ପିକଅପ୍ ଭ୍ୟାନ୍ ସହ ୭୦ ପ୍ୟାକେଟ୍ ଆଳୁ ଜବତ

ଖୋର୍ଦ୍ଧା: ଲକଡାଉନ୍ ଭୟରେ ବଜାରରେ ଭିଡ଼ । ଫାଇଦା ନେଉଛନ୍ତି ଅସାଧୁ ବ୍ୟବସାୟୀ । ବଜାରରେ ପରିବା ପାଇଁ ଲୋକଙ୍କ ଭିଡ଼ ଦେଖି ପନିପରିବାର ଦର ବଢ଼ିଛି । ଅନ୍ୟପଟେ କିଛି ଅସାଧୁ ବ୍ୟବସାୟୀ ବଜାରରେ କୃତ୍ରିମ ଅଭାବ ସୃଷ୍ଟି କରୁଛନ୍ତି । ଆଳୁ, ପିଆଜ ଭଳି ପରିବାକୁ ବେଆଇନ୍ ଭାବେ ଗଚ୍ଛିତ ରଖି କଳାବଜାରୀ କରିବାକୁ ଚେଷ୍ଟା କରୁଛନ୍ତି ।

ଖୋର୍ଦ୍ଧା ଯୋଗାଣ ବିଭାଗ ପକ୍ଷରୁ ସହରରେ ବିଭିନ୍ନ ଦୋକାନରେ ଚଢ଼ାଉ  ବେଳେ ଏକ ଆଳୁ ବୋଝେଇ ମିନି ଟ୍ରକ ଯୋଗେ ଧରାପଡ଼ିଛି । ଆଳୁ ବୋଝେଇ ଗାଡ଼ିଟି ଦ୍ରୁତଗତିରେ ପଳାଉଥିଲା । ଯୋଗାଣ ବିଭାଗ ପକ୍ଷରୁ ଗାଡ଼ିଟିକୁ ଅଟକାଇ କାଗଜ ପତ୍ର, ବିଲ୍ ଯାଞ୍ଚ କରାଯାଇଥିଲା । ଗାଡ଼ିରେ ପ୍ରାୟ ୭୦ ପ୍ୟାକେଟ ଆଳୁ ଥିବାବେଳେ କୌଣିସ ବିଲ୍ ନଥିଲା । ଫଳରେ ୭୦ ପ୍ୟାକେଟ ଆଳୁ, ସହ ଟ୍ରକ ଜବତ କରି ବିଭାଗ ତଦନ୍ତ ଚଳାଇଛି ।