ଗାଧୋଇବା ବେଳେ କୋଏଲ ନଦୀରେ ବୁଡ଼ିଗଲେ ୪ ଛାତ୍ର

ରାଉରକେଲା: ରାଉରକେଲା ସହର ନିକଟସ୍ଥ ଝିରପାଣୀ ଜମସେରା ଘାଟରେ ଅଘଟଣ । ଜାମସେରା ଘାଟରେ ଗାଧୋଇବା ସମୟରେ କୋଏଲ ନଦୀରେ ୪ ଜଣ ଛାତ୍ର ବୁଡ଼ି ଯାଇଥିଲେ । ସ୍ଥାନୀୟ ବାସିନ୍ଦା ଜଣେ ଛାତ୍ରଙ୍କୁ ତୁରନ୍ତ ଉଦ୍ଧାର କରିଥିବା ବେଳେ ଅନ୍ୟ ୨ ଜଣଙ୍କ ମୃତଦେହ ଉଦ୍ଧାର କରିଚି ଅଗ୍ନିଶମ ବାହିନୀ । ତେବେ ଅନ୍ୟଜଣେ ନିଖୋଜ ଥିବାରୁ ଉଦ୍ଧାର କାର୍ଯ୍ୟ ଜାରି ରହିଛି ।

ରାଉରକେଲା ସହରର ଏକ ଇଂରାଜୀ ମାଧ୍ୟମ ବିଦ୍ୟାଳୟର ୯ ଜଣ ଛାତ୍ର ବଣଭୋଜି କରିବା ପାଇଁ ଆସିଥିଲେ । କୋଏଲ ନଦୀ କୂଳରେ ବଲ୍ ଖେଳିବା ପରେ ଗାଧୋଇବା ପାଇଁ ଯାଇଥିଲେ । ଏହି ସମୟରେ ସେମାନଙ୍କ ମଧ୍ୟରୁ ୪ ଜଣ ବୁଡ଼ି ଯାଉଥିବା ଦେଖି ସ୍ଥାନୀୟ ଲୋକେ ଜଣଙ୍କୁ ଉଦ୍ଧାର କରିଥିଲେ ।

ଅଗ୍ନିଶମ ବିଭାଗକୁ ଖବର ଦେବା ପରେ ବିଶ୍ରା ଓ ନୂଆଗାଁ ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ତେବେ ଅନ୍ଧାର ହୋଇଯାଇଥିବାରୁ ଆସନ୍ତାକାଲି ପୁଣି ଉଦ୍ଧାର କାର୍ଯ୍ୟ କରାଯିବ ।