । ଏନେଇ ସୂଚନା ଦେଇଛନ୍ତି ରେଲୱେ ବୋର୍ଡ ଅଧ୍ୟକ୍ଷ ଭିକେ ଯାଦବ । ଦେଶରେ ରେଳସେବା କରୋନା କାଳରେ ସଙ୍କୁଚିତ ହୋଇଥିଲା ।  ସ୍ୱାଭାବିକ ରେଳସେବା ବନ୍ଦ ହୋଇଥିଲା । ଏହାପରେ ପ୍ରଥମେ କେବଳ ଶ୍ରମିକ ସ୍ପେଶାଲ୍ ଟ୍ରେନ ଓ ପରେ ରାଜଧାନୀ ଦିଲ୍ଲୀକୁ ସଂଯୋଗ କରି ୧୫ ଯୋଡ଼ା ଟ୍ରେନ ଚଳାଚଳ ଆରମ୍ଭ ହୋଇଥିଲା ।

80 new special trains to start from Sept 12, reservations open Sept 10; this is in addition to 230 trains in operation: Rail Board Chairman

— Press Trust of India (@PTI_News) September 5, 2020

କ୍ରମଶଃ ଲକଡାଉନ୍ ଓ ସଟଡାଉନର ପ୍ରଭାବ କମିବା ପରେ ସରକାର ୨୩୦ଟି ନୂଆ ଯାତ୍ରୀବାହୀ ରେଳ ଚଳାଚଳ ପାଇଁ ନିଷ୍ପତ୍ତି ନେଲେ । ଏହି କ୍ରମରେ ଏବେ ଯାତାୟତ ଓ ଗମନାଗମନକୁ ସାରା ଦେଶରେ ସ୍ୱାଭାବିକ କରିବା ପାଇଁ ସାନି ୮୦ଟି ଟ୍ରେନର ବ୍ୟବସ୍ଥା କରାଯାଇଛି । ସେହିଭଳି ଯାତ୍ରୀ ଗହଳି ହେଉଥିବା କିଛି ନିର୍ଦ୍ଦିଷ୍ଟ ଟ୍ରେନ ସେବା ପାଇଁ କେନ୍ଦ୍ର ସରକାର କ୍ଲୋନ୍ ଟ୍ରେନ ଚଳାଇବା ପାଇଁ ନିଷ୍ପତ୍ତି ନେଇଛନ୍ତି । କ୍ଲୋନ ଟ୍ରେନ୍ ସହାୟତାରେ ହେବାକୁ ଥିବା ଅତିରିକ୍ତ ଗହଳି ରୋକିବା ପାଇଁ ପ୍ରୟାସ ହେବ ବୋଲି ରେଲୱ ବୋର୍ଡ ପକ୍ଷରୁ ପ୍ରକାଶ କରାଯାଇଛି ।

ଅନ୍ୟପକ୍ଷରେ ରାଜ୍ୟଗୁଡ଼ିକର ବ୍ୟକ୍ତିଗତ ଦାବି ପୂରଣ କ୍ଷେତ୍ରରେ ମଧ୍ୟ କେନ୍ଦ୍ର ସରକାର ସହାୟକ ହେବ ବୋଲି କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି । ଅର୍ଥାତ୍, ଯଦି କୌଣସି ରାଜ୍ୟ କିଛି ନିର୍ଦ୍ଦିଷ୍ଟ କାରଣ ପାଇଁ ଏକ ସ୍ୱତନ୍ତ୍ର ଟ୍ରେନ ଆବଶ୍ୟକ କରେ ତେବେ କେନ୍ଦ୍ର ସରକାର ଉକ୍ତ ଚାହିଦା ପୂରଣ କରିବା ନେଇ ସ୍ୱତନ୍ତ୍ର ଟ୍ରେନର ସେବା ଯୋଗାଇଦେବେ । ତେବେ ରେଲୱେ ବୋର୍ଡ ପକ୍ଷରୁ ଜାରି ହୋଇଥିବା ନିର୍ଦ୍ଦେଶନାମା ଏହି ସ୍ୱତନ୍ତ୍ର ଟ୍ରେନ ପାଇଁ ମଧ୍ୟ ବଳବତ୍ତର ରହିବ ବୋଲି ସ୍ପଷ୍ଟ ହୋଇଛି ।