ସୀମାରେ ସମରସଜ୍ଜା: ଚୀନ ଠୁଳ କରିଛି ୬୦ ହଜାରରୁ ଅଧିକ ସୈନ୍ୟ, ଲଦାଖରେ ବଳ ବଢ଼ାଇଲା ଭାରତ

ନୂଆଦିଲ୍ଲୀ: ପ୍ରବଳ ଥଣ୍ଡାରେ ଥରୁଛି ଦେଶ । ହେଲେ ସୀମାରେ ସ୍ଥିତି ଗରମ । ପୁଣି ଭାରତ-ଚୀନ ମଧ୍ୟରେ ସୃଷ୍ଟି ହୋଇପାରେ ବଡ଼ ଧରଣର ଉତ୍ତେଜନା । ପୂର୍ବ ଲଦାଖର ଏଲଏସି ନିକଟରେ ୬୦ ହଜାର ସୈନିକ ଠୁଳ କରିଛି ଚୀନଷ । ପ୍ରବଳ ବରଫପାତ ସତ୍ତ୍ୱେ ଚୀନର ଏହି ପଦକ୍ଷେପ ଭାରତ ଲାଗି ନୂଆ ଚ୍ୟାଲେଞ୍ଜ ସୃଷ୍ଟି କରିଛି । ପ୍ରତି ବଦଳରେ ଭାରତ ମଧ୍ୟ ଏଲଏସି ନିକଟରେ ସୈନ୍ୟ ଠୁଳ ପ୍ରକ୍ରିୟା ଆରମ୍ଭ କରିଛି । କିଛି ଦିନ ତଳେ ଚୀନ ନିଜର ଗ୍ରୀଷ୍ମକାଳୀନ ପ୍ରଶିକ୍ଷିତ ସୈନ୍ୟଙ୍କୁ ହଟାଇ ନେଇଥିଲା । ମାତ୍ର ଏବେ ପ୍ରବଳ ଶୀତ ସତ୍ତ୍ୱେ ସେଠାରେ ଚୀନ ନିଜ ସୈନ୍ୟ ଠୁଳ କରିଛି ।

ଜବାବ ଦେବା ଲାଗି ସେଠାରେ ଭାରତୀୟ ସେନା ରାଷ୍ଟ୍ରୀୟ ରାଇଫଲ୍ସ ୟୁନିଫର୍ମ ଫୋର୍ସ ମୁତୟନ କରିଛି । ସେଠାରେ ସେମାନେ ଲଦାଖ ଥିଏଟରର ୧୪ କୋରକୁ ସହାୟତା କରିବେ । ଏହାସହ ଭାରତୀୟ ସେନା ସମ୍ଭାବ୍ୟ ବିପଦର ମୁକାବିଲା ଲାଗି ଏଲଏସିର ନିକଟତର ହୋଇଛି । ଯଦି ଆବଶ୍ୟକ ପଡ଼େ ତେବେ ଜରୁରୀକାଳୀନ ଭାବେ ଆଗକୁ ମାଡ଼ିବା ଲାଗି ରଣନୀତି ସ୍ଥିର ହୋଇଛି । ଦୁଇ ଦେଶ ମଧ୍ୟରେ ଉତ୍ତେଜନା ହ୍ରାସ ଲାଗି ବାରମ୍ବାର ଉଦ୍ୟମ ହୋଇଥିବା ବେଳେ ଚୀନ ସବୁବେଳେ ନିୟମର ଉଲ୍ଲଂଘନ କରୁଛି । ସୀମା ସୁରକ୍ଷା ନେଇ ଗତ ଜାନୁଆରୀ ୧ ତାରିଖରୁ ଚୀନ ନୂଆ ଆଇନ୍ ବଳବତ୍ତର କରିଥିବା ବେଳେ ଏହାକୁ ନେଇ ଭାରତ ଚିନ୍ତାବ୍ୟକ୍ତ କରିଥିଲା ।

ପୁଣି ଥରେ ଏଲଏସିରେ ସୈନ୍ୟ ମୁତୟନ କରି ଚୀନ ଏକ ଷଡ଼ଯନ୍ତ୍ର କରୁଥିବା ସ୍ପଷ୍ଟ ହୋଇଛି । ସେପଟେ ଲଦାଖ ଅନ୍ତର୍ଗତ ଏଲଏସିର ୩୦ କିଲୋମିଟର ଦୂରରେ ଅବସ୍ଥିତ ପ୍ୟାଙ୍ଗୋଗ ହ୍ରଦରେ ଚୀନ ଏକ ପୋଲ ତିଆରି କରୁଛି । ଯାହା ସୈନ୍ୟ ଚଳପ୍ରଚଳ କ୍ଷେତ୍ରରେ ସହାୟକ ହେବ । ସେହିପରି ଏହି ହ୍ରଦ ନିକଟସ୍ଥ ଦୌଲତ ବେଗ୍ ଓଲଡି ଅଞ୍ଚଳରେ ଚୀନ ରାସ୍ତା ନିର୍ମାଣ କାର୍ଯ୍ୟ କରିଚାଲିଛି, ଯାହାକୁ ଭାରତ ବିରୋଧ କରୁଛି ।