୫୭ ଜଣ ଟ୍ରେନି IAS ଅଧିକାରୀ କରୋନା ପଜିଟିଭ୍
1 min read
ଡେରାଡୁନ୍: ଦେଶରେ କରୋନା ମହାମାରୀ ମାଡ଼ି ଚାଲିଛି । ଡେରାଡୁନ୍ ସ୍ଥିତ ଲାଲ୍ ବାହାଦୁର ଶାସ୍ତ୍ରୀ ଜାତୀୟ ପ୍ରଶାସନିକ ଏକାଡେମୀରେ କରୋନା ମାମଲା ମିଳିଛି । ଏକାଡେମୀରେ ପ୍ରଶିକ୍ଷଣ ନେଉଥିବା ୫୭ ଜଣ ଟ୍ରେନି IAS ଅଫିସର କରୋନା ସଂକ୍ରମିତ ହୋଇଥିବା ଜଣାପଡ଼ିଛି । ବଡ଼ ସଂଖ୍ୟାରେ ସଂକ୍ରମଣ ବ୍ୟାପିବା ପରେ ଏକାଡେମୀକୁ ଡିସେମ୍ବର ୩ ଯାଏଁ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି ।
ଏକାଡେମୀ କର୍ତ୍ତୃପକ୍ଷ ରବିବାର ସୂଚନା ଦେଇଛନ୍ତି- ୫୭ ଜଣ ଟ୍ରେନି IAS ଅଧିକାରୀ କୋଭିଡ୍-୧୯ ସଂକ୍ରମିତ ହୋଇଛନ୍ତି । ଏଥିପାଇଁ ଏକାଡେମୀକୁ ଡିସେମ୍ବର ୩ ଯାଏଁ ବନ୍ଦ ରଖାଯାଇଛି । ଏହି ସମୟରେ ପ୍ରଶିକ୍ଷଣ ସହ ସମସ୍ତ ଅନ୍ୟ ସଞ୍ଚାଳନ କାର୍ଯ୍ୟକ୍ରମ ଅନଲାଇନରେ କରାଯିବ । ସଂକ୍ରମିତ ଟ୍ରେନିମାନଙ୍କୁ ଅଲଗା କୋଭିଡ୍ କେୟାର ସେଣ୍ଟରରେ ରଖାଯାଇଛି ।
ଶୁକ୍ରବାରଠାରୁ ଆଜି ଯାଏଁ ଏକାଡେମୀରେ ୧୬୨ଟି (RT-PCR) ଟେଷ୍ଟ କରାଯାଇଛି । ସମସ୍ତଙ୍କ ମଧ୍ୟରେ ସାମାଜିକ ଦୂରତା, ବାରମ୍ବାର ହାତ ଧୋଇବା ଓ ମାସ୍କ ପିନ୍ଧିବା ଉପରେ ଗୁରୁତ୍ୱ ଦିଆଯାଇଛି ।
