ଚିତ୍ରକୋଣ୍ଡା: ପୁଣି ଜବତ ହେଲା ବିପୁଳ ପରିମାଣର ଗଞ୍ଜେଇ। ରାଜ୍ୟରେ ବଢ଼ିବାରେ ଲାଗିଛି ଗଞ୍ଜେଇ ଚାଲାଣ। ରାଜ୍ୟର ବିଭିନ୍ନ ସ୍ଥାନରୁ ଜବତ ହେବାରେ ଲାଗିଛି ଗଞ୍ଜେଇ। ତେବେ ଚିତ୍ରକୋଣ୍ଡାରୁ ୯ଶହ କେଜି ଗଞ୍ଜେଇ ଜବତ ହୋଇଛି। ଚିତ୍ରକୋଣ୍ଡା ପୋଲିସ ଗଞ୍ଜେଇ ଜବତ କରିବା ସହ ଜଣେ ଚାଲାଣକାରୀକୁ ଗିରଫ କରିଛି।
ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଚିତ୍ରକୋଣ୍ଡା ଥାନା ଅଧିକାରୀଙ୍କ ନେତୃତ୍ୱରେ ଗୋଟିଏ ଟିମ ଚିତ୍ରକୋଣ୍ଡା/ ଜାନବାଇ ରାସ୍ତାରେ ପେଟ୍ରୋଲିଂ କରୁଥିଲା। ଜାନବାଇ ପଟୁ ଆସୁଥିବା ଏକ ପିକପ ଭ୍ୟାନକୁ ଅଟକାଇ ଯାଞ୍ଚ କରିବା ସମୟରେ ସେଥିରେ ୩୦ଟି ପେକେଟରେ ବିପୁଳ ପରିମାଣର ଗଞ୍ଜେଇ ଥିବା ଜାଣିବାକୁ ପାଇଥିଲା।
ଏଥିସହ ପୋଲିସ ଗାଡ଼ି ଚଲାଉ ଥିବା ଲୋକକୁ ଗିରଫ କରିବା ସହ ଗାଡିକୁ ମଧ୍ୟ ଜବତ କରି ଥାନାକୁ ଆଣିଛି। ୩୦ ପକେଟ ଗଞ୍ଜେଇକୁ ଓଜନ କରାଯିବା ପରେ ୯୦୦ କେଜି ଥିବା ଜଣାପଡ଼ିଥିଲା। ଅଭିଯୁକ୍ତ ର କହିବା ଅନୁଯାୟୀ ସବୁ ଗଂଜେଇ ପଡୋଶୀ ଆନ୍ଧ୍ରପ୍ରଦେଶ କୁ ଚୋରା ଚାଲାଣ କରାଯାଉଥିଲା । ତେବେ ଜବତ ହୋଇଥିବା ଗଞ୍ଜେଇର ଆନୁମାନିକମୂଲ୍ୟ ୯୦ ଲକ୍ଷ ହୋଇଥିବା ଜଣାପଡ଼ିଛି।
