ଇସ୍ରାଏଲ-ହମାସ ଅସ୍ତ୍ରବିରତି ନେଇ ଜାତିସଂଘରେ ପ୍ରସ୍ତାବ, ୩୪ଟି ରାଷ୍ଟ୍ର ଦେଲେନି ଭୋଟ

ନ୍ୟୁୟର୍କ: ଇସ୍ରାଏଲ-ହମାସ ମଧ୍ୟରେ ତୁରନ୍ତ ଅସ୍ତ୍ରବିରତି ସଂକ୍ରାନ୍ତ ଜାତିସଂଘ ସାଧାରଣ ଆସେମ୍ବିଲିର ଏକ ପ୍ରସ୍ତାବରୁ ବିରତ ରହିଛି ଭାରତ । ଇସ୍ରାଏଲ-ହମାସ ମଧ୍ୟରେ ଅସ୍ତ୍ରବିରତି ନେଇ ୧୯୩ ସଦସ୍ୟ ବିଶିଷ୍ଟ ଜାତିସଂଘ ସାଧାରଣ ଆସେମ୍ବ୍ଲିର ଦଶମ ଜରୁରୀ ଅଧିବେଶନ ବସିଥିଲା । ଅସ୍ତ୍ରବିରତି ପ୍ରସ୍ତାବକୁ ଜୋର୍ଡାନ ଆଗତ କରିଥିବାବେଳେ ଏହାକୁ ବାଂଲାଦେଶ, ମାଳଦ୍ବୀପ, ପାକିସ୍ତାନ, ଋଷ ଓ ସାଉଥଆଫ୍ରିକା ସମ୍ମତି ଜଣାଇଥିଲେ ।

ପ୍ରସ୍ତାବ ସପକ୍ଷରେ ୧୨୦ ରାଷ୍ଟ୍ର ଭୋଟ ଦେଇଥିବାବେଳେ ବିପକ୍ଷରେ ୧୪ ରାଷ୍ଟ୍ର ଭୋଟ ଦେଇଥିଲେ । ୩୪ଟି ରାଷ୍ଟ୍ର ଭୋଟଦାନରୁ ବିରତ ରହିଥିଲେ । ଭାରତ ସମେତ ଅଷ୍ଟ୍ରେଲିଆ, କାନାଡା, ଜର୍ମାନୀ, ଜାପାନ, ୟୁକ୍ରେନ ଓ ବ୍ରିଟେନ ଭୋଟଦାନରୁ ବିରତ ରହିଥିଲେ । ତେବେ ଜୋର୍ଡାନ ପକ୍ଷରୁ ଆଗତ ପ୍ରସ୍ତାବରେ ହମାସ ସଂଗଠନ ସମ୍ପର୍କରେ କୌଣସି ତଥ୍ୟ ନଥିବା ଜଣାଯାଇଛି ।

ତୁରନ୍ତ ଅସ୍ତ୍ରବିରତି ସହ ମାନବିକତା ଦୃଷ୍ଟିରୁ ଯୁଦ୍ଧବନ୍ଦ ଲାଗି ପ୍ରସ୍ତାବରେ ରହିଥିଲା ଉଲ୍ଲେଖ । ସେପଟେ ଭୋଟଦାନରୁ ବିରତ ରହିବା ଘଟଣାକୁ ନେଇ ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ।