ଚିନ୍ତା ବଢ଼ାଉଛି କରୋନାର ନୂଆ ଷ୍ଟ୍ରେନ୍, ବ୍ରିଟେନରୁ ଭାରତକୁ ବ୍ୟାପୁଛି!

ନୂଆଦିଲ୍ଲୀ: ଚିନ୍ତା ବଢ଼ାଇଛି କରୋନାର ନୂଆ ଷ୍ଟ୍ରେନ୍ । ବ୍ରିଟେନରେ ଆତଙ୍କ ସୃଷ୍ଟି କରିଥିବା କରୋନାର ନୂଆ ଭୂତାଣୁ ସଂକ୍ରମଣ ଏବେ ଭାରତକୁ ବ୍ୟାପିଛି ।  ବ୍ରିଟେନରୁ ଦିଲ୍ଲୀ ଆସିଥିବା ୫ ଜଣଙ୍କ ଦେହରେ ଏହି ନୂଆ କରୋନା ଭୂତାଣୁ ରହିଥିବା ନେଇ ସୂଚନା ମିଳିଛି ।

ବ୍ରିଟେନରୁ ଦିଲ୍ଲୀ ଏୟାରପୋର୍ଟରେ ଆସି ପହଞ୍ଚିଥିବା ବିମାନରେ ଥିବା ୨୬୬ ଯାତ୍ରୀଙ୍କ RTPCR ଟେଷ୍ଟ କରାଯାଇଥିଲା । ସେମାନଙ୍କ ମଧ୍ୟରୁ ୫ଜଣ ପଜିଟିଭ୍ ଚିହ୍ନଟ ହୋଇଛନ୍ତି ।

କୋଭିଡ-୧୯ ନୋଡାଲ୍ ଅଧିକାରୀଙ୍କ ମୁତାବକ ସେମାନଙ୍କ ନମୁନା ଯାଞ୍ଚ ଲାଗି ନ୍ୟାସନାଲ୍ ସେଣ୍ଟର ଅଫ୍ ଡିଜିଜ୍ କଣ୍ଟ୍ରୋଲଙ୍କୁ ପଠାଇ ଦିଆଯାଇଛି । ଯେଉଁଥିରୁ ଜଣାପଡିବ ଯେ ସମ୍ପୃକ୍ତ ୫ ଜଣଙ୍କ ମଧ୍ୟରେ କରୋନା ଭାଇରସର ନୂଆ ଷ୍ଟ୍ରେନ୍ ରହିଛି କି ନାହିଁ ।

ଉଲ୍ଲେଖଯୋଗ୍ୟ, ସଂକ୍ରମଣ ଭୟରେ ଡିସେମ୍ବର ୨୩ରୁ ୩୧ ମଧ୍ୟରେ ବ୍ରିଟେନକୁ ସମସ୍ତ ବିମାନ ଚଳାଚଳ ବନ୍ଦ କରିଛି ଭାରତ । ଏହାସହ ବ୍ରିଟେନରୁ ଆସୁଥିବା ସମସ୍ତ ଯାତ୍ରୀଙ୍କ RTPCR ଟେଷ୍ଟ ବାଧ୍ୟତାମୂଳକ କରାଯାଇଛି ।

ଅନ୍ୟପଟେ ନୂଆ ଭାଇରସ୍ ପାଇ ଆଗୁଆ ସତର୍କତାମୂଳକ ପଦକ୍ଷେପ ନେଇଛି ମହାରାଷ୍ଟ୍ର । ଜାନୁୟାରୀ ୫ ପର୍ଯ୍ୟନ୍ତ ରାଜ୍ୟର ମ୍ୟୁନିସିପାଲ କର୍ପୋରେସନ ସୀମା ମଧ୍ୟରେ ରାତ୍ରୀକାଳୀନ କର୍ଫ୍ୟୁ ଜାରି କରାଯାଇଛି । ରାତି ୧୧ଟାରୁ ଭୋର ୬ଟା ଯାଏଁ କଟକଣା ଲାଗୁ କରାଯାଇଛି । ଏହି ସମୟରେ କେବଳ ଜରୁରିକାଳୀନ ସେବାକୁ ଅନୁମତି ମିଳିବ ।

ତେବେ ବ୍ରିଟେନରେ ସ୍ଥିତି ନିୟନ୍ତ୍ରଣ ବାହାରକୁ ଯାଇନି ବୋଲି କହିଛି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚଓ) ।