୨୦୨୩ ଓଡ଼ିଶା ପାଇଁ ଶୁଭଙ୍କର ବର୍ଷ ହେବ

ଭୁବନେଶ୍ବର: ନୂଆ ଆଶା ଓ ପ୍ରଗତି ନେଇ ଆସିବ ନୂଆବର୍ଷ । ଓଡ଼ିଶା ପାଇଁ ହେବ ଶୁଭଙ୍କର । ରାଜ୍ୟ ପ୍ରାକୃତିକ ବିପର୍ଯ୍ୟୟର ସାମ୍ନା କଲେ ମଧ୍ୟ ଜୀବନ ହାନି ହେବ ନାହିଁ । ଦେଶକୁ ମହାମାରୀ କରୋନା ପୁଣି ଥରେ ଫେରିଲେ ମଧ୍ୟ ଏତେଟା ଭୟଙ୍କର ହେବ ନାହିଁ । ୨୦୨୩ ବର୍ଷକୁ ନେଇ ଭୃଗୁ ଜ୍ୟୋତିଷମାନେ ରାଜ୍ୟ, ଦେଶ ତଥା ବିଶ୍ବ ପାଇଁ କରିଛନ୍ତି ଏପରି କିଛି ଭବିଷ୍ୟବାଣୀ ।

୨୦୨୩ ଓଡ଼ିଶା ପାଇଁ କେମିତି ରହିବ ? ଭାରତ ପ୍ରତି କିଛି ବିପଦ ଅଛି କି ? ଏନେଇ ଜ୍ୟୋତିଷ ଗଣନା ଆରମ୍ଭ ହୋଇଛି । ୨୦୨୩ ଓଡ଼ିଶା ପାଇଁ ଶୁଭଙ୍କର ହେବା ସହ ପ୍ରଗତିର ନୂଆ ଶିଖର ଛୁଇଁବ । ପ୍ରାକୃତିକ ବିପର୍ଯ୍ୟୟରେ ରାଜ୍ୟର ବିଶେଷ କିଛି କ୍ଷତି ହେବ ନାହିଁ । ଦେଶକୁ କୋଭିଡ୍‌ ଫେରିଲେ ମଧ୍ୟ ଭୟଙ୍କର ହେବ ନାହିଁ । ଋଷିଆ- ୟୁକ୍ରେନ ଯୁଦ୍ଧ ଶେଷ ହେବା ସହ ବିଶ୍ବଯୁଦ୍ଧର ଆଶଙ୍କା ଟଳିବ । ଜ୍ୟୋତିର୍ବିଦମାନେ ୨୦୨୩କୁ ନେଇ ଏପରି କିଛି ଭବିଷ୍ୟବାଣୀ କରିଛନ୍ତି । ୨୦୨୩ କେତୁର ବର୍ଷ ହେବ । ଦେଶ ତଥା ରାଜ୍ୟବାସୀ ଭଲରେ ରହିବେ ବୋଲି ଭୃଗୁ ଜ୍ୟୋତିଷମାନେ ଗଣନା କରିଛନ୍ତି ।

ଗୋମାତା, ବ୍ରାହ୍ମଣ, ପିତାମାତାଙ୍କୁ ପୂଜା କଲେ ଜୀବନ ସୁଖମୟ ହେବ । କଳିଯୁଗରେ ଏମାନେ ହିଁ ହେଉଛନ୍ତି ଅସଲ ଦେବତା । ଏମାନଙ୍କୁ ସମ୍ମାନ କଲେ ସମାଜରେ ସମ୍ମାନର ସହ ବଞ୍ଚିବାର ବାଟ ଫିଟିବ । ଭୁବନେଶ୍ବରରେ ଆୟୋଜିତ ଦୁଇଦିନିଆ ୧୫ତମ ଏସୀୟ ଭୃଗୁ ଜ୍ୟୋତିଷ ସମ୍ମିଳନୀରେ ଏଭଳି ମତ ରଖିଛନ୍ତି ଜ୍ୟୋତିର୍ବିଦ । ସମ୍ମିଳନୀରେ ଜ୍ୟୋତିଷଶାସ୍ତ୍ରକୁ ମାନ୍ୟତା, ଜ୍ୟୋତିଷମାନଙ୍କୁ କଳାକାର ଭତ୍ତା ଓ ସାମାଜିକ ସୁରକ୍ଷାରେ ସାମିଲ କରିବାକୁ ଦାବି ଉଠିଛି ।

ଭୃଗୁ ଜ୍ୟୋତିଷ ସମ୍ମିଳନୀରେ ବିହାର, ପଶ୍ଚିମବଙ୍ଗ, ତାମିଲନାଡୁ, ଉତ୍ତରପ୍ରଦେଶ, ହିମାଚଳ ପ୍ରଦେଶ ଓ ନେପାଳ, ବାଙ୍ଗଲାଦେଶ, ଶ୍ରୀଲଙ୍କାର ପ୍ରତିନିଧିମାନେ ସାମିଲ ହୋଇଛନ୍ତି ।