ଗୁଳିମାଡ଼ କରି ଆକାଉଣ୍ଟାଣ୍ଟଙ୍କ ପାଖରୁ ୩ଲକ୍ଷ ୨୦ହଜାର ଟଙ୍କା ଲୁଟ
ବାଲେଶ୍ବର: ବାଲେଶ୍ବର ବଣପାରିଆରେ ୧୬ନଂ ଜାତୀୟ ରାଜପଥରେ ଗୁଳିମାଡ଼ କରି ଲୁଟ୍ । ଆକାଉଣ୍ଟାଣ୍ଟଙ୍କ ନିକଟରୁ ୩ଲକ୍ଷ ୨୦ହଜାର ଟଙ୍କା ଲୁଟ୍ ଅଭିଯୋଗ । ୩ଜଣ ଲୁଟେରା ଏକ ମୋଟରସାଇକେଲରେ ଆସି ୨ରାଉଣ୍ଡ ଗୁଳି ଚଳାଇ ଲୁଟ କରିଥିବା ଜଣାପଡ଼ିଛି । ଲୁଟେରାଙ୍କ ଗୁଳି ମାଡ଼ରେ ଆକାଉଣ୍ଟାଣ୍ଟ ଅଶୋକ କୁମାର ଜେନା ଆହତ ହୋଇଛନ୍ତି । ତାଙ୍କ ବାମପାଦରେ ଗୁଳି ବାଜିଛି ।
ପୋଲିସ ଘଟଣାସ୍ଥଳରେ ପହଞ୍ଚି ଆହତ ଅଶୋକଙ୍କୁ ଉଦ୍ଧାରକରି ଡ଼ାକ୍ତରଖାନାରେ ଭର୍ତ୍ତି କରିଛି । ଅଶୋକ ବଣପାରିଆରେ ଥିବା ଏକ ଜେସିବି କମ୍ପାନୀ ସୋ’ରୁମ୍ରେ ଆକାଉଣ୍ଟାଣ୍ଟ ଭାବେ କାମ କରନ୍ତି । ସେ ୩ଲକ୍ଷ ୨୦ହଜାର ଟଙ୍କା ନେଇ ବ୍ୟାଙ୍କରେ ଜମା କରିବାକୁ ଯାଉଥିଲେ । ୩ଜଣ ଦୁର୍ବୃତ୍ତ ବାଇକରେ ଆସି ତାଙ୍କୁ ଅଟକିବାକୁ କହିଥିଲେ ।
ଅଶୋକ ନଅଟକିବାରୁ ତାଙ୍କ ଉପରକୁ ଦୁର୍ବୃତ୍ତମାନେ ଗୋଟିଏ ରାଉଣ୍ଡ ଗୁଳି ଚଳାଇଥିଲେ । ଅଶୋକ ତଳେ ପଡ଼ିଯାଇଥିଲେ । ତାଙ୍କ ନିକଟରେ ଥିବା ଟଙ୍କା ବ୍ୟାଗ୍କୁ ନେଇ ଲୁଟେରାମାନେ ଚମ୍ପଟ ମାରିଛନ୍ତି । ସଦର ଥାନାର ମାତ୍ର ଏକ କିଲୋମିଟର ଦୂରରେ ଏଭଳି ଘଟଣା ଘଟିଛି ।
