ଦାଦାବଟି ନେଇ ଗିରଫ ହେଲେ ରାଜଧାନୀର ୬ ନକଲି ସାମ୍ୱାଦିକ….

ଭୁବନେଶ୍ୱର: ରାଜଧାନୀରେ ଏକ ଘିଅ କମ୍ପାନୀଠାରୁ ବଟି ମାଗି ୬ ଜଣ ନକଲି ସାମ୍ୱାଦିକ ଗିରଫ ହୋଇଛନ୍ତି । କମ୍ପାନୀର ମାଲିକଙ୍କୁ ଧମକାଇ ଏକ ୱେବ ଚ୍ୟାନେଲର ୬ ଜଣ ସାମ୍ୱାଦିକ ୧ ଲକ୍ଷ ୬୪ ହଜାର ଟଙ୍କା ନେଇଥିବା ଅଭିଯୋଗ ହୋଇଛି । ତେବେ ୧ ଲକ୍ଷ ୩୦ ହଜାର ଟଙ୍କା ଫୋନ୍ ପେ ମାଧ୍ୟମରେ ଓ ୩୪ ହଜାର ଟଙ୍କା ନଗଦ ଆକାରରେ ସାମ୍ୱାଦିକମାନେ କମ୍ପାନୀଠାରୁ ଆଣିଛନ୍ତି ।

ଖବର ପାଇ ସ୍ପେଶାଲ ସ୍କ୍ୱାର୍ଡ ଓ ତମାଣ୍ଡୋ ପୋଲିସ ୬ ଜଣ ସାମ୍ୱାଦିକଙ୍କୁ ଗିରଫ କରିଛି । ତେବେ କମ୍ପାନୀକୁ ଡରାଇ-ଧମକାଇ ସାମ୍ୱାଦିକମାନେ ବଟି ଆଦାୟ କରୁଥିଲେ । ବଟି ନଦେଲେ ତାଙ୍କ ବିରୁଦ୍ଧରେ ଖବର ପରିବେଷଣ କରିବା ପାଇଁ ଧମକ ଦେଇଥିଲେ । ତେଣୁ କମ୍ପାନୀ ମାଲିକ ବାଧ୍ୟ ହୋଇ ସଂପୃକ୍ତ ସାମ୍ୱାଦିକମାନଙ୍କୁ ବଟି ଭାବେ ୧ ଲକ୍ଷ ୬୪ ହଜାର ଟଙ୍କା ଦେଇଛି ।ଉଲ୍ଲେଖଯୋଗ୍ୟ, ଟ୍ୱିନ ସିଟିରେ ବଟି ପରମ୍ପରାକୁ ସମୂଳେ ନାଶ କରିବା ପାଇଁ କମଶିନରେଟ୍ ପୋଲିସ ନିଜର ସ୍ୱତନ୍ତ୍ର କାର୍ଯ୍ୟକ୍ରମ ବଟିକୁ ନାକୁ ଚାଲୁ ରଖିଛି ।

ଭୁବନେଶ୍ୱର ଓ କଟକରେ ଯେଉଁ ବି ସ୍ଥାନରେ ବଟି ଆଦାୟ ନେଇ ଖବର ମିଳୁଛି, କମିଶନରେଟ୍ ପୋଲିସ ଘଟଣାକୁ ପ୍ରାଥମିକତା ଦେଇ କାର୍ଯ୍ୟାନୁଷ୍ଠାନ ନେଉଛି । ପୋଲିସ ସ୍ଥିତିରେ ଉପରେ ସୂଚନା ଦେଇ ଜଣାଇଛି ଯେ, ଧରା ପଡିଥିବା ଅଭିଯୁକ୍ତମାନେ ରେଜିଷ୍ଟ୍ରେସନ ନକରି ସାଧାରଣ ଲୋକଙ୍କଠାରୁ ଦାଦାବଟି ଆଦାୟ କରୁଥିଲେ । ପୋଲିସ ଅଭିଯୁକ୍ତମାନଙ୍କଠାରୁ ମୋବାଇଲ ଫୋନ୍, ୨ଟି କାର୍, ନଗଦ ଟଙ୍କା ଓ ମିଛ ସାମ୍ୱାଦିକ ପରିଚୟ ପତ୍ର ଜବତ କରିଛି ।  ଏମାନଙ୍କ ବିରୋଧରେ ଡକାୟତି ମାମଲା ରୁଜ୍ଜୁ କରି ପୋଲିସ କୋର୍ଟ ଚାଲଣ କରିଛି । ତେବେ ଆହୁରି ଅନେକ ବ୍ୟକ୍ତି ଏହା ସହ ସଂଶ୍ଲିଷ୍ଟ ଥାଇ ପାରନ୍ତି ବୋଲି ପୋଲିସ ଆଶଙ୍କା କରୁଛି । ପୋଲିସ ପକ୍ଷରୁ ତଦନ୍ତ ଜାରି ରହିବ ବୋଲି ଜିସିପି ସ୍ପଷ୍ଟ କରିଛନ୍ତି ।