ଠକିଦେଲେ ବୈଜୟନ୍ତ: ୮ ବର୍ଷ ଖଟାଇଲେ, ପ୍ରାପ୍ୟ ଦେବା ବେଳକୁ ଛୁ…
1 min read
ଭୁବନେଶ୍ବର: ଠକି ଦେଲେ ବୈଜୟନ୍ତ ପଣ୍ଡା । ଆବଶ୍ୟକ ବେଳେ ଖଟାଇଲେ, ହେଲେ ପଇସା ଦେବା ବେଳକୁ ଧରାଛୁଆଁ ଦେଲେନି । ଲକ୍ଷେ କି ଦୁଇ ଲକ୍ଷ ଟଙ୍କା ନୁହେଁ ୨୭ ଲକ୍ଷ ଟଙ୍କା ଠକି ଦେଲା ପୂର୍ବରୁ ବୈଜୟନ୍ତଙ୍କ ମାଲିକାନାରେ ଥିବା ଓରଟେଲ୍ କମ୍ପାନୀ । ୮ ବର୍ଷ ହେଲା ଜଗବନ୍ଧୁ ଟ୍ରାନ୍ସପୋର୍ଟ କମ୍ପାନୀର ମାଲିକ ଅଶ୍ବିନୀ ତ୍ରିପାଠୀ ଦୌଡ଼ି ଦୌଡ଼ି ନୟାନ୍ତ ହୋଇଥିବା ଅଭିଯୋଗ କରିଛନ୍ତି ।
ଏହାରି ଭିତରେ ଅଶ୍ବିନୀ ଅନେକ ଥର ଓରଟେଲ କାର୍ଯ୍ୟାଳୟ, ଓଟିଭି ଅଫିସ ସହିତ ପୂର୍ବତନ ମାଲିକ ବୈଜୟନ୍ତ ପଣ୍ଡାଙ୍କ ବାସଭବନ ଚକର କାଟି ନିରାଶ ହୋଇଛନ୍ତି । ଅଶ୍ୱିନୀଙ୍କ କଟକ ଜିଲ୍ଲା କଟକ ଜିଲ୍ଲା ଅସୁରେଶ୍ୱର ଜମରା ଗ୍ରାମର ବାସିନ୍ଦା । କଟକ ଜଗତପୁର ଶିଳ୍ପ ଅଞ୍ଚଳରେ ତାଙ୍କର ଏକ ଟ୍ରାନ୍ସପୋର୍ଟ କମ୍ପାନୀ ଖୋଲି ଥିଲେ । ୨୦୧୫ ମସିହାରେ ଓରଟେଲ କମ୍ପାନୀର HR ଓ ମ୍ୟାନେଜର ଅଶ୍ୱନୀଙ୍କୁ ଯୋଗାଯୋଗ କରିଥିଲେ । ମାସିକ ଗାଡି ଓରଟେଲ ଭଡ଼ା ସୂତ୍ରରେ ଲଗାଇବ ପାଇଁ ଅନୁରୋଧ କରିଥିଲେ । ମାସିକ ଗାଡି ଭଡ଼ା ବାବଦରେ ୫ ଲକ୍ଷ ଦେବେ ବୋଲି ସ୍ଥିର ହୋଇଥିଲା । ପରେ ଅଶ୍ଵନୀ ନିଜ ଗାଡି ସହ ବାହାରୁ ଭଡ଼ା ସୂତ୍ରରେ ଗାଡି ଆଣି ଓରଟେଲରେ ଲଗାଇଥିଲେ । ପ୍ରଥମେ ସବୁ କିଛି ଠିକ୍ ଚାଲିଥିଲା । ହେଲେ ୨୦୧୬ରୁ ଓରଟେଲ ଟଙ୍କା ଦେବା ବନ୍ଦ କରିଦେଇଥିଲା । ବୈଜୟନ୍ତ ପଣ୍ଡାଙ୍କୁ ଗୁହାରୀ କଲେ ଅପେକ୍ଷା କର ପଇସା ଦିଆଯିବ ହେଲେ କେବେ ଦେବେ କିଛି କହୁ ନଥିବା ସେ ଅଭିଯୋଗ କରିଛନ୍ତି ।
ଋଣ ପଇସା ନଦେବାରୁ ବନ୍ଧକ ରଖିଥିବା ଘର ସୁନା ଜବତ କରିଛି ବ୍ୟାଙ୍କ । ସେପଟେ ଅର୍ଥ ଅଭାବରୁ ଅଶ୍ବିନୀଙ୍କ ଦୁଇ ଝିଅଙ୍କ ପାଠ ପଢା ବି ବନ୍ଦ ହେଲାଣି । ଓଲଟେଲ୍ କମ୍ୟୁନିକେସନ ଅଫିସ ସମ୍ମୁଖରେ ଆମରଣ ଅନଶନ କରିଥିଲେ । ହେଲେ ଟଙ୍କା ବଦଳରେ ସେଠାରୁ ତଡି ଦିଆଗଲା । ମାନସିକ ନିର୍ଯାତନା ସହି ନପାରି ବ୍ରେନ୍ ଷ୍ଟ୍ରୋକ୍ରେ ଆକ୍ରାନ୍ତ ହେଲେ ଅଶ୍ବିନୀ । କଟକ ବଡ ମେଡିକାଲରେ ଚିକିତ୍ସିତ ହେବା ପରେ ଏବେ ପୁଣି ଟଙ୍କା ଫେରି ପାଇବା ପାଇଁ ଗୁହାରୀ କରିଛନ୍ତି । ଯଦି ଓରଟେଲ୍ କମ୍ୟୁନିକେସନ ୨୭ ଲକ୍ଷ ଟଙ୍କା ନଫେରାଇବ ତେବେ ପରିବାର ସହ କମ୍ପାନୀ ସମ୍ମୁଖରେ ଆତ୍ମହତ୍ୟା କରିବାକୁ ବାଧ୍ୟ ହେବେ ବୋଲି କହିଛନ୍ତି ଅଶ୍ବିନୀ । ସୂଚନାଯୋଗ୍ଯ, ବୈଜୟନ୍ତଙ୍କ ମାଲିକାନାରେ ଥିବା ଓରଟେଲ କମ୍ପାନୀ ଏବେ ଅନ୍ଯ ମାଲିକାନାକୁ ଚାଲିଯାଇଛି । ଏହାର ପୁରୁଣା ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ଯ ସେମାନଙ୍କ ପ୍ରତିକ୍ରିୟା ମିଳିପାରି ନାହିଁ ।
