ଆଜି ସରୁଛି ମନୀଷ ଅଭିଯୁକ୍ତଙ୍କ ୪ ଦିନିଆ ରିମାଣ୍ଡ ଅବଧି, ଆଉଥରେ ରିମାଣ୍ଡ ପାଇଁ ହୋଇପାରେ ଆବେଦନ

ଭୁବନେଶ୍ୱର: ବହୁ ଚର୍ଚ୍ଚିତ ଭୁବନେଶ୍ୱର ମନୀଷ ଅନୁରାଗ ହତ୍ୟା ମାମଲା। ଆଜି ସରୁଛି ଗିରଫ ହୋଇଥିବା ୩ ଅଭିଯୁକ୍ତଙ୍କ ୪ ଦିନିଆ ରିମାଣ୍ଡର ଅବଧି। ରିମାଣ୍ଡରେ ୩ ଅଭିଯୁକ୍ତଙ୍କୁ ଜେରା କରୁଛି ପୋଲିସ। ମନୀଷଙ୍କୁ କେମିତି ହତ୍ୟା କଲେ ? କିଏ ପ୍ରଥମେ ମନୀଷକୁ ମାରିଲା ? ପୋଖରୀ ପାଖକୁ ମନୀଷକୁ ନେଇ ଗଲେ କେମିତି ? ମନୀଷଙ୍କ ମୋବାଇଲ ଏବେ କେଉଁଠି ? ଏ ସମସ୍ତ ଦିଗକୁ ନେଇ ଖୋଳତାଡ କରୁଛି ପୋଲିସ। ହେଲେ ଏବେ ବି ମନୀଷଙ୍କ ମୋବାଇଲ୍ ପାଖରେ ପହଞ୍ଚି ପାରିନି ପୋଲିସ। ପୋଖରୀ ଭିତରେ ମୋବାଇଲ୍ ପଡିଥିବା ସନ୍ଦେହ କରାଯାଉଛି। ପଟିଆରୁ ପାତ୍ରପଡା ଅଭିଯୁକ୍ତମାନେ ଯେଉଁ ସ୍ଥାନକୁ ଯାଇଥିଲେ, ସେ ସମସ୍ତ ସ୍ଥାନକୁ ଯାଇ ପ୍ରମାଣ ଯୋଗାଡ କରିଛି ପୋଲିସ। ଗତ ୯ ତାରିଖରେ ୩ଟି ବାରକୁ ଯାଇଥିଲେ ମନୀଷ, ଅମ୍ରିତ, ମୃତ୍ୟୁଞ୍ଜୟ ଓ ଦିନେଶ। ବାରରେ ୬୭ ହଜାର ଟଙ୍କା ଖର୍ଚ୍ଚ କରିଥିବା ଜେରା ବେଳେ ମାନିଛନ୍ତି ଅଭିଯୁକ୍ତ। ଗିରଫ ପୂର୍ବରୁ ବୟାନ ଏବେର ବୟାନକୁ ନେଇ ତଜର୍ମା କରୁଛି ପୋଲିସ। କୋର୍ଟରେ ହାଜର କରିବା ପୂର୍ବରୁ ପ୍ରମାଣ ଯୋଗାଡ କରିବାରେ ଲାଗିଛି ପୋଲିସ। ତେବେ ଆଜି କୋର୍ଟରେ ପୋଲିସ୍‌ ଆଉଥରେ ରିମାଣ୍ଡ ପାଇଁ ଆବେଦନ କରିପାରେ।