ଋଷ- ୟୁୁକ୍ରେନ୍ ଯୁଦ୍ଧକୁ ପୂରିଲା ୩୦୦ ଦିନ, ସରି ନାହିଁ ହାର୍ ଜିତର ହିସାବ

କିଭ୍ : ଋଷ- ୟୁୁକ୍ରେନ୍ ଯୁଦ୍ଧକୁ ପୂରିଲା ୩୦୦ ଦିନ । ହେଲେ ସରି ନାହିଁ ହାର୍ ଜିତର ହିସାବ । ଅସମାହିତ ଅବସ୍ଥାରେ ଜାରି ରହିଛି ଯୁଦ୍ଧର ଗତି । ଋଷ ଓ ୟୁକ୍ରେନ ମଧ୍ୟରେ ଟକରାଟକରି ଚାଲିଥିବା ସହ ରକ୍ତମୁଖା ହମଲା ଜାରି ରହିଛି । ଗତ ଫେବୃଆରୀ ୨୪ରେ ଆରମ୍ଭ ହୋଇଥିବା ଯୁଦ୍ଧ ବର୍ତ୍ତମାନ ସୁଦ୍ଧା ନିର୍ଣ୍ଣାୟକ ସ୍ଥିତିରେ ପହଞ୍ଚିପାରୁନି । ଯୁଦ୍ଧରେ ଉଭୟ ପକ୍ଷର ଲକ୍ଷାଧିକ ଲୋକ ଓ ସୈନ୍ୟଙ୍କ ମୃତ୍ୟୁ ଘଟିଥିବାବେଳେ ସହସ୍ରାଧିକ ଲୋକ ହୋଇଛନ୍ତି ଯୁଦ୍ଧବନ୍ଦୀ ।

ପ୍ରାୟ ୭୦ ଲକ୍ଷ ୟୁକ୍ରେନୀୟ ବର୍ତ୍ତମାନ ସୁଦ୍ଧା ବିଭିନ୍ନ ପଡୋଶୀ ରାଷ୍ଟ୍ରରେ ଶରଣାର୍ଥୀ ସାଜିଛନ୍ତି । ହଜାର ହଜାର କୋଠା, ପ୍ରତିଷ୍ଠାନ, ସରକାରୀ କାର୍ଯ୍ୟାଳୟ, ଡାକ୍ତରଖାନା ନଷ୍ଟ ହୋଇଗଲାଣି । ହଜାର ହଜାର ଶିଶୁ ବେଘର ବା ପତ୍ତାହୀନ । ବହୁ ପାଓ୍ବାରଗ୍ରୀଡ ଧ୍ବଂସ ହେବାରୁ ୟୁକ୍ରେନର ଖେରସନ ସମେତ ଅନେକ ସହର ଅନ୍ଧାର ଭିତରେ ରହିଛନ୍ତି ।

ହେଲେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଆସନ୍ତାବର୍ଷରୁ ୟୁକ୍ରେନ ବିରୋଧରେ ଭୟାନକ ଆକ୍ରମଣ କରିବାର ଷଡଯନ୍ତ୍ର ଜାରି ରଖିଛି । ସେପଟେ ୟୁକ୍ରେନ ସୀମାନ୍ତ ଅନ୍ତର୍ଗତ ଦକ୍ଷିଣାଞ୍ଚଳ ଋଷୀୟ ଅଞ୍ଚଳରେ ୪ଟି ଆମେରିକା ନିର୍ମିତ କ୍ଷେପଣାସ୍ତ୍ରକୁ ଏୟାର ଡିଫେନସ ସିଷ୍ଟମ ଖସାଇ ଦେଇଥିବା ଦାବି କରିଛି ଋଷ । ଏହି କ୍ଷେପଣାସ୍ତ୍ରଗୁଡିକ ଏଚଏଆରଏମ ଆଣ୍ଟି ରାଡାର ମିସାଇଲ ବୋଲି ସୂଚନା ମିଳିଛି ।