ଇତିହାସର ସବୁଠୁ ଖରାପ ବର୍ଷ ୨୦୨୦ !
ଇତିହାସରେ ଏମିତି ଅନେକ ସମୟ ଆସିଛି ଯେତେବେଳେ ତାକୁ ମାନବ ଇତିହାସର ସବୁଠୁ ଖରାପ ସମୟ ବୋଲି ବିବେଚନା କରାଯାଇଛି । କେତେବେଳେ ପ୍ଲେଗ୍ କାରଣରୁ ବିଶ୍ୱ ଜନସଂଖ୍ୟାର ଏକ ତୃତୀୟାଂଶ ମରିଯାଇଛନ୍ତି ତ କେତେବେଳେ ବିଶ୍ୱ ଯୁଦ୍ଧ କାରଣରୁ କୋଟି କୋଟି ଲୋକ ପ୍ରାଣ ହରାଇଛନ୍ତି । ତେବେ ବିଶ୍ୱ ଇତିହାସର ସବୁଠୁ ଖରାପ ବର୍ଷ କେଉଁଟି ?
ବର୍ଷ ୨୦୨୦କୁ ଗତ କେତେ ଦଶନ୍ଧି ମଧ୍ୟରେ ସବୁଠାରୁ ଖରାପ ବର୍ଷ ଭାବରେ ବର୍ତ୍ତମାନ ବିବେଚନା କରାଯାଉଛି । କରୋନା ମହାମାରୀ ମାନବଜାତିର ସ୍ଥିତିକୁ ଦୋହଲାଇ ଦେଇଛି, ଆଉ ତା ସାଙ୍ଗକୁ ଅଟକାଇ ଦେଇଛି ଅର୍ଥନୈତିକ ଗତିବିଧି। ମଣିଷ ଘରେ ବନ୍ଦ ରହିବାକୁ ବାଧ୍ୟ । ବିଶ୍ୱ ଇତିହାସରେ ଏଭଳି ଅନେକ ମହାମାରୀ ,ଏବଂ ଯୁଦ୍ଧ ଆସିଛି ଯାହା ମାନବକୁ ସଭ୍ୟତାର ଅନ୍ତକାଥା ଭାବିବାକୁ ବାଧ୍ୟ କରିଛି । ତେବେ ୨୦୨୦ କ’ଣ ମାନବ ଇତିହାସର ସବୁଠୁ ଖରାପ ବର୍ଷ ? ଉତ୍ତର ହେଉଛି ନା । ମାନବୀୟ ଇତିହାସ ଏମିତି ଆହୁରି ଅନେକ ତ୍ରାସଦି ଦେଖିଛି ଯାହା କରୋନାଠାରୁ ମଧ୍ୟ ଅଧିକ ଭୟଙ୍କର ଥିଲା ।
ଉଦାହରଣ ଭାବେ ବର୍ଷ ୧୩୪୭କୁ ନିଆଯାଇପାରେ । ଏହା ମାନବ ଇତିହାସରେ ସବୁଠାରୁ ଖରାପ ବର୍ଷ ମଧ୍ୟରୁ ଗୋଟିଏ । ସେହି ସମୟରେ ଚିକିତ୍ସା ବିଜ୍ଞାନରେ ଏତେ ବିକାଶ ଆସିନଥିଲା । ୧୩୪୭ରୁ ୧୩୫୧ ମଧ୍ୟରେ ପ୍ଲେଗ ନାମକ ରୋଗ ମଣିଷ ଜୀବନକୁ ଛାରଖାର କରିଦେଇଥିଲା । ଯାହାକୁ କଳା ମୃତ୍ୟୁ ବା ବ୍ଲାକ ଡେଥ୍ ନାମ ଦିଆଯାଇଥିଲା। ସେହି ସମୟରେ ପ୍ଲେଗ ରୋଗ ମହାମାରୀର ରୂପ ନେଇଥିଲା । କୁହାଯାଉଛି ଏହି ରୋଗ ଦ୍ୱାରା ଇଉରୋପର ଅଧାରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା ।
ଏହି ସମୟରେ ଆରମ୍ଭ ହୋଇଥିଲା କ୍ୱାରେଣ୍ଟାଇନ ପଦ୍ଧତି । ବେନିସର ଏକ ବନ୍ଦର ରାଗୁସାକୁ ଆସିଥିବା ଏକ ଜାହଜକୁ ୪୦ ଦିନ କ୍ୱାରେଣ୍ଟାଇନରେ ରଖା ଯାଇଥିଲା । ଯାହା ପରଠାରୁ କ୍ୱାରେଣ୍ଟାଇନ ଶବ୍ଦ ଖୁବ ଜଣାଶୁଣା ହୋଇଗଲା । ଏହି ରୋଗ ମୂଷା ମାନଙ୍କ ଯୋଗୁଁ ପୂରା ଚୀନରେ ବ୍ୟାପି ଯାଇଥିଲା । ତେବେ ଏହା ପ୍ରଥମ ବର୍ଷ ନୁହେଁ ଯେତେବେଳେ ପ୍ଲେଗ ବ୍ୟାପିଥିଲା ବରଂ ୫୪୨ରୁ ୫୪୬ ମଧ୍ୟରେ ଏହିଭଳି ପ୍ଲେଗ ରୋଗ ବ୍ୟାପିଥିଲା । ଯାହା ପରଠାରୁ ସମସ୍ତଙ୍କ ମନରେ ଏକ ଧାରଣା ସୃଷ୍ଟି ହେଲାଯେ ଏହି ପ୍ଲେଗ ରୋଗ ୧୦୦ ବର୍ଷ ପରେ ମହାମାରୀ ନେଇ ଫେରୁଛି ।
୧୪ ଶତାବ୍ଦୀରେ ଆସିଥିବା ପ୍ଲେଗ କିନ୍ତୁ ବ୍ରିଟେନରୁ ଆଉ ଫେରିଲାନି । କୁହାଯାଉଛି ପ୍ରତି ଦୁଇ ଦଶନ୍ଧି ପରେ ଏହା ବ୍ରିଟେନକୁ ଫେରୁଥିଲା । ୩୦୦ ବର୍ଷ ମଧ୍ୟରେ ଏହା ୪୦ ଥର ଫେରିଛି । ୧୬୬୫ରେ ଏହା ଲଣ୍ଡନକୁ ଛାରଖାର କରି ଦେଇଥିଲା । କେବଳ ଲଣ୍ଡନରେ ସାତ ମାସ ମଧ୍ୟରେ ୧୦ ଲକ୍ଷ ଲୋକଙ୍କର ମୃତ୍ୟୁ ହୋଇଥିଲା । ପଶୁଠାରୁ ମୂଷା ନିକଟକୁ ଏହି ରୋଗ ଆସୁଥିବା ଅନୁମାନ କରାଯିବା ପରେ ନୃଶଂସ ଭଳି ପଶୁ ମାନଙ୍କ ହତ୍ୟା କରାଗଲା ।
ମେକ୍ସିକୋରେ ବସନ୍ତ ନାମକ ରୋଗ ସ୍ପେନ ସୈନିକଙ୍କ ଠାରୁ ପ୍ରଥମେ ଆସିଥିଲା ବୋଲି କୁହାଯାଏ । ମହାମାରୀ ଏବଂ ଯୁଦ୍ଧ ସେହି ସମୟରେ ଏକ ଘାତକ ସାବ୍ୟସ୍ତ ହୋଇଥିଲା । କୁହାଯାଏ ଏକ ଶହ ବର୍ଷ ପର୍ଯ୍ୟନ୍ତ ବସନ୍ତର ପ୍ରଭାବ ମେକ୍ସିକୋ ଉପରେ ରହିଥିଲା । ଯେଉଁଥିପାଇଁ ସେଠାକାର ଲୋକସଂଖ୍ୟା ୧ କୋଟି ୧୦ ଲକ୍ଷରୁ କେବଳ ୧୦ ଲକ୍ଷ ହୋଇ ଯାଇଥିଲା ।
୧୯୧୮ରୁ ୧୯୨୦ ମଧ୍ୟରେ ସ୍ପାନିଶ ଫ୍ଲୁ ଆମେରିକାର ଏକ ଆର୍ମି କ୍ୟାମ୍ପରୁ ଆରମ୍ଭ ହୋଇ ପୂରା ଦୁନିଆରେ ଚହଳ ସୃଷ୍ଟି କରିଥିଲା । ଏଥିରେ ୫ରୁ ୧୦ କୋଟି ଲୋକଙ୍କର ମୃତ୍ୟୁ ହୋଇଥିଲା । ୧୯୫୭ରେ ଏହା ଏସିଆନ ଫ୍ଲୁ ନାମରେ ବ୍ୟାପିଲା । କିନ୍ତୁ ସେହି ସମୟରେ ଏହାର ଟୀକା ବାହାରି ଯିବାରୁ ବହୁ ପରିମାଣରେ ଲୋକଙ୍କ ଜୀବନ ବଞ୍ଚିଗଲା ।
କୋଭିଡ ୧୯କୁ ସବୁଠାରୁ ଅଧିକ ଚାଞ୍ଚଲ୍ୟ ସୃଷ୍ଟି କରିଥିବା ମହାମାରୀର ଯଦି ଆଖ୍ୟା ଦିଆଯାଏ, ତେବେ ହୁଏତ ଭୁଲ ହେବ ନାହିଁ । ଏହାଦ୍ୱାରା ଏପର୍ଯ୍ୟନ୍ତ ୬ କୋଟି ଲୋକ ସଂକ୍ରମିତ ହୋଇଛନ୍ତି ଏବଂ ପ୍ରାୟ ୧୪ ଲକ୍ଷ ଲୋକଙ୍କର ମୃତ୍ୟୁ ହୋଇସାରିଛି । ଏହି ମାହାମାରୀ ଫ୍ଲୁ ଭଳି ବ୍ୟାପୁଛି । ତେଣୁ କେବଳ ଏହା ଦ୍ୱାରା ନୁହେଁ ବରଂ ଏହା ସହିତ ଅନ୍ୟ କେତେକ ରୋଗରେ ମଧ୍ୟ ଲୋକଙ୍କ ମୃତ୍ୟୁ ହେଉଛି ।
କରୋନା କାଳରେ କେବଳ ସତର୍କତା ହିଁ ଆତ୍ମରକ୍ଷାର ଏକମାତ୍ର ଉପାୟ ।
