ଶିକାରୀଙ୍କୁ ଧରୁଛି AI କ୍ୟାମେରା; ଗଜପତିରୁ ଧରା ପଡିଲେଣି ୭
1 min read
ଗଜପତି: ବନ ବିଭାଗକୁ ବଡ ସଫଳତା। ଆନ୍ତ-ରାଜ୍ୟ ଜଙ୍ଗଲୀ ଶିକାର ରାକେଟର ହୋଇଛି ପର୍ଦ୍ଦାଫାସ। ଗଜପତିରୁ ଧରା ପଡିଛନ୍ତି ରାକେଟର ୭ ଜଣ ସଦସ୍ୟ। ତାଙ୍କ ନିକଟରୁ ୫ଟି କଲରପତାରିଆ ଓ ବଜ୍ରକାପ୍ତା ଚମଡା ଜବତ ହୋଇଛି। ରାଜ୍ୟ ବାହାରକୁ ବନ୍ୟପ୍ରାଣୀ ଅଙ୍ଗ ଚାଲାଣ ନେଇ ବଡ଼ ରାକେଟ କାମ କରୁଥିବା ବନ ବିଭାଗ ପକ୍ଷରୁ ସୂଚନା ମିଳିଛି।
ରାକେଟର ମୁଖ୍ଯ ଅଭିଯୁକ୍ତ ଫେରାର ରହିଥିବାବେଳେ ଏମାନଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢାଉ କରାଯାଉଛି। ଦକ୍ଷିଣ ପୂର୍ବ ଦେଶରେ ବାଘ ହାଡ଼ ଓ ଚର୍ବିରୁ ପ୍ରସ୍ତୁତ ତେଲର ଚାହିଦା ରହିଥିବାରୁ ସେ ଦିଗରେ ତଦନ୍ତ କରାଯାଉଛି। ଓଡିଶା ଜଙ୍ଗଲକୁ ଶିକାରୀମୁକ୍ତ କରିବାକୁ ସ୍ୱତନ୍ତ୍ର ଯୋଜନା କରାଯାଇଛି। ଏଆଇ ସହାୟତାରେ ଚାଲିଛି ଶିକାରୀ ଦମନ। ଜଙ୍ଗଲରେ ଖଞ୍ଜା ଯାଇଛି କ୍ୟାମେରା । ଏହି କ୍ୟାମେରା ବିନା ଫ୍ଲାସରେ ଶିକାରୀର ଫଟୋ ଉଠାଉଛି ।
ଆଗକୁ କୁଲଡିହା ଓ ସାତକୋଶିଆରେ ଏହି କ୍ୟାମେରା ଲଗାଯିବ। କୁଲଡିହାରେ ବି ଦୁଇ ବନ କର୍ମଚାରୀଙ୍କୁ ଗୁଳି କରାଯିବା ପରେ ଅନେକ ଶିକାରୀଙ୍କୁ ଗିରଫ କରାଯାଇଛି। ଆଗକୁ ଏକ୍ସ ଆର୍ମି ଅଫିସରଙ୍କୁ କୁଲଡିହାରେ ନିୟୋଜିତ କରାଯିବ। ସାତକୋଶିଆ ପାଇଁ ସ୍ୱତନ୍ତ୍ର ଜେଟିଏଫ ଗଠିତ ହୋଇଛି। ଶିକାରୀ ଜଗିବା ପାଇଁ ଚନ୍ଦକାରେ ତିଆରି ୭ଟି ୱାଚ ଟାୱାର। ଏହାସହ ଶୀଘ୍ର ଏକ୍ସ ଆର୍ମି ଟିମ ନିୟୋଜିତ ହେବେ ବୋଲି ସୂଚନା ଦେଇଛନ୍ତି ବନ୍ଯପ୍ରାଣୀ ପିସିସିଏଫ ସୁଶାନ୍ତ ନନ୍ଦ।
