ଦୁଲୁକୁଛି ଅର୍କକ୍ଷେତ୍ର, ସଂସ୍କୃତି ଓ ଐତିହ୍ୟ ସୁରକ୍ଷାର ବାର୍ତ୍ତା ପ୍ରଦାନ କରୁଛନ୍ତି ଦେଶବିଦେଶର ବାଲୁକା ଶିଳ୍ପୀ

କୋଣାର୍କ: ଦୁଲୁକୁଛି ଅର୍କକ୍ଷେତ୍ର। ଆରମ୍ଭ ହୋଇଛି ଶାସ୍ତ୍ରୀୟ ନୃତ୍ୟ ମହାକୁମ୍ଭ । ଏଥିପାଇଁ ଚଳଚଞ୍ଚଳ କୋଣାର୍କ। ସଂସ୍କୃତି ଓ ଐତିହ୍ୟର ସୁରକ୍ଷାର ବାର୍ତ୍ତା ପ୍ରଦାନ କରିଛନ୍ତି ଦେଶ ବିଦେଶର ୧୦୦ରୁ ଉର୍ଦ୍ଧ୍ୱ ବାଲୁକା କଳା ଶିଳ୍ପୀ। ୫ଦିନ ବ୍ୟାପୀ ଆୟୋଜିତ ୩୪ତମ କୋଣାର୍କ ଉତ୍ସବକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲରେ ଉଦଘାଟନ କରିଥିବା ବେଳେ ମଞ୍ଚରେ ମୁଖ୍ୟ ଅତିଥି ଭାବେ ରାଜ୍ୟ ପର୍ଯ୍ୟଟନ ବିଭାଗ ମନ୍ତ୍ରୀ ଅଶ୍ୱିନୀ ପାତ୍ର ପ୍ରଦୀପ ପ୍ରଜ୍ଜ୍ୱଳନ କରି ସାଂସ୍କୃତିକ ସନ୍ଧ୍ୟାର ଆରମ୍ଭ କରିଛନ୍ତି।

ସେହିପରି ରାଜ୍ୟ ପର୍ଯ୍ୟଟନ ବିଭାଗ ଦ୍ଵାରା ଚନ୍ଦ୍ରଭାଗା ସ୍ବର୍ଣ୍ଣାଭ ବେଳାଭୂମିରେ ଆୟୋଜିତ ବାଲୁକା କଳା ଉତ୍ସବ ରାଜ୍ୟ ଯୁବ କ୍ରୀଡା ଓ ଗୃହରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରାଙ୍କ ଦ୍ୱାରା ଉଦଘାଟିତ ହୋଇଯାଇଛି। ୫ଦିନ ବ୍ୟାପୀ ଚାଲିବାକୁ ଥିବା ଏହି ଉତ୍ସବର ପ୍ରଥମ ଦିନରେ ଓଡ଼ିଶାର ସଂସ୍କୃତି ଓ ଐତିହ୍ୟ ବିଷୟବସ୍ତୁ ଉପରେ ଆଧାରିତ ବାଲୁକା କଳା ମାଧ୍ୟମରେ ଶିଳ୍ପୀମାନେ ଆମ ସଂସ୍କୃତି ଓ ଐତିହ୍ୟର ସୁରକ୍ଷା ବାର୍ତ୍ତା ପ୍ରଦାନ କରିଛନ୍ତି। ବାଲୁକା କଳା ମାଧ୍ୟମରେ ଚମତ୍କାର ବାଲୁକା କଳା ପ୍ରଦର୍ଶିତ କରି ଦର୍ଶକଙ୍କ ମନ ମୋହିଛନ୍ତି। ୩୦ଟି ଷ୍ଟଲରେ ଶିଳ୍ପୀ ମାନେ ବାଲୁକା କଳା ପ୍ରଦର୍ଶିତ କରିଛନ୍ତି ।

ମୁକ୍ତାକାଶ ରଙ୍ଗମଞ୍ଚରେ ଆୟୋଜିତ କୋଣାର୍କ ଉତ୍ସବର ପ୍ରଥମ ସନ୍ଧ୍ୟାରେ କଟକର ସୁର ମନ୍ଦିରର ପ୍ରତିଷ୍ଠିତ ନୃତ୍ୟଶିଳ୍ପୀ ଜ୍ୟୋସ୍ନା ରାଣୀ ସାହୁ ଓ ସାଥି କଳାକାର ମାନଙ୍କ ଦ୍ୱାରା ଓଡିଶୀ ଶୈଳୀରେ ସୂର୍ଯ୍ୟଉପାସନାରେ ନାନ ନିନାଦ ସୁର ଳେ ତାଳ ଓ ମାନର ପ୍ରତିବେଦନ ପ୍ରତିଫଳିତ ହୋଇଥିଲା । ପରେ ନୃତ୍ୟାଙ୍ଗନା ମାନଙ୍କ ଦ୍ୱାରା ସରଣମ ରେ ଭକ୍ତ ଓ ଭଗବାନଙ୍କ ମଧ୍ୟରେ ଥିବା ମଧୁର ସମ୍ପର୍କକୁ ପରିପ୍ରକାଶ କରିଥିଲେ। ଦ୍ବିତୀୟ ସଂଧ୍ୟାରେ ଆଜି ଓଡ଼ିଶୀ ଓ କୁଚିପୁଡି ନୃତ୍ୟ ପରିବେଷଣ ହେବ।