୨୦୧୮ ନିର୍ବାଚନ: ଏହି ୫ ରାଜ୍ୟରେ କେଉଁ ଦଳକୁ ମିଳିଥିଲା କେତେ ଆସନ ?

ନୂଆଦିଲ୍ଲୀ: ଆଜି ଘୋଷଣା ହେବ ୫ ରାଜ୍ୟର ନିର୍ବାଚନ ତାରିଖ । ତେବେ ଆସନ୍ତୁ ନଜର ପକାଇବା ୨୦୧୮ ନିର୍ବାଚନରେ ଏହି ୫ ରାଜ୍ୟରେ କେଉଁ ଦଳକୁ ମିଳିଥିଲା କେତେ ଆସନ । ଆଉ କେଉଁ ରାଜ୍ୟରେ କିଏ ଗଢିଛି ସରକାର ? ରାଜସ୍ଥାନରେ କଂଗ୍ରେସ ସରକାର ଗଢିଥିବାବେଳେ ମୁଖ୍ୟମନ୍ତ୍ରୀ ଅଛନ୍ତି ଅଶୋକ ଗେହଲଟ । ରାଜସ୍ଥାନର ମୋଟ ୨୦୦ ଆସନରୁ କଂଗ୍ରେସ ୧୦୭ ସିଟ ପାଇଥିବାବେଳେ ବିଜେପି ୭୦ ଓ ୨୩ଟିରେ ଅନ୍ୟାନ୍ୟ ପ୍ରାର୍ଥୀ ବିଜୟ ଲାଭ କରିଥିଲେ ।

ସେହିପରି ଛତିଶଗଡ଼ରେ ମଧ୍ୟ କଂଗ୍ରେସ ସରକାର କରିଥିଲା । ମୁଖ୍ୟମନ୍ତ୍ରୀ ଭାବେ ଭୂପେଶ ବଘେଲ ଦାୟିତ୍ବ ତୁଲାଉଥିବାବେଲେ ଏହାର ମୋଟ ଆସନ ରହିଛି ୯୦ । କଂଗ୍ରେସ- ୭୧, ବିଜେପି- ୧୫ ଓ ଅନ୍ୟାନ୍ୟ- ୪ଟି ଆସନରେ ବିଜୟ ଲାଭ କରିଥିଲେ । ସେହିପରି ୨୦୧୮ରେ ମଧ୍ୟପ୍ରଦେଶରେ ପ୍ରଥମେ କଂଗ୍ରେସ ସରକାର ଗଢିଥିଲା । ମାତ୍ର ପରେ ଦଳୀୟ କନ୍ଦଳ ଯୋଗୁ କଂଗ୍ରେସ ସରକାର ଭାଙ୍ଗି ଏବେ ବିଜେପି ସେଠାରେ ଶାସନ କରୁଥିବାବେଳେ ମୁଖ୍ୟମନ୍ତ୍ରୀ ରହିଛନ୍ତି ଶିବରାଜ ସିଂ ଚୌହ୍ବାନ ।

ମଧ୍ୟପ୍ରଦେଶର ମୋଟ ଆସନ ୨୩୦ । ଏଥିରୁ ବିଜେପି ପାଖରେ ୧୨୮ ସିଟ ଥିବାବେଳେ କଂଗ୍ରେସ- ୯୮ ଓ ଅନ୍ୟାନ୍ୟ-୪ଟି ଆସନରେ ବିଜୟୀ ହୋଇଛନ୍ତି । ସେପଟେ ୧୧୯ ଆସନ ବିଶିଷ୍ଟ ତେଲେଙ୍ଗାନାରେ ମୁଖ୍ୟମନ୍ତ୍ରୀ ଅଛନ୍ତି କେ. ଚନ୍ଦ୍ରଶେଖର ରାଓ । ବିଆରଏସ ପାଖରେ ୧୦୧ ଆସନ ଥିବାବେଳେ କଂଗ୍ରେସ-୫, ବିଜେପି- ୩ ଓ ଅନ୍ୟାନ୍ୟ- ୧୦ଟି ଆସନରେ ବିଜୟ ଲାଭ କରିଥିଲେ । ଅନ୍ୟପଟେ ମିଜୋରାମରେ ମୁଖ୍ୟମନ୍ତ୍ରୀ ଅଛନ୍ତି ଜୋରମଥାଙ୍ଗା । ମୋଟ ୨୭ ଆସନରୁ ଏମଏନଏଫ- ୨୭, କଂଗ୍ରେସ -୫, ବିଜେପି-୧ ଓ ଅନ୍ୟାନ୍ୟ- ୭ଟି ଆସନରେ ବିଜୟ ଲାଭ କରିଥିଲେ ।