‘ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟକୁ ନେଇ ଅପପ୍ରଚାର କରୁଥିଲେ ବୈଜୟନ୍ତ’

ଭୁବନେଶ୍ବର: ମୁଖ୍ୟମନ୍ତ୍ରୀ ହେବାକୁ ଇଛା ରଖୁଥିବା କିଛି ବ୍ୟକ୍ତି ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟକୁ ନେଇ ମିଥ୍ୟା ପ୍ରଚାର କରନ୍ତି । ବୈଜୟନ୍ତ ପଣ୍ଡାଙ୍କୁ ନେଇ ଏଏନଆଇ ପୋଡକାଷ୍ଟରେ ଏଭଳି କହିଛନ୍ତି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ବୈଜୟନ୍ତ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମଧ୍ୟରେ ସମ୍ପର୍କ ଖରାପ କେମିତି ହୋଇଥିଲା ପ୍ରଶ୍ନର ଉତ୍ତର ଦେଇ ପାଣ୍ଡିଆନ ଏଭଳି କହିଛନ୍ତି । ସେ କହିଛନ୍ତି ଯେ, ୨୦୧୪ ସାଧାରଣ ନିର୍ବାଚନ ପରେ  ବିଜେଡି ଲୋକସଭାରେ ଚତୁର୍ଥ ବୃହତ୍ତମ ଦଳ ଭାବେ ଉଭା ହୋଇଥିଲା । ଏହି ସମୟରେ ବୈଜୟନ୍ତ ପଣ୍ଡା କେନ୍ଦ୍ର ଫାଇନାନ୍ସ କମିଟିରେ ବିଜେପି ତାଙ୍କୁ ସାମିଲ କରିବାକୁ ଚାହୁଁଥିବା କଥା ମୁଖ୍ୟମନ୍ତ୍ରୀଙ୍କୁ ଫୋନ୍ କରି କହିଥିଲେ । ଅରୁଣ ଜେଟଲି ତାଙ୍କୁ (ବୈଜୟନ୍ତ) ଏହି ଅଫର ଦେଇଥିବା ସେ କହିଥିଲେ । ଯେହେତୁ ବୈଜୟନ୍ତଙ୍କ ବିରୋଧରେ ନିଜ କର୍ପୋରେଟ୍ ହାଉସକୁ ଆର୍ଥିକ ଲାଭ ପହଂଚାଇବାର ଅଭିଯୋଗ ଥିଲା, ତେଣୁ ମୁଖ୍ୟମନ୍ତ୍ରୀ ତାଙ୍କ ନାମ ସୁପାରିସ କରିବାକୁ ରାଜି ହୋଇ ନଥିଲେ । ଏହାପରଠାରୁ ବୈଜୟନ୍ତଙ୍କର ମୁଖ୍ୟମନ୍ତ୍ରୀଙ୍କ ସହିତ ସମ୍ପର୍କ ଖରାପ ହୋଇଥିଲା ।

ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟକୁ ନେଇ କରୁଥିଲେ ମିଥ୍ୟା ପ୍ରଚାର

ବୈଜୟନ୍ତ୍ର ପଣ୍ଡା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ଡିନର ଓ ଲଞ୍ଚ କରୁଥିଲେ କିନ୍ତୁ ପଛରେ ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟକୁ ନେଇ ଗୁଜବ ପ୍ରଚାର କରୁଥିଲେ । ମୁଖ୍ୟମନ୍ତ୍ରୀଙ୍କ ପାଖରେ ଏନେଇ ଖବର ପହଂଚିଥିଲା । ଦିଲ୍ଲୀରୁ ଆସୁଥିବା କେନ୍ଦ୍ରମନ୍ତ୍ରୀ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିବା କାଳରେ ତାଙ୍କ ସ୍ୱାସ୍ଥ୍ୟବସ୍ଥାକୁ ନେଇ ପଚାରୁଥିଲେ । ମୁଖ୍ୟମନ୍ତ୍ରୀଙ୍କୁ ଏହା ଅସହଜ କରୁଥିଲା । ମୁଖ୍ୟମନ୍ତ୍ରୀ ସେହି କେନ୍ଦ୍ରମନ୍ତ୍ରୀମାନଙ୍କଠାରୁ ତାଙ୍କ ସ୍ୱାସ୍ଥ୍ୟ ଖରାପ ଥିବା ନେଇ କେଉଁଠାରୁ ଖବର ପାଇଛନ୍ତି ପଚାରିବାରେ ବୈଜୟନ୍ତଙ୍କ ନାମ ଆସୁଥିଲା । ଥରେ ମଧ୍ୟପ୍ରଦେଶର ଜଣେ ବରିଷ୍ଠ ନେତା ମୁଖ୍ୟମନ୍ତ୍ରୀଙ୍କ ବଡ଼ ଭାଇ ପ୍ରେମ ପଟ୍ଟନାୟକଙ୍କୁ ଫୋନ୍ କରି ନବୀନ ସ୍ୱାସ୍ଥ୍ୟ ପରୀକ୍ଷା ପାଇଁ ଲଣ୍ଡନ ଯାଉଛନ୍ତି କି ବୋଲି ଜାଣିବାକୁ ଚାହିଁଥିଲେ । ଲଣ୍ଡନରେ ତାଙ୍କର ଅନେକ ପରିଚୟ ରହିଛି ନବୀନ ଚାହିଁଲେ ସେ ଏନେଇ କଥା ହୋଇ ପାରିବେ ବୋଲି କହିଥିଲେ । ପ୍ରେମ ପଟ୍ଟନାୟକଙ୍କୁ ଏହା ଚକିତ କରିଥିଲା । କାହାଠାରୁ ସେ ନବୀନଙ୍କ ସ୍ୱାସ୍ଥ୍ୟ ନେଇ ଏଭଳି ଶୁଣିଛନ୍ତି ପଚାରିବାରେ ସଂପୃକ୍ତ ନେତା ବୈଜୟନ୍ତଙ୍କ ନାମ ନେଇଥିଲେ । ଏହି ଘଟଣା ନବୀନଙ୍କୁ ଆଘାତ ଦେଇଥିଲା ।

ବୈଜୟନ୍ତ ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟକୁ ନେଇ ମିଥ୍ୟା ପ୍ରଚାର ପଛରେ ରାଜନୈତିକ ବିଦ୍ରୋହର ଉଦ୍ଦେଶ୍ୟ ଥିଲା କି ପ୍ରଶ୍ନର ଉତ୍ତରରେ ପାଣ୍ଡିଆନ କହିଥିଲେ ଯେ, ରାଜନୈତିକ ବିଦ୍ରୋହ ନୁହେଁ କିନ୍ତ ସେ ଏହି ସନ୍ଦେଶ ଦେବାକୁ ଚାହୁଁଥିଲେ ଯେ, ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟ ଠିକ ନଥିବାରୁ ବିକଳ୍ପ ନେତା ବାଛିବାର ସମୟ ଆସିଛି । ଗୋଟିଏ ଆଂଚଳିକ ଦଳ ହିସାବରୁ ଦଳର ମୁଖ୍ୟଙ୍କ ବିରୋଧରେ ଏଭଳି ମିଥ୍ୟା ପ୍ରଚାର ଦଳର ସ୍ୱାର୍ଥ ପାଇଁ ଠିକ ନଥିଲା ।

ରାହୁଲ ଆସୁଛନ୍ତି ବୋଲି ମୁଖ୍ୟମନ୍ତ୍ରୀ ସମ୍ଭବତଃ ଜାଣିନଥିବେ

ରାହୁଲ ଗାନ୍ଧୀଙ୍କ ଭାରତ ଯୋଡ଼ ନ୍ୟାୟ ଯାତ୍ରା ଓଡ଼ିଶାରେ ପ୍ରବେଶ କରିଥିବା ବେଳେ ଏସମ୍ପର୍କିତ ପ୍ରଶ୍ନର ଉତ୍ତର ଦେଇ ସେ କହିଥିଲେ ଯେ, ମୁଖ୍ୟମନ୍ତ୍ରୀ ସମ୍ଭବତଃ ରାହୁଲଙ୍କ ନ୍ୟାୟ ଯାତ୍ରା ଓଡ଼ିଶାରେ ପ୍ରବେଶ କରିଛି ବୋଲି ଜାଣି ନଥିବେ । ତେବେ ଏହି ଯାତ୍ରା ପାଇଁ ଓଡ଼ିଶାରେ ଯଦି କଂଗ୍ରେସକୁ କିଛି ଲାଭ ମିଳେ ତେବେ ଭଲ ହେବ କାରଣ ତ୍ରିକୋଣୀୟ ଲଢେଇ ଭଲ । ଏହା ସହିତ ବିଜେଡି ଗଠନାତ୍ମକ ବିରୋଧରେ ବିଶ୍ୱାସ କରେ କିନ୍ତୁ ଓଡ଼ିଶା ବିଜେପି ଗଠନାତ୍ମକ ବିରୋଧ କରୁନାହିଁ ବୋଲି ସେ କହିଛନ୍ତି । ବିଜେଡି ଓ ବିଜେପି ମଧ୍ୟରେ ଫିକ୍ସିଂ ହୋଇଥିବା ଅଭିଯୋଗ ଉପରେ ତାଙ୍କର ଉତ୍ତର ଥିଲା ଯେ, ବିଜେଡି ଦରକାର ବେଳେ ଦେଶର ସ୍ୱାର୍ଥ ପାଇଁ ବିଜେପିକୁ ବିରୋଧ କରିଛି । ଉଦାହରଣ ଭାବେ ସେ କୃଷି ଆଇନ ଓ ଏନଆରସି ପ୍ରସଙ୍ଗ କଥା କହିଥିଲେ ।