କରୋନା ପରୀକ୍ଷା ପାଇଁ ଯାଇଥିବା ୪ଟି ନମୁନା ନେଗେଟିଭ୍
1 min read
ଭୁବନେଶ୍ୱର: କରୋନା ଭୂତାଣୁ ସଂକ୍ରମଣ ପରୀକ୍ଷା ପାଇଁ ଯାଇଥିବା ୪ଟି ନମୁନା ନେଗେଟିଭ୍ ଆସିଛି । ନଭେଲ କରୋନା ସଂକ୍ରମଣ ଲକ୍ଷଣ ଥିବା ୫ ଜଣ ବ୍ୟକ୍ତିଙ୍କ ସ୍ୱାବ୍ ଓ ରକ୍ତ ନମୁନା ପୁନେ ସ୍ଥିତ ନ୍ୟାସନାଲ୍ ଇନ୍ଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିକୁ ପଠାଯାଇଥିଲା । ସେଥିମଧ୍ୟରୁ ୪ ଜଣଙ୍କ ରିପୋର୍ଟ ନେଗେଟିଭ୍ ଆସିଛି ।
ଅନ୍ୟ ପକ୍ଷରେ ଉହାନ୍ ୟୁନିଭରସିଟିରୁ ଫେରିଥିବା ଜନୈକା ଓଡ଼ିଶାର ଛାତ୍ରୀ ଓ ତାଙ୍କ ସ୍ୱାମୀଙ୍କୁ ସନ୍ଦେହ ତାଲିକାଭୁକ୍ତ କରି ଏସ୍ସିବି ମେଡିକାଲ କଲେଜ ଓ ହସ୍ପିଟାଲର ଆଇସୋଲେସନ୍ ଓ୍ୱାର୍ଡରେ ଭର୍ତ୍ତି କରାଯାଇ ଚିକିତ୍ସା ଆରମ୍ଭ କରାଯାଇଛି । ଏ ଦିଗରେ ସତର୍କ ଦୃଷ୍ଟି ରଖାଯାଇଛି । ରାଜ୍ୟର ସମସ୍ତ ଜିଲ୍ଲା ପ୍ରଶାସନ ପକ୍ଷରୁ ବ୍ୟକ୍ତିବିଶେଷ, ଶିକ୍ଷାନୁଷ୍ଠାନ, ବ୍ୟବସାୟିକ ପ୍ରତିଷ୍ଠାନ ଏବଂ ବିଭିନ୍ନ କର୍ମସଂସ୍ଥାନମାନଙ୍କୁ ୨୦୨୦ ମସିହା ଜାନୁଆରୀ ୧୫ ତାରିଖ ପରେ, ଚୀନ, ହଂକଂ, ଥାଇଲାଣ୍ଡ ଓ ସିଙ୍ଗାପୁରରୁ ଦେଶକୁ ଫେରିଥିବା ବ୍ୟକ୍ତିମାନଙ୍କ ସମ୍ପର୍କରେ ସ୍ୱାସ୍ଥ୍ୟ ବିଭାଗର କଣ୍ଟ୍ରୋଲ ରୁମ୍କୁ ୦୬୭୪-୨୩୯୦୪୬୬/୯୪୩୯୯୯୪୮/୯୪୩୭୦୪୦୫୬୪ ନମ୍ୱରେ ସୂଚନା ପ୍ରଦାନ ପାଇଁ ନିର୍ଦ୍ଦେଶ ଜାରି କରାଯାଇଛି । ଆକ୍ରାନ୍ତ ଲକ୍ଷଣ ଥିବା ବ୍ୟକ୍ତିମାନଙ୍କ ନାମ, ଠିକଣା ଓ ବ୍ୟକ୍ତିଗତ ତଥ୍ୟକୁ ଗୋପନ ରଖାଯିବ । ଏହି ସୂଚନାକୁ ବାଧ୍ୟତାମୂଳକ କରାଯାଇଥିବା ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ପ୍ରେସ୍ ବିଜ୍ଞପ୍ତି ମାଧ୍ୟମରେ କୁହାଯାଇଛି ।
