ଅଭାବନୀୟ ଘଟଣା, ଜଙ୍ଗଲରୁ ଏକାଥରକେ ତିନି ଜଣଙ୍କ ଝୁଲନ୍ତା ମୃତଦେହ ଉଦ୍ଧାର

ଅନୁଗୁଳ: ଅନୁଗୁଳ ଛେଣ୍ଡିପଦା ଥାନା ବାଲିପଟା ଜଙ୍ଗଲର ଅଭାବନୀୟ ଘଟଣା । ଜଙ୍ଗଲରୁ ଏକାଥରକେ  ମୃତଦେହ ଉଦ୍ଧାର । ୩ ଜଣ ମୃତକଙ୍କ ମଧ୍ୟରେ ଦୁଇ ଜଣ ଯୁବକ ଥିବା ବେଳେ ଜଣେ ଯୁବତୀଙ୍କ ମୃତ ଦେହ ଉଦ୍ଧାର କରାଯାଇଛି । ତେବେ ମୃତଦେହ ଗୁଡ଼ିକ ଅନେକ ଦିନ ଧରି ଜଙ୍ଗଲରେ ସେହିଭଳି ଝୁଲନ୍ତା ଅବସ୍ଥାରେ ରହିଥିବା ଜଣାପଡ଼ିଛି ।

କିଛି ଗ୍ରମବାସୀ ଜଙ୍ଗଲ ଭିତର ଦେଇ କୌଣସି କାମରେ ଯାଇଥିବା ବେଳେ ମୃତଦେହ ଗୁଡ଼ିକ ଝୁଲୁଥିବା ଦେଖିବାକୁ ପାଇଥିଲେ । ସେମାନେ ତୁରନ୍ତ ଅନ୍ୟ ଲୋକଙ୍କୁ ସୂଚନା ଦେବା ସହ ପୋଲିସ୍‌କୁ ଖବର ଦେଇଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ୩  ମୃତ ଦେହକୁ ଉଦ୍ଧାର କରିଛି ।

ତେବେ ପ୍ରେମ ଜନିତ କାରଣରୁ ସେମାନେ ଆତ୍ମହତ୍ୟା କରିଥିବା ଲୋକମାନେ ସନ୍ଦେହ କରିଛନ୍ତି । ଗୋଟିଏ ଡାଳରେ ଜଣେ ଯୁବକ ଓ ଜଣେ ଯୁବତୀ ଏକା ସଙ୍ଗେ ବେଗରେ ଦଉଡ଼ି ଦେଇ ଆତ୍ମ ହତ୍ୟା କରିଥିବା ଦେଖିବାକୁ ମିଳିଥିବା ବେଳେ ଅନ୍ୟ ଜଣେ ଯୁବକ ଅନ୍ୟ ଏକ ଗଛ ଡାଳରେ ବହୁ ଉପରେ ଠିକ୍‌ ସେହିଭଳି ଝୁଲିଥିବା ଦେଖାଯାଇଛି ।

ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ଲୋକଙ୍କ ମନରେ ଭୟର ବାତାବରଣ ଖେଳିଯାଇଛି । ମୃତକମାନେ ନିକଟସ୍ଥ ଗାଁ ବାଲିପଶିର ବୋଲି ଅନୁମାନ କରାଯାଉଛି । ତେବେ ଏହା ହତ୍ୟାକାଣ୍ଡ ନା ଆତ୍ମହତ୍ୟା ଏବେ ବି ସନ୍ଦେହ ଘରରେ ରହିଛି । ମୃତଦେହ ଅନେକ ଦିନ ହେବ ଝୁଲି ରହିଥିବାରୁ ପଚି ଯାଇ ସେଥିରୁ ଦୁର୍ଗନ୍ଧ ବାହାରୁଛି । ଛେଣ୍ଡିପଦା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।

ତେବେ ପ୍ରଶ୍ନ ଉଠୁଛି ଯେ, ଯଦି ଗୋଟିଏ ଗଛରେ ଝୁଲୁଥିବା ଦୁଇ ଜଣ ଯୁବକ ଯୁବତୀ ପ୍ରେମ ପାଇଁ ଆତ୍ମହତ୍ୟା କରିଛନ୍ତି ତେବେ ତୃତୀୟ ଯୁବକ କଣ ପାଇଁ ଆତ୍ମହତ୍ୟା କରିଛନ୍ତି । ସୂଚନାଯୋଗ୍ୟ ଯେ, ତୃତୀୟ ଯୁବକ ପ୍ରଥମ ଯୁବକଙ୍କ ସାଙ୍ଗ । ୨୦୧୮ ମସିହାରୁ ଯୁବକ-ଯୁବତୀଙ୍କ ମଧ୍ୟରେ ପ୍ରେମ ସଂପର୍କ ଥିଲା । ଏବେ କେଉଁ ପରିସ୍ଥିତିରେ ସେମାନେ ଓ ତାଙ୍କ ବନ୍ଧୁଙ୍କ ମୃତ୍ୟୁ ହେଲା ତାକୁ ନେଇ ସନ୍ଦେହ ସୃଷ୍ଟି ହେଉଛି । ପରିବାର ବର୍ଗଙ୍କ ସନ୍ଦେହ ଯେ,ସେମାନଙ୍କୁ ହତ୍ୟା କରି ଝୁଲାଇ ଦିଆଯାଇଛି ।