ବରଗଡ଼ରେ ୨୯୭ ଗ୍ରାମ୍ ବ୍ରାଉନ ସୁଗାର ସହ ଲକ୍ଷାଧିକ ଟଙ୍କା ଜବତ, ଜଣେ ଗିରଫ
ବରଗଡ଼: ବରଗଡ଼ରେ ୨୯୭ ଗ୍ରାମ୍ ବ୍ରାଉନ ସୁଗାର ଜବତ କରିବା ସହ ଜଣେ ଅଭିଯୁକ୍ତକୁ ଗିରଫ କରିଛି ଅବକାରୀ ବିଭାଗ। ତା’ଠାରୁ ଲକ୍ଷାଧିକ ଟଙ୍କା ଜବତ କରିଛି ବରଗଡ଼ ଜିଲ୍ଲା ଅବକାରୀ ବିଭାଗ। ଜବତ ବ୍ରାଉନ ସୁଗାରର ମୂଲ୍ୟ ୩୦ ଲକ୍ଷ ଟଙ୍କାରୁ ଅଧିକ ହେବ। ବ୍ରାଉନ ସୁଗାର ବିକ୍ରି ଉଦ୍ୟମ ବେଳେ ବରଗଡ଼ ସହରର ମହାନ୍ତି ପଡ଼ା ଅଞ୍ଚଳରୁ ରାଜୁ ତାଣ୍ଡି ନାମକ ଯୁବକ ପାଖରୁ ତିରିଶ ଲକ୍ଷରୁ ଉର୍ଦ୍ଧ୍ୱ ଟଙ୍କାର ୨୯୭ ଗ୍ରାମ ବ୍ରାଉନ ସୁଗାର ଜବତ କରିଛି ଅବକାରୀ ବିଭାଗ।
ଏଥିସହ ଅଭିଯୁକ୍ତ ରାଜୁ ତାଣ୍ଡି ପାଖରୁ ଲକ୍ଷାଧିକ ଟଙ୍କା ଓ ମୋବାଇଲ ଫୋନ ଆଦି ଜବତ ହୋଇଛି । ଅଭିଯୁକ୍ତ ରାଜୁ ତାଣ୍ଡି କେଉଁ ଅଞ୍ଚଳରୁ ବ୍ରାଉନ ସୁଗାର ଆଣି ବିକ୍ରି କରୁଥିଲା ଏବଂ ଏହା ପଛରେ କେଉଁ ରାକେଟ କାମ କରୁଛି, ତାକୁ ନେଇ ଅଧିକ ଖୋଲତାଡ଼ ଚାଲିଛି । ଅଭିଯୁକ୍ତ ରାଜୁ ତାଣ୍ଡି ବରଗଡ଼ ସହରର ଧନୀ ପରିବାରର ଯୁବକ ଯୁବତୀଙ୍କଠାରୁ ଫୋନ ପେ, ଗୁଗୁଲ ପେ ମାଧ୍ୟମରେ ଟଙ୍କା ଆଣୁଥିବା ବରଗଡ଼ ଜିଲ୍ଲା ଅବକାରୀ ଅଧୀକ୍ଷକ ସୁବନ କୁମାର ନାୟକ ସୂଚନା ଦେଇଛନ୍ତି । ଖୁବ ଶୀଘ୍ର ବ୍ରାଉନ ସୁଗାର କାରବାରରେ ସଂଶ୍ଲିଷ୍ଟ ଥିବା ଅନ୍ୟମାନଙ୍କୁ ଗିରଫ କରାଯିବ ବୋଲି ସେ କହିଛନ୍ତି ।
