ଗାନ୍ଧିଜୀଙ୍କ ତିନି ମାଙ୍କଡ ପରେ ଯୋଡି ହେଲା ଚତୁର୍ଥ ମାଙ୍କଡ: ଖରାପ କଥା ଚିନ୍ତା ନକରିବାକୁ ଦେଉଛି ବାର୍ତ୍ତା

ଭୁବନେଶ୍ୱର: ଖରାପ କଥା ଦେଖିବିନି, ଖରାପ କଥା ଶୁଣିବିନି, ଖରାପ କଥା କହିବିନି । ସତ୍ୟ ଓ ଅହିଂସାର ଲଢେଇରେ ମହାତ୍ମା ଗାନ୍ଧୀଙ୍କ ଏହି ତିନୋଟି ମାଙ୍କଡ ସ୍ୱାଧୀନତା ସଂଗ୍ରାମ ସମୟରେ ଲୋକଙ୍କୁ ଅହିଂସାର ପଥ ଆପଣେଇବାକୁ ପ୍ରୋତ୍ସାହନ ଦେଇଥିଲେ । ଗାନ୍ଧୀଜୀଙ୍କୁ ଏହି ତିନୋଟି ମାଙ୍କଡର ମୂର୍ତ୍ତୀ ଦେଇଥିଲେ ଚୀନର ପ୍ରତିନିଧି ମଣ୍ଡଳ ।

ଗାନ୍ଧୀଜୀ ଏହି ମୂର୍ତ୍ତୀଗୁଡିକୁ ନିଜର ପେପର ୱେଟ ଭାବେ ବ୍ୟବହାର କରୁଥିଲେ । କିନ୍ତୁ ଏହାର ଉଦ୍ଦେଶ୍ୟ ସେ ତାଙ୍କ ଆଶ୍ରମକୁ ଆସୁଥିବା ଲୋକଙ୍କୁ ବୁଝାଇଥିଲେ । ଧିରେ ଧିରେ ତାଙ୍କ ଆଶ୍ରମର ଅନ୍ତେବାସୀମାନେ ମଧ୍ୟ ସେହି ଆଦର୍ଶରେ ଅନୁପ୍ରାଣିତ ହୋଇଯାଇଥିଲେ । ଏବେ କିନ୍ତୁ ଜଣେ ଶିକ୍ଷାବିତ ଚତୁର୍ଥ ମାଙ୍କଡର ଚିତ୍ରଣ କରିଛନ୍ତି । ଚତୁର୍ଥ ମାଙ୍କଡଟି ମୁଣ୍ଡରେ ହାତ ଦେଇ ବସିଛି । ଅର୍ଥାତ ଖରାପ କଥା ଚିନ୍ତା କରିବିନି ।

Honourable Governor has highly appreciated the endeavour of Prof. Sanjay Kumar Satapathy , Dean School of Commerce and Management of Ravenshaw University in acquiring the copyright on Fourth Monkey signifying 'THINK NO EVIL' .

— Governor Odisha (@GovernorOdisha) September 29, 2020

ରେଜିଷ୍ଟ୍ରାର ଅଫ କପିରାଇଟସ ଠାରୁ କପିରାଇଟ ପାଇଥିବା ଏହି ଶିକ୍ଷାବିତ ହେଲେ ପ୍ରଫେସର ସଂଜୟ ଶତପଥୀ । ଦୀର୍ଘ ବର୍ଷକାଳ ଏହା ଉପରେ ଅଧ୍ୟୟନ କରି ତଥ୍ୟ ପ୍ରମାଣ ସହ ସେ ରେଜିଷ୍ଟ୍ରାର ଅଫ କପିରାଇଟସଙ୍କ ନିକଟରେ କପିରାଇଟ ପାଇଁ ଆବେଦନ କରିଥିଲେ । ତାଙ୍କ ଏହି ଗବେଷଣା ଏବଂ ସମ୍ମାନ ପାଇଁ ରାଜ୍ୟପାଳ ପ୍ରଫେସର ଗଣେଷୀ ଲାଲ ମଧ୍ୟ ତାଙ୍କୁ ଶୁଭେଚ୍ଛା ଜଣାଇଛନ୍ତି ।