ଭୁବନେଶ୍ବର: ଦଣ୍ଡ ନୁହେଁ କ୍ଷମା। କାଳୀମାଡ଼ କରିଥିବା ଭାସ୍କର ସାହୁ ବିରୋଧରେ ଆକ୍ସନ ନୁହେଁ ଉଦାରତା ଦେଖାଇଛନ୍ତି 5T ସଚିବ ଭି. କେ. ପାଣ୍ଡିଆନ୍। ଭାସ୍କରକୁ ତୁରନ୍ତ ଛାଡ଼ି ଦେବାକୁ ନିର୍ଦ୍ଦେଶ ଦେଇ ସେ ନିଜ ବିଶାଳ ହୃଦୟର ପରିଚୟ ଦେଇଛନ୍ତି। ଆଖି ଆଗରେ ଏଭଳି ହୀନ କାମକୁ ଦେଖିଥିବା ସତ୍ୟବାଦୀବାସୀ 5T ସଚିବଙ୍କ ଏଭଳି ବିଚାରଧାରାରେ ବିମୋହିତ ହୋଇଛନ୍ତି। ସାରା ରାଜ୍ୟ 5T ସଚିବଙ୍କ ବିକାଶମୂଳକ ଆଭିମୁଖ୍ୟ ଓ ଉଦାର ମନୋଭାବର ଭୂରି ଭୂରି ପ୍ରଶଂସା କରିଛି । 5T ସଚିବଙ୍କ ଆଦର୍ଶକୁ ଶିକ୍ଷା ଭାବେ ଗ୍ରହଣ କରିଛନ୍ତି ଯୁବପିଢି। ସମସ୍ତଙ୍କ ପାଇଁ ସେ ସାଜିଛନ୍ତି ରୋଲ ମଡେଲ୍ ।
ବିରୋଧର ଜବାବ ବିଶାଳ ହୃଦୟ। ଷଡ଼ଯନ୍ତ୍ରର କାଳିମାଡ଼କୁ ଉଦାରପଣର ମଲମ। କାଲି 5Tସଚିବଙ୍କୁ କାଳିମାଡ଼ କଲା କଣାସର ଭାସ୍କର ସାହୁ। ହେଲେ ସତ୍ୟବାଦୀ ଛାତିରେ ଫସର ଫାଟିଲା ଷଡ଼ଯନ୍ତ୍ରର ଏ କାହାଣୀ। ଏଭଳି ହୀନ ଚକ୍ରାନ୍ତ ନା ଓଗାଳିଲା ବିକାଶର ବାଟ ନା ଦୋହଲାଇ ପାରିଲା 5T ସଚିବଙ୍କ ବିଶାଳ ହୃଦୟ। ଯେଉଁ ଭାସ୍କର ସାହୁ ରାଜନୈତିକ ମୋହରା ସାଜି କାଳିମାଡ଼ କରିଥିଲା, ତାକୁ ତୁରନ୍ତ ଛାଡ଼ିବାକୁ ପୋଲିସକୁ ନିର୍ଦ୍ଦେଶ ଦେଲେ 5Tସଚିବ। ପାଣ୍ଡିଆନଙ୍କ ଏଭଳି ଉଦାରପଣ ଆଗରେ ମୁଣ୍ଡ ନୁଆଁଇଛନ୍ତି ସତ୍ୟବାଦୀବାସୀ। କାଲି ଯେଉଁ ସତ୍ୟବାଦୀ ଭାସ୍କରଙ୍କ ହୀନ କାମରେ ଲୁହ ଝରାଉ ଥିଲା, ଆଜି ସେ 5T ସଚିବଙ୍କ ବିଶାଳ ହୃଦୟର ଗୁଣ ଗାଉଛି। ଯେଉଁ ମହିଳାମାନେ ନିଜ ପଣତ କାନିରେ 5T ସଚିବଙ୍କ ମୁହଁରୁ କାଳୀ ପୋଛି ଦେଇଥିଲେ, ଏବେବି ସେମାନଙ୍କ ଆଖିରେ ଲୁହ ଭରିଛି। କାଳୀମାଡ଼ ଘଟଣାରେ କାଲି ସେମାନେ ବିଚଳିତ ଓ ଦୁଃଖିତ ହୋଇ ପଡିଥିଲେ। ଘଟଣାକୁ ନିନ୍ଦା କରିବା ସହ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ହେଲେ ଆଦୌ ବିଚଳିତ ନହୋଇ ବିକାଶର ବାର୍ତ୍ତା ଦେବାକୁ ଆଗେଇ ଯାଇଥିଲେ 5T ସଚିବ। ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ନନେବାକୁ ନିର୍ଦ୍ଦେଶ ଦେଇ ସେ ନିଜ ମହାନ ହୃଦୟର ପରିଚୟ ଦେଇଛନ୍ତି ।
ସେପଟେ ସତ୍ୟବାଦୀର ଯୁବ ପିଢ଼ି ବି ପାଣ୍ଡିଆନଙ୍କ ଉଦାରତାକୁ ଶିକ୍ଷା ଭାବେ ଗ୍ରହଣ କରିଛନ୍ତି। ଅହିଂସା ଓ କ୍ଷମା ଦ୍ୱାରା ହିଁ ଜୀବନରେ ଆଗେଇବା ସହ ସମସ୍ତଙ୍କ ବିକାଶ ହୋଇପାରିବ। ସେକଥା ସେମାନେ 5T ସଚିବଙ୍କ ଠାରୁ ଶିଖିଛନ୍ତି। ସବୁ ବାଧାବିଘ୍ନକୁ ଆଡ଼େଇ ମୁଖ୍ୟମନ୍ତ୍ରୀଙ୍କ ବିକାଶଧାରାକୁ ଆଗେଇ ନେବା ପାଇଁ ଥିବା 5T ସଚିବଙ୍କ ବ୍ରତ ଏବେ ଉତ୍କଳମଣୀ ଗୋପବନ୍ଧୁ ଦାସଙ୍କ ମାଟିରେ ସାଜିଛି ଉଦାହରଣ।
