ସୈନିକ ସ୍କୁଲରେ ଛାତ୍ରଙ୍କୁ ନିର୍ଦ୍ଧୁମ ମାଡ଼, ୪ ଛାତ୍ରଙ୍କୁ ପାଇପରେ ପିଟିଲେ ଓ୍ବାର୍ଡେନ

ସମ୍ବଲପୁର: ସମ୍ବଲପୁର ସୈନିକ ସ୍କୁଲରେ ଛାତ୍ରଙ୍କୁ ନିର୍ଦ୍ଧୁମ ମାଡ଼ । ସ୍କୁଲର ୪ ଜଣ ଛାତ୍ରଙ୍କୁ ଓ୍ୱାର୍ଡେନ୍ ଦେବଶ୍ରୀ ପ୍ରଧାନ ନିସ୍ତୁକ ମାଡ଼ ମାରିଥିବା ଅଭିଯୋଗ ହୋଇଛି । ତେବେ କେଉଁ କାରଣ ପାଇଁ ମାଡ଼ି ମରାଗଲା ତା’ର କାରଣ ଅସ୍ପଷ୍ଟ ରହିଛି । ଏନେଇ ଆହତ ଛାତ୍ରଙ୍କ ଅଭିଭାବକ ବୁର୍ଲା ଥାନାରେ ଏତଲା ଦେଇଛନ୍ତି । ମୋଟ ୪ ଜଣ ଛାତ୍ରଙ୍କୁ ଓ୍ବାର୍ଡେନ୍ ପ୍ଲାଷ୍ଟିକ ପାଇପରେ ନିସ୍ତୁକ ମାଡ଼ ମାରି ଲହୁ ଲୁହାଣ କରିଥିଲେ । ଏପରିକି ମେଜର ରାଠି ମଧ୍ୟ ଛାତ୍ରଙ୍କୁ ମାଡ଼ ମାରିଛନ୍ତି ବୋଲି ଓ୍ୱାର୍ଡେନ କହିଛନ୍ତି । ବିଶୃଙ୍ଖଳା କଲେ ଏଭଳି ମାଡ଼ ମରାଯାଏ ବୋଲି ସଂପୃକ୍ତ ୱାର୍ଡେନ କହୁଥିବା ବେଳେ, ପରିବାର ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।

ସୈନିକ ସ୍କୁଲରେ ଛାତ୍ରମାନେ ବିଶୃଙ୍ଖଳା କଲେ ସେମାନଙ୍କୁ ଗାଇଡଲାଇନ ଅନୁସାରେ ଦଣ୍ଡବିଧାନ ନିୟମ ରହିଛି । କିନ୍ତୁ, ଅମାନୁଷିକ ଭାବରେ ଛାତ୍ରଙ୍କୁ ପାଇପରେ ମାଡ଼ ମାରିବା କେତେଦୂର ଯଥାର୍ଥ ବୋଲି ଅଭିଭାବକମାନେ ପ୍ରଶ୍ନ କରିଛନ୍ତି । ଲଗାତାର ଭାବରେ ପ୍ରତିଦିନ ରାତିରେ ଛାତ୍ରଙ୍କୁ ଏଭଳି ଅମାନୁଷିକ ଭାବରେ ମାଡ଼ ମରାଯାଉଥିବା ଆହତ ଛାତ୍ରମାନେ କହିଛନ୍ତି ।