ଓଭରଟେକ୍ ବେଳେ ଅଟୋକୁ ଧକ୍କା ଦେଲା କାର, ବରକନ୍ୟା ସମେତ ୭ ମୃତ
ଲକ୍ଷ୍ନୌ: ଉତ୍ତର ପ୍ରଦେଶ ବିଜନୌରରେ ମର୍ମନ୍ତୁଦ ସଡକ ଦୁର୍ଘଟଣା । କାର ଓ ଅଟୋ ମଧ୍ୟରେ ମୁହାଁମୁହିଁ ଧକ୍କା ପରେ ୭ ଜଣଙ୍କ ମୃତ୍ୟୁ ଘଟିଛି । ସମସ୍ତ ମୃତକ ଗୋଟିଏ ପରିବାରର ହୋଇଥିବା ଜଣାପଡିଛି । ଦୁଇ ଜଣଙ୍କ ଅବସ୍ଥା ସଂକଟାପନ୍ନ ରହିଛି । ମୃତକଙ୍କ ମଧ୍ୟରେ ଦୁଇ ଜଣ ବରକନ୍ୟା ରହିଛନ୍ତି । ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଧାମପୁର ଜାତୀୟ ରାଜପଥ ୭୪ ନିକଟସ୍ଥ ଅଗ୍ନିଶମ ବିଭାଗ ନିକଟରେ ଏହି ଭୟଙ୍କର ଦୁର୍ଘଟଣା ଘଟିଛି ।
ବିଜନୋର ଧାମପୁର ଥାନା ଅଞ୍ଚଳରେ ଶୁକ୍ରବାର ବିଳମ୍ବିତ ରାତିରେ ଦୁର୍ଘଟଣା ଘଟିଛି । ନିକଟସ୍ଥ ତିବଡି ଗାଁର ଏକ ପରିବାର ଅଟୋରେ ମୁରାଦାବାଦ ଯାଉଥିଲେ । ପରିବାରର ୬ ଜଣ ଝାଡଖଣ୍ଡରୁ ପୁଅ ବାହାଘର ସାରି ନିଜ ଗାଁକୁ ଫେରୁଥିଲେ । ଏହି ସମୟରେ ବିପରୀତ ଦିଗରୁ ଆସୁଥିବା କାର ସହ ମୁହାଁମୁହିଁ ଜୋରଦାର ଧକ୍କା ହୋଇଥିଲା । ସୂଚନା ମିଳିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା । ସ୍ଥାନୀୟ ଲୋକେ ଆହତଙ୍କୁ ଉଦ୍ଧାର କରି ହସ୍ପିଟାଲ ନେଇଥିଲେ । ହସ୍ପିଟାଲ ଯିବା ରାସ୍ତାରେ ୬ ଜଣ ଆଖି ବୁଜିଥିଲେ । ଚିକିତ୍ସା ସମୟରେ ଅଟୋ ଚାଳକ ଆଖି ବୁଜିଥିଲେ । ଏବେବି ଦୁଇଜଣଙ୍କ ହସ୍ପିଟାଲରେ ଚିକିତ୍ସା ଚାଲିଛି ।
