ଆଫଗାନିସ୍ତାନରେ ଭୂକମ୍ପ ଝଟକା, ମୃତ ସଂଖ୍ୟା ୨୬କୁ ବୃଦ୍ଧି

କାବୁଲ: ଆଫଗାନିସ୍ତାନରେ ଭୂକମ୍ପ । ଆଫଗାନିସ୍ତାନରେ ହୋଇଥିବା ଭୂକମ୍ପରେ ୨୬ ଜଣଙ୍କର ମୃତ୍ୟୁ ହୋଇଛି । ତେବେ ମୃତାହତଙ୍କ ସଂଖ୍ୟା ଅଧିକ ହେବା ଆଶଙ୍କା କରାଯାଉଛି । ଗତକାଲି ପଶ୍ଚିମ ଆଫଗାନିସ୍ତାନରେ ଘଟିଥିବା ଭୂକମ୍ପର ତୀବ୍ରତା ରିକ୍ଟର ସ୍କେଲରେ ୫.୩ ଥିଲା । ବାଦଘିସ ପ୍ରଜାତନ୍ତ୍ର ଅନ୍ତର୍ଗତ କାଦିସ ଜିଲ୍ଲାରେ ଏହି ଭୂକମ୍ପ ସବୁଠାରୁ ଅଧିକ କ୍ଷତି ଘଟାଇଛି । ଘର ଭୁଶୁଡ଼ିବା ଯୋଗୁ ସେମାନଙ୍କ ମୃତ୍ୟୁ ହୋଇଥିବା କୁହାଯାଇଛି । ମୃତକଙ୍କ ମଧ୍ୟରେ ଅଛନ୍ତି ୫ ମହିଳା ଓ ୪ ଶିଶୁ । ୪ ଜଣରୁ ଅଧିକ ମଧ୍ୟ ଆହତ ହୋଇଥିବା ସୂଚନା ମିଳିଛି । ସେହିପରି ମୁକର ଜିଲ୍ଲା ବି ଭୂକମ୍ପରେ ପ୍ରଭାବିତ ହୋଇଛି ।

#UPDATE | The death toll in western Afghanistan earthquake rises to 26, reports AFP

— ANI (@ANI) January 17, 2022

ତାଲିବାନ ଶାସନ ପରଠାରୁ ଦେଶରେ ଅରାଜକତା, ବିପର୍ଯ୍ୟୟ, କ୍ଷୁଧା, ଅନାହାର ମୃତ୍ୟୁ ଆଦି ଜାରି ରହିଥିବାବେଳେ ଏହି ଭୂକମ୍ପ ଲକ୍ଷାଧିକ ଲୋକଙ୍କ ଲାଗି ପୁଣି ସଙ୍କଟ ସୃଷ୍ଟି କରିଛି । ଗତ ୨୦ ବର୍ଷ ଧରି କାଦିସ ଜିଲ୍ଲାରେ ଭୟଙ୍କର ମରୁଡ଼ି ଜାରି ରହିଥିବାବେଳେ କେବଳ ଆନ୍ତର୍ଜାତିକ ସହାୟତାକୁ ଆଶ୍ରା କରି ଜିଲ୍ଲାବାସୀ କାଳ କାଟିଆସୁଛନ୍ତି । ପୁଣି ଏହି ଅଞ୍ଚଳର ଭୂକମ୍ପପ୍ରବଣ ଅଞ୍ଚଳ ଭାବେ ପରିଗଣିତ ହେବା ସହ ବାରମ୍ବାର ଏଠାରେ ଭୂକମ୍ପ ପରିଲକ୍ଷିତ ହୋଇଆସୁଛି । ୨୦୧୫ରେ ଏହି ଅଞ୍ଚଳରେ ୭.୫ ତୀବ୍ରତାର ଭୂକମ୍ପ ଘଟିବାରୁ ୨୮୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିଲା ।