୭ ଦିନ ମଧ୍ୟରେ ହେବ ସବୁ ସମସ୍ୟାର ସମାଧାନ, ପ୍ରତିଶ୍ରୁତି ଦେଲେ 5T ସଚିବ

ବାଲେଶ୍ୱର: ୭ ଦିନ ମଧ୍ୟରେ ସବୁ ସମସ୍ୟାର ହେବ ସମାଧାନ। ବାଲେଶ୍ୱର ଜିଲ୍ଲା କୁପାରୀ ପଞ୍ଚାୟତ ପଡ଼ିଆରେ ଜନସାଧାରଣ ଓ ମିଶନ ଶକ୍ତି ମାଆମାନଙ୍କ ସହିତ ଆଲୋଚନା ବେଳେ ଏଭଳି ପ୍ରତିଶ୍ରୁତି ଦେଇଛନ୍ତି 5T ସଚିବ ଭିକେ ପାଣ୍ଡିଆନ୍‌। ସ୍ଥାନୀୟ ଅଞ୍ଚଳରେ ବିଭିନ୍ନ ଧାର୍ମିକ ଅନୁଷ୍ଠାନ ସହ କମ୍ୟୁନିଷ୍ଟି ସେଣ୍ଟର ପାଇଁ ଲୋକେ କରିଥିବା ଅନୁରୋଧକୁ ୭ ଦିନ ମଧ୍ୟରେ ମୁଖ୍ୟମନ୍ତ୍ରୀ ପୂରଣ କରିବେ ବୋଲି କହିଛନ୍ତି  ସଚିବ।

ଏଥିସହ ଚାଷୀ ଭାଇ ଭଉଣୀଙ୍କ ସମସ୍ୟାର ମଧ୍ୟ ସମାଧାନ ହେବ। ଛାତ୍ରଛାତ୍ରୀଙ୍କ ପାଇଁ ମଧ୍ୟ ଶିକ୍ଷାନୁଷ୍ଠାନର ରୂପାନ୍ତରୀକରଣ ଜାରି ରହିବ। ମାଆ ମାନଙ୍କୁ ରୋଜଗାରକ୍ଷମ କରିବାକୁ ମୁଖ୍ୟମନ୍ତ୍ରୀ ବ୍ୟାପକ ବ୍ୟବସ୍ଥା କରିଛନ୍ତି। ସବୁ ବେଳେ ମାଆ ମାନେ କିପରି ଦୁଇ ପାଦ ଆଗୁଆ ରହିବେ ସେଥିପାଇଁ ମୁଖ୍ୟମନ୍ତ୍ରୀ ସବୁବେଳେ ପ୍ରୟାସରତ। ଆଗକୁ ଚାଷୀଙ୍କ ପାଇଁ ସ୍ଥାନୀୟ କେନାଲରେ ପାଣି ଆସିବ। ଏଥିରେ ୨୭ ହେକ୍ଟର ଚାଷଜମିକୁ ଜଳ ମିଳିବ।

ଆଜି ରୂପାନ୍ତରଣ ଫର୍ଦ୍ଦରେ ସାମିଲ ହୋଇଛି ବାଲେଶ୍ୱର। ଗ୍ରାଉଣ୍ଡ ଜିରୋକୁ ଯାଇ ବିକାଶର ସମୀକ୍ଷା କରୁଛନ୍ତି ଫାଇଭ-ଟି ସଚିବ ଭି.କେ ପାଣ୍ଡିଆନ। ଉନ୍ନୟନ ପ୍ରକଳ୍ପର ସମୀକ୍ଷା ପାଇଁ ଆଜିଠୁ ଦୁଇଦିନିଆ ବାଲେଶ୍ୱର ଗସ୍ତରେ ଯାଇଛନ୍ତି ଫାଇଭ-ଟି ସଚିବ। ପରେ ଜାମୁଝାଡ଼ି ନିକଟରେ ବାମ୍ବୋ ପ୍ରୋସେସିଂ ୟୁନିଟ ପରିଦର୍ଶନ ସହ ମିଶନ ଶକ୍ତି ମାଆଙ୍କ ସହିତ ଆଲୋଚନା କରିବେ।

ସୋର ୟୁଏନ କଲେଜରେ ଛାତ୍ରଛାତ୍ରୀଙ୍କ ସହିତ ଆଲୋଚନା କରି ସିଏଚସି ଗସ୍ତ କରି ବିକାଶ କାମର ଅନୁଧ୍ୟାନ କରିବେ ଫାଇଭ-ଟି ସଚିବ। ସେଠାରୁ ସନ୍ତରାଗଡ଼ିଆ ଯାଇ ସାଳନ୍ଦୀ କେନାଲ ଉନ୍ନୟନ କାର୍ଯ୍ୟର ଅନୁଧ୍ୟାନ କରିବେ। ପରେ ବାହାନଗା ହାଇସ୍କୁଲ ପରିଦର୍ଶନ କରିବା ସହ ରେଳ ଦୁର୍ଘଟଣା ଉଦ୍ଧାର କାର୍ଯ୍ୟ ପାଇଁ ସ୍ଥାନୀୟ ଲୋକଙ୍କୁ କୃତଜ୍ଞତା ପ୍ରଦାନ କରିବେ। ଏହାପରେ ଦିନତମାମ ଏକାଧିକ ଉନ୍ନୟନ କାର୍ଯ୍ୟର ଅନୁଧ୍ୟାନ କରିବେ ଫାଇଭ-ଟି ସଚିବ।