ରାଉରକେଲାରେ ଝାଡ଼ାବାନ୍ତି ଆକ୍ରାନ୍ତ; ମୃତ୍ୟୁସଂଖ୍ୟା ୬କୁ ବୃଦ୍ଧି

ରାଉରକେଲା: ବଢୁଛି ଝାଡ଼ାବାନ୍ତି ଆକ୍ରାନ୍ତଙ୍କ ସଂଖ୍ୟା। ରାଉରକେଲାରେ ସ୍ବାସ୍ଥ୍ୟ ଟିମର ତନାଘନା। ସହରରେ ୫୯୫ ଜଣ ସଂକ୍ରମିତ ହୋଇଥିବାବେଳେ ୧୬୨ ଜଣ ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ସେମାନଙ୍କ ମଧ୍ୟରୁ ୨୦ ଜଣ ଗୁରୁତର ଅଛନ୍ତି। ବର୍ତ୍ତମାନ ସୁଦ୍ଧା ୬ ଜଣଙ୍କ ମୃତ୍ୟୁ ହୋଇଥିବା ସୂଚନା।

ସହରର ୧୨ଟି ଓ୍ବାର୍ଡରୁ ସଂକ୍ରମିତ ଚିହ୍ନଟ ହୋଇଛନ୍ତି। ଜଳ ଜନିତ ରୋଗ ହୋଇଥାଇପାରେ ବୋଲି ସନ୍ଦେହ କରି ଜଳ କଲଚର୍ କରିବାକୁ ପଠାଯାଇଥିବା ଜନସ୍ବାସ୍ଥ୍ୟ ନିର୍ଦ୍ଦେଶକ ସୂଚନା ଦେଇଛନ୍ତି। ଓ୍ବାଟକୋକୁ ଜଳ ବିଶୋଧନ ପାଇଁ ନିର୍ଦ୍ଦେଶ ଦେଇଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ। ତେବେ ଏହା ଜଳରୁ ବ୍ୟାପିନଥିବା ଓ୍ବାଟକୋ ପକ୍ଷରୁ କୁହାଯାଇଛି। ୧୮ ଟି ଟିମ ବିଭିନ୍ନ ସ୍ଥାନରେ ପାଣି ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଇବା ସହ ପାଣି ପାଇପ କେଉଁଠି ଲିକେଜ ଅଛି ଯାଞ୍ଚ କରୁଛନ୍ତି।

ଏପଟେ ରାଉରକେଲାର ସରକାରୀ ଡାକ୍ତରଖାନାରେ ୧୩୦ ଜଣ ଚିକିତ୍ସିତ ହେଉଛନ୍ତି। ରାଜ୍ୟ ସ୍ବାସ୍ଥ୍ୟ ବିଭାଗର ତିନି ଜଣିଆ ଟିମ୍ ସହରରେ ସ୍ଥିତି ଅନୁଧ୍ୟାନ କରୁଛନ୍ତି। ପ୍ରତିକାର ପାଇଁ ୬ଟି ରାପିଡ ରେସପନ୍ସ ଟିମ୍ ମୋବାଇଲ ଟିମ୍ ନିୟୋଜିତ ହୋଇଛନ୍ତି । ସୁନ୍ଦରଗଡ ମେଡ଼ିକାଲ କଲେଜରୁ ୪ ଜଣିଆ ଡାକ୍ତରୀ ଟିମ୍ ନିୟୋଜିତ ଅଛନ୍ତି। ଘଟଣାରେ ଜିଲ୍ଲାପାଳ ଲଗାତର ରିଭ୍ୟୁ କରୁଛନ୍ତି। ହସ୍ପିଟାଲରେ ରୋଗୀଙ୍କୁ ଭେଟି ସ୍ଥିତି ଅନୁଧ୍ୟାନ କରିଛନ୍ତି ଶ୍ରମମନ୍ତ୍ରୀ। ତେବେ ରିପୋର୍ଟ ଆସିବା ପରେ ପ୍ରକୃତ କାରଣ ଜଣା ପଡ଼ିବ ବୋଲି କହିଛନ୍ତି ଫୁଡ୍ ସେଫଟି ଅଫିସର।